ලලිත් චාමින්ද –
-
සන්නිවේදන උපකරණවලට හානි කළ නියමුවා වෙනත් බෝට්ටුවක නැගී ධීවරයින් සමග යාත්රාව දමා පලා ගිහින්…
මහ මුහුද මැද දී නියමුවා හා ධීවරයන් අතර ඇති වූ ගැටුමක් නිසා යාත්රාවේ රේඩාර් පද්ධතිය සහිත සන්නිවේදන උපකරණවලට හානිකර, යාත්රාව හා ධීවර පිරිස් අත්හැර දමා වෙනත් බෝට්ටුවක නැගී නියමුවා පලා යෑම නිසා අසරණ වූ ධීවරයින් සිවු දෙනෙක් අසාධ්ය තත්වයෙන් යුතුව අද (16)ගාල්ල ධීවර වරායට සිය යාත්රාවත් මෙහෙයවාගෙන පැමිණ තිබේ.
දින 16කට පසුව ගොඩබිමකට පැමිණි, ඉතා දුර්වල තත්වයේ සිටි මෙම ධීවරයින් සිවු දෙනා කරාපිටිය ශික්ෂණ රෝහලට ඇතුළත් කළ බැව් ගාල්ල වරාය පොලීසිය පවසයි .
පසුගිය ජනවාරි 09 වැනිදින මිරිස්ස ධීවර වරායෙන් ධීවර කාර්මිකයින් පස්දෙනකු කැන්ගරු නැමැති බහුදින යාත්රාවෙන් මුහුදු ගොස් තිබුණි. යාත්රා කරන අතර බහුදින ධීවර යාත්රාවේ නියමුවා හා ධීවරයින් අතර මුහුදේ දී ගැටුමක් ඇතිවී තිබේ.
මෙම ගැටුමෙන් පසු බහුදින ධීවර යාත්රාවේ නියමුවා බෝට්ටුවේ සංනිවේදන උපකරණවලට (රෙඩාර් පද්ධතියට) හානිකොට මුහුදේදීම වෙනත් බෝට්ටුවක නැගී පලා ගොස් ඇත .
යාත්රාවේ නියමුවා යාත්රාව දමා පලා යාම නිසා ධීවර කාර්මිකයින් සිව්දෙනා මහ මුහුදේ දී අතරමං වී ඇත.
පසුව මොවුන් එම බහුදින යාත්රාවෙන්ම ගාල්ල ධීවර වරායට පැමිණ තිබුණි. මෙම සිද්ධිය පිළිබඳ ගාල්ල වරාය පොලීසිය පරීක්ෂණ පවත්වයි..
