2026 T20 ලෝක කුසලාන තරගාවලියෙන් බංග්ලාදේශය ඉවත් වීම හේතුවෙන්, ඉදිරියේදී ලෝක ක්රිකට් ක්ෂේත්රය තුළ බංග්ලාදේශය “ගැටලු ඇති කරන්නෙකු” (troublemaker) ලෙස හංවඩු ගැසෙනු ඇතැයි බංග්ලාදේශ ක්රිකට් ආයතනයේ හිටපු මහලේකම් සහ ආසියානු ක්රිකට් කවුන්සිලයේ හිටපු ප්රධාන විධායක නිලධාරී සයීඩ් අෂ්රෆුල් හක් ප්රකාශ කර තිබේ.
ආරක්ෂක හේතූන් මත මෙම තීරණය ගත් බව බංග්ලාදේශ ක්රිකට් ආයතනය පැවසුවද, ක්රීඩකයින් සමඟ පැවැත්වූ සාකච්ඡාවකින් අනතුරුව ඔවුන් මෙම වර්ජනයට තීරණය කර ඇතැයි බංගලාදේශ ක්රිකට් ආයතනය ප්රකාශ කර තිබිණි.
සයීඩ් අෂ්රෆුල් හක් බංගලාදේශ ක්රිකට් පාලක මණ්ඩලයේ අදහස විවේචනය කරමින් Cricbuzz වෙබ් අඩවිය වෙත පවසා ඇත්තේ තව සති කිහිපයකින් බලයෙන් ඉවත්වන රජයක තීරණයකට වත්මන් ක්රිකට් පාලක මණ්ඩලය පූර්ණ ලෙස යටත් වීම ඉතා අවාසනාවන්ත තත්ත්වයක් බවය.
“මෙයින් සිදුවන හානිය සහ ජාත්යන්තර ක්රිකට් ප්රජාවෙන් බංග්ලාදේශය හුදකලා වීමේ අවදානම දිගුකාලීන බලපෑම් ඇති කරනු ඇති. ක්රිකට් ක්ෂේත්රය තුළ බංග්ලාදේශය මින් ඉදිරියට සැලකෙනු ඇත්තේ ගැටලුකාරී රටක් ලෙසය.” ඔහු වැඩිදුරටත් පවසා තිබිණි.
තවද, ලෝක කුසලානයක් ක්රීඩා කිරීමේ ක්රීඩකයින්ගේ ජීවිත කාලීන සිහිනය මෙයින් අහිමි වී ඇති බවද ඔහු පෙන්වා දුන්නේය.
“ඕනෑම ගෞරවනීය ක්රිකට් මණ්ඩලයක් කළ යුතුව තිබුණේ ICC ආයතනය ලබාදුන් ආරක්ෂක පියවරයන් කණ්ඩායමට දැනුම් දී, ඒ පිළිබඳ තීරණය ක්රීඩකයින්ට භාර දීමයි. ඔවුන්ට අනාරක්ෂිත බවක් හැඟුණේ නම් නොගොස් සිටිය හැකියි. නමුත් එම තීරණය රජයෙන් හෝ මණ්ඩලයෙන් නොව ක්රීඩකයින්ගෙන් පැමිණිය යුතුව තිබුණා. ප්රශ්නකාරී දේශපාලන අරමුණක් වෙනුවෙන් ඔවුන් ක්රීඩකයින්ගේ සිහින අහිමි කර තිබෙනවා.” එය සයීඩ් අෂ්රෆුල් හක්ගේ අදහසය.
වත්මන් තත්ත්වය
ඉන්දියාවේ පැවැත්වෙන ලෝක කුසලානයට සහභාගී නොවන බවට බංග්ලාදේශය ගත් තීරණය ජනවාරි 22 වන බ්රහස්පතින්දා යළිත් තහවුරු කරන ලදී. ඒ ක්රීඩා උපදේශක අසීෆ් නස්රුල් විසිනි.
තම රටේ තරග ශ්රී ලංකාවට මාරු කරන ලෙස බංග්ලාදේශය කළ ඉල්ලීම ජාත්යන්තර ක්රිකට් කවුන්සිලය (ICC) ප්රතික්ෂේප කළ අතර, සැලසුම් කළ පරිදි තරගාවලිය ඉන්දියාවේම පවත්වන බවත්, ඉන්දියාවේ කිසිදු විශ්වසනීය ආරක්ෂක තර්ජනයක් නොමැති බවත් ICC අවධාරණය කළේය.
කෙසේ වෙතත්, බංග්ලාදේශ ක්රිකට් ආයතනය මේ සම්බන්ධයෙන් ICC ආාවුල් විසඳීමේ කමිටුව (Dispute Resolution Committee) වෙත කරුණු ඉදිරිපත් කරන ලෙස ඉල්ලා ලිපියක් යවා ඇත.
මේ පිළිබඳව නීතිමය කරුණු පරීක්ෂා කර බලා ඉදිරි දිනවලදී අවසන් තීරණයක් ගැනීමට ICC සූදානමින් සිටී.
ලෝක කුසලාන කාලසටහනේ කිසිදු වෙනසක් සිදු නොකිරීමට ICC මණ්ඩලය දැනටමත් ඡන්දය ප්රකාශ කර අවසන්ය.
