අමාත්යාංශයක් ලෙස සෞඛ්ය අමාත්යාංශයේ කටයුතු කිසිම බලපෑමකට යටත් නොවී ක්රියාත්මක කරන බවත්, වෘත්තීය සමිතියක් වූ රජයේ වෛද්ය නිලධාරීන්ගේ සංගමය (GMOA) තමන්ගේ සීමාව හඳුනාගෙන කටයුතු කළ යුතු බවත් සෞඛ්ය අමාත්ය නලින්ද ජයතිස්ස අද ඍජුව ප්රකාශ කළේය.
රජයේ වෛද්ය නිලධාරීන්ගේ සංගමය වෘත්තීය සමිතියක් ලෙස වෛද්යවරුන්ගේ මාරු මණ්ඩලයේ සිටි පමණින් අමාත්යාංශය හරහා කෙරෙන ස්ථාන මාරුවීම්, පත්වීම් ලබා දීම්, දුෂ්කර සේවා පත්වීම් ලබාදීම් වැනි සියලුම දේට ඇඟිලි ගැසීමේ සර්ව ලෝක පූට්ටුවක නොසිටින බව ඇමතිවරයා අවධාරණය කළේය.
රජයේ වෛද්ය නිලධාරීන්ගේ සංගමය (GMOA) විසින් අද ආරම්භ කර ඇති පැය 24ක දීප ව්යාප්ත සංකේත වැඩ වර්ජනය සම්බන්ධයෙන් රජයේ ස්ථාවරය පැහැදිලි කරමින් සෞඛ්ය අමාත්ය නලින්ද ජයතිස්ස අද පැවති කැබිනට් මාධ්ය හමුවේදී කළ දීර්ඝ විස්තරයේ දී අවධාරණය කළේ වෘත්තීය සමිතියක් තමන්ගේ තරම හඳුනාගෙන කටයුතු කිරීම වැදගත් බවය.
-
ස්ථාන මාරු ක්රියාවලිය සහ වසර 13ක අක්රමිකතා
කිසිදු ආකාරයක නීති විරෝධී ස්ථාන මාරුවක් සිදු කර නොමැති බව අවධාරණය කළ අමාත්යවරයා, මේ වන විට වාර්ෂික ස්ථාන මාරු සඳහා විධිමත් කටයුතු සිදුවන බව පැවසීය.
“මැයි 10 වනවිට වෛද්යවරුන් හය දහසක් පමණ මාරු වීමට නියමිතයි. මේ ආකාරයට විධිමත්ව ස්ථාන මාරු ක්රියාවලියක් පසුගිය වසර 13ම සිදුවෙලා නෑ. ඔය ට්රාන්ස්ෆර් බෝඩ්වල හිටියයි කියලා කිව්වට ඒ සංගමයේ සාමාජිකයො සමහර තැන්වල අවුරුදු 13, අවුරුදු 17 හිටියා. අක්ෂි රෝහලේ අවුරුදු 13ක් හිටියා තමන්ට නියමිත ජාතික රෝහලට පාරෙන් පැනලා යන්න බැරිව. “
“මේ සියලු අක්රමිකතාවයන් නතර කරලා වාර්ෂික ස්ථාන මාරු ක්රියාවලිය ක්රියාත්මක කරමින් පවතිනවා. මේකෙන් බහුතරයක් අසාධාරණයට ලක් වෙලා හිටිය වෛද්යවරුන්ට සාධාරණයක් වෙලා තියනවා. ඒ නිසා ඒ අය කැමතියි. මේකට අකමැති වෙලා තිබෙන්නේ තමන්ගේ බලය පාවිච්චි කරලා තමන්ගේ විධායක සභාවේ සාමාජිකයින්, තමන්ගේ සංගමයේ සාමජිකයන්ගේ බිරින්දෑවරු, තමන්ට කැමති කැමති තැන්වල අවුරුදු ගණනාවක් රඳවාගෙන හිටපු අය,” යැයි ඇමතිවරයා පැවසීය.
-
දුෂ්කර සේවා ලැයිස්තුව සකස් කිරීම
දුෂ්කර සේවා ලැයිස්තුව සකස් කිරීම වෘත්තීය සංගම්වල කාර්යයක් නොවන බවත්, එය සෞඛ්ය අමාත්යාංශයේ වගකීමක් බවත් අමාත්යවරයා පෙන්වා දුන්නේය.
2018 වන තෙක් පැවති පැරණි ක්රමවේද සහ 2020 දී හඳුන්වා දුන් දුෂ්කර ලැයිස්තුවල අකටයුතුකම් සිදුව ඇති බව පැවසූ ඔහු, මෙවර ප්රධාන නිර්නායක 07ක් මත පදනම්ව ප්රාදේශීය හා පළාත් සෞඛ්ය අධ්යක්ෂවරුන්ගේ සහභාගීත්වයෙන් වෛද්යවරුන් 265කගේ ලැයිස්තුවක් සකස් කර ප්රකාශයට පත් කළ බවත්, ඒ සඳහා වෘත්තීය සංගම් සම්බන්ධ කරගැනීම අවශ්ය නොවන බවත් සඳහන් කළේය.
