දකුණු පළාතේ රෝහලක වෛද්යවරයකු නිරුවත් කර බිය ගන්වා රුපියල් ලක්ෂ 10 කට අධික මුදලක් කොල්ලකෑමේ සිද්ධියකට ජන අරගල සංවිධානයේ කොළඹ දිස්ත්රික්කයෙන් තරඟ වදින අපේක්ෂිකාවක ඇතුළු හය දෙනකු අත්අඩංගුවට ගත් බව බම්බලපිටිය පොලිසිය කියයි. අත්අඩංගුවට ගත් සෙසු සැකකරුවන් අතර එම අපේක්ෂිකාවගේ බෑනා සහ ත්රී රෝද රථ රියදුරකු වන සැමියාදවන බව පොලිසිය පවසයි.
අත් අඩංගුවට ගත් ජන අරගල සංවිධානයේ කොළඹ දිස්ත්රික් අපේක්ෂිකාවක හා ඇයගේ සැමියා ඇතුළු සැකකරුවන් අද (12) දිනය දක්වා රක්ෂිත බන්ධනාගාර ගත කිරීමට කොළඹ අතිරේක මහේස්ත්රාත් පසන් අමරසේන ඊයේ නියෝග කර තිබිණි. සිද්ධියට අදාළ සැකකරුවන් අද පස්වරුවේ බම්බලපිටිය පොලිසිය මගින් අත්අඩංගුවට ගෙන ඇති අතර එම සැකකරුවන් හඳුනා ගැනීමේ පෙරට්ටුවක් සඳහා අද (12) දිනයේදී ආවරණය කර ඉදිරිපත් කරන ලෙස ද මහේස්ත්රාත්වරයා නියෝග කළේය.
සමාජ මාධ්යයෙන් දැන හඳුනා ගැනීමෙන් පසු සම්බාහන කටයුත්තක් සඳහා බම්බලපිටිය රජයේ මහල් නිවසකට ඉකුත් 8 වෙනි දින පැමිණි තිබූ වෛද්යවරයා එම කටයුත්ත සඳහා සූදානම් වීමේදී යාබද කාමරයක සැඟව සිටි සැකකරුවන් තිදෙනකු උල් පිහියක් රැගෙන එම ස්ථානයට කඩා පැන ජංගම දුරකථනයෙන් වෛද්යවරයාගේ නිරුවත වීඩියෝ කර සමාජ මාධ්යයට මුදා හරින බවට තර්ජනය කර බිය ගන්වා මුදල් ඉල්ලා ඇතැයි පොලිසිය කියයි.
ඊට බිය වූ වෛද්යවරයා ඔන්ලයින් මාර්ගයෙන් කොල්ලකරුවන් ලබා දුන් ගිණුමකට රුපියල් ලක්ෂ 10 ක මුදලක් බැර කර ඇති අතර වෛද්යවරයා සන්තකයේ තිබූ රුපියල් 15000/= ක මුදලක්ද කොල්ලකරුවන් බලහත්කාරයෙන් ලබාගෙන තිබූ බවද පොලිසිය කියයි. එම මුදල බැර කර ඇති කොල්ලකරුවන් ලබා දුන් ගිණුම ගල්කිස්ස ලිපිනයේ පදිංචි ජන අරගල සංවිධානයේ මැතිවරණ අපේක්ෂිකාවගේ බැංකු ගිණුම බව සාක්ෂි මගින් අනාවරණය වන්නේ යැයි බම්බලපිටිය පොලිසිය අධිකරණයට කරුණු ඉදිරිපත් කරමින් සඳහන් කර ඇත. පැයකට ආසන්න කාලයක් එහි රඳවාගෙන සිටි වෛද්යවරයාව කොල්ලකරුවන් මුදා හැර ඇති අතර එදිනම රාත්රියේ නීතිඥවරයකු සමග පොලිසිය වෙත පැමිණි ඔහු අපරාධය පිළබඳ පැමිණිලි කර තිබිණි.
පැමිණිල්ල ලද වහාම ක්රියාත්මක වූ පොලිසිය එම නිවස කරා ගොස් පරීක්ෂණ ආරම්භ කිරීමේදී නිවසේ ඉදිරිපස දොරේ යතුර දක්නට ලැබූ තිබූ අතර නිවසේ කිසිවෙකුත් නොසිටීම හේතුවෙන් ඒ සම්බන්ධයෙන් සිදු කළ සොයාබැලීමේදී එම නිවස අන්තර්ජාලයේ පළ කර තිබූ දැන්වීමක් අනුව රුපියල් 3500/= ක මුදලකට දිනකට ලබාගෙන තිබූ බවට අනාවරණය විය. පසුව සැකකරුවන් සොයා ගොස් අත් අඩංගුවට ගත් විමර්ශන අංශ ඔවුන්ව අධිකරණයට ඉදිරිපත් කර තිබිණි. බම්බලපිටියේ පොලිසියේ ස්ථානාධිපති ප්රධාන පොලිස් පරීක්ෂක කේ.ඒ සම්පත් පද්මලාල්ඇ තුළු නිලධාරීන් විමර්ශන සිදුකරයි. ( ලංකාදීප)
