ශ්රි ලංකා ජනාධිපති අනුර කුමාර දිසානායක ඇතුළු මිත්ර රාජ්යවල ඉල්ලීම් සහ බහු පාර්ශ්වික සාකච්ඡාවලින් ලබාගත් ප්රතිඵල සැලකිල්ලට ගනිමින්, පකිස්ථාන රජය විසින් පකිස්ථාන ජාතික ක්රිකට් කණ්ඩායමට 2026 පෙබරවාරි 15 වන දින අයි.සී.සී. (ICC) පිරිමි විස්සයි20 ලෝක කුසලානයේ නියමිත තරඟය සඳහා කොළඹ එස්.එස්.සී ක්රීඩා පිටියට පිවිසෙන්නට පකිස්ථාන අග්රාමාත්ය ෂෙහ්බාස් ෂරීෆ් උපදෙස් ලබා දී ඇති බව පකිස්ථාන ක්රිකට් ආයතනය අද (09) රාත්රියේ නිල වශයෙන් නිවේදනය කළේය.
මෙම තීරණය ගෙන ඇත්තේ ක්රිකට් ක්රීඩාවේ ජීවගුණය ආරක්ෂා කිරීමේ අරමුණින් සහ සියලුම සහභාගී වන රටවල් තුළ මෙම ගෝලීය ක්රීඩාවේ අඛණ්ඩ පැවැත්මට සහාය වීම සඳහා බව එම නිවේදනයේ සඳහන් වේ.
එම නිල පුවත්පත් නිවේදනයේ පූර්ණ සිංහල පරිවර්තනය මෙසේය.
පකිස්ථාන ක්රිකට් මණ්ඩලයේ (PCB) සභාපති මොහොසින් නක්වි මහතා විසින්, PCB ආයතනය, ජාත්යන්තර ක්රිකට් කවුන්සිලයේ (ICC) නියෝජිතයන් සහ බංග්ලාදේශ ක්රිකට් මණ්ඩලය (BCB) අතර පවත්වන ලද ඉහළ මට්ටමේ සාකච්ඡාවල ප්රතිඵල පිළිබඳව පකිස්ථානයේ ගරු අග්රාමාත්ය ෂෙහ්බාස් ෂරීෆ් මහතාව නිල වශයෙන් දැනුවත් කර ඇත.
බංග්ලාදේශ ක්රිකට් මණ්ඩලය විසින් පකිස්ථාන ක්රිකට් මණ්ඩලය වෙත ඉදිරිපත් කරන ලද නිල ඉල්ලීම් මෙන්ම ශ්රී ලංකාව, එක්සත් අරාබි එමීර් රාජ්යය සහ අනෙකුත් සාමාජික රටවලින් ලැබුණු සහායක සන්නිවේදනයන් පිළිබඳව පකිස්ථාන රජය සිය අවධානය යොමු කර ඇත. මෙම ලිපි හුවමාරු මගින් මෑතකාලීන අභියෝග සඳහා ශක්තිමත් විසඳුමක් ලබා ගැනීමට පකිස්ථානයේ නායකත්වය අපේක්ෂා කරන ලදී.
බංග්ලාදේශ ක්රිකට් මණ්ඩලයේ සභාපති අමීනුල් ඉස්ලාම් මහතා කළ ප්රකාශය ද රජය විසින් සටහන් කර ගන්නා ලදී. අපගේ සහෝදර රට විසින් ප්රකාශ කරන ලද එම ගැඹුරු කෘතඥතාව මහත් ලෙන්ගතුකමකින් යුතුව පිළිගනු ලැබේ. පකිස්ථානය සැමවිටම බංග්ලාදේශය සමඟ උරහිසට උරහිස තබා සිටගන්නා බව පකිස්ථානය යළිත් තහවුරු කරයි.
අද සන්ධ්යාවේ අග්රාමාත්යවරයා ශ්රී ලංකා ජනාධිපති අතිගරු අනුර කුමාර දිසානායක මහතා සමඟ දුරකථන සංවාදයක නිරත විය. එම සුහදශීලී සංවාදයේදී, විශේෂයෙන්ම අභියෝගාත්මක කාලවල් වලදී පකිස්ථානය සහ ශ්රී ලංකාව සැමවිටම එකිනෙකාට සහයෝගය දක්වමින් සිටි ආකාරය ඔවුහු සිහිපත් කළහ. වත්මන් අර්බුදය මිත්රශීලීව විසඳා ගැනීම සඳහා දැඩි අවධානයක් යොමු කරන ලෙස ශ්රී ලංකා ජනාධිපතිවරයා මෙහිදී අග්රාමාත්යවරයාගෙන් ඉල්ලා සිටියේය.
බහුපාර්ශ්වික සාකච්ඡාවලින් ලබාගත් ප්රතිඵල මෙන්ම මිත්ර රටවල ඉල්ලීම් ද සැලකිල්ලට ගනිමින්, පකිස්ථාන රජය විසින් පකිස්ථාන ජාතික ක්රිකට් කණ්ඩායමට 2026 පෙබරවාරි 15 වන දින අයි.සී.සී. (ICC) පිරිමි විස්සයි20 ලෝක කුසලානයේ නියමිත තරඟය සඳහා ක්රීඩා පිටියට පිවිසෙන ලෙස මෙයින් උපදෙස් ලබා දෙයි.
තවද, මෙම තීරණය ගෙන ඇත්තේ ක්රිකට් ක්රීඩාවේ ජීවගුණය ආරක්ෂා කිරීමේ අරමුණින් සහ සියලුම සහභාගී වන රටවල් තුළ මෙම ගෝලීය ක්රීඩාවේ අඛණ්ඩ පැවැත්මට සහාය වීම සඳහා ය.
අග්රාමාත්යවරයා සහ පකිස්ථාන ජනතාව “Men in Green” (පකිස්ථාන කණ්ඩායම) වෙත ඔවුන්ගේ සුභාශිංසන පිරිනමති. අපේ කණ්ඩායම ගෝලීය ජයග්රහණ වෙනුවෙන් තරඟ වදින විට ක්රීඩාශීලීත්වය සහ ජාතික අභිමානය ක්රීඩා පිටියට රැගෙන යනු ඇතැයි අපි විශ්වාස කරමු.