-
පශ්චාත් සීමාවාසික පත්වීම් සහ නීතිමය තත්ත්වය
පශ්චාත් සීමාවාසික පත්වීම් යනු ස්ථාන මාරුවක් නොව නව බඳවා ගැනීමක් බව පෙන්වා දුන් අමාත්යවරයා, ඒ සඳහා වන අයදුම්පත් කැඳවීම අප්රේල් 04 දින දවල් 12ට අවසන් වන බව ප්රකාශ කළේය.
“අයදුම් කරන අය පමණක් ප්රාථමික ශ්රේණියේ වෛද්යවරුන් ලෙස රාජ්ය සේවයට බඳවා ගන්නවා. අයදුම් නොකරන අයට එතනින් එහාට සේවාව පවත්වාගන්න බෑ. ඒක තමයි නීතිය, ඒක තමයි චක්රලේඛ, ඒක තමයි ආයතන සංග්රහය. එතැනින් එහාට මේ කාල සීමාව දික් කරන්නෙත් නෑ, බඳවා ගැනීම් වෙනස් කරන්නෙත් නෑ,” යනුවෙන් ඔහු දැඩිව ප්රකාශ කර සිටියේය.
-
අමාත්යාංශයේ ස්වාධීනත්වය සහ ‘හතේ කාමරේ’
සෞඛ්ය අමාත්යාංශයේ කටයුතුවලට වෘත්තීය සංගම් අනවශ්ය ලෙස මැදිහත් වූ යුගය අවසන් බව පැවසූ අමාත්යවරයා, මීට පෙර පැවති තත්ත්වය මෙසේ විස්තර කළේය:
“පත්වීම් ලබා දීමේ දී, ස්ථාන මාරු ලබා දීමේ දී දුෂ්කර සේවා ලයිස්තු හැදීමේ දී මේ මැදිහත්වීම කොතරම් ද කියනවා නම් ඒ අය වෙනම කාමරයක් සෞඛ්ය අමාත්යාංශයේ වෙන් කරගත්තා. ‘හතේ කාමරේ’ කියලා එකක් තිබුණා. රෝහල්වල වැඩ කරන්න ඕන වෛද්යවරු 04ක් 06ක් තියාගෙන වැටුප් ගෙවලා සෞඛ්යයට සම්බන්ධ නැති කෙනෙක් එතන තියාගෙන තමයි මේ ලයිස්තු සකස් කරලා තිබුණේ. “
“අපි එනකම් එහෙමයි කටයුතු කළේ. සෞඛ්ය අමාත්යාංශයේ ඇතැම් නිලධාරීන් ඒකට යටවෙලා හිටියා. එහෙම කරන්න බෑ.”
-
වර්ජනය පිළිබඳ රජයේ අවසන් නිවේදනය
වර්තමාන ලෝක අර්බුදකාරී වාතාවරණය හමුවේ මෙවැනි වැඩ වර්ජන සිදු කිරීම මානුෂීය නොවන බව පෙන්වා දුන් ඇමතිවරයා, වැඩ කරන වෛද්යවරුන්ට අවශ්ය පහසුකම් සහ දීමනා ලබා දීමට රජය සූදානම් බව පැවසීය.
“කරුණාකරලා මම ඒ අයට කියන්නේ සංකේත වැඩ වර්ජන කරන්න යන්න එපා. ලෝක යුද්ධයක් පවතින වෙලාවේ, රටේ බලශක්ති දාම යම් කිසි ආකාරයකට බලපෑමකට ලක් වෙලා ඉන්න වෙලාවේ, ලෝකෙම ජනතාව මේ බලශක්ති අර්බුදය හා මතුවුන ආර්ථික ප්රශ්නයත් එක්ක තමන්ගෙ ජීවිත ගැටගහ ගන්න ලොකු වෙහෙසක් දරමින් ඉන්න වෙලාවෙ කවුරුහරි අනීතික ලෙස මනුෂ්යත්වයෙන් තොරව මෙවැනි වැඩ වර්ජන කරනවා නම් ඒ ගැන සලකා බලන්නට ඕන. වැඩ කරන අය වැඩ කරන්න. ඒ අයට වැටුප් සහ අමතර දීමනා ලබා දෙනවා. මේ ගැන රජය ස්ථාවර තීන්දුවක ඉන්නවා,” යනුවෙන් අමාත්ය නලින්ද ජයතිස්ස අවධාරණය කළේය.
මේ ලිපියත් කියවන්න…
