මනම්පිටිය නිමල් ජයරත්න –
රජයේ අස්වැසුම සහනාධාරය ලබාදීමේදී ඉහළ ආදායමක් උපයන,කුඹුරු, යාන, වාහන තිබෙන අයවලුන්ටත් අස්වැසුම ප්රතිලාභය ලබාදීම තුළ තමන්ට එම අස්වැසුම ප්රතිලාභය ලබා ගැනීමේ අවස්ථාව අහිමි වී ඇති බව පොළොන්නරුව දිස්ත්රික්කයේ අඩු ආදායම්ලාභී ප්රජාව චෝදනා කරමින් සිටිති.
දිඹුලාගල සහ වැලිකන්ද ප්රාදේශීය ලේකම් කොට්ඨාසවල වැලි වැලිමංකඩ හිමි, කැනීම් යන්ත්ර සූත්ර තිබෙන, යාන වාහන තිබෙන අයවලුන්ට පවා අස්වැසුම ලබාදී ඇති බවත්, විශාල ආදායමක් ලබන ඔවුන්ට අස්වැසුම ලබාදී ඇත්තේ කුමන නිර්ණායක පදනම් කරගෙනද යන්නත් ඔවුහු ප්රශ්න කරති.
ඇතැම් ගම්මානවල පොලියට මුදල් ලබාදෙන අයවලුන්ටත්, මහා පරිමාණ වෙළෙඳ ව්යාපාර පවත්වාගෙන ව්යාපාරිකයන්ටත් අස්වැසුම් ප්රතිලාභය ලබාදී ඇති අතර බොහෝ ගම්මානවල අඩු ආදායම්ලාභී පවුල් සහ මෙන්ම විශේෂ අවශ්යතා ඇති සාමාජිකයින් සිටින පවුල්වලට, මව හෝ පියා අහිමි දරුවන් සිටින පවුල් වලට අස්වැසුම නොලැබෙන බවත්, එවැනි ඇතැම් පවුල්වලට ඉතා අඩු අස්වැසුම ප්රතිලාභයක් ලබාදී ඇති බවත් දිඹුලාගල, තමන්කඩුව, සහ වැලිකන්ද කොට්ඨාසවල ජනතාව ගේ ජීවන තත්ත්වයන් විමසීමේ දී පැහැදිලි වි ඇත.
අස්වැසුම ප්රතිලාභය ලබා දී ඇති නිර්ණායක පදනම් කරගනිමින් සුදුස්සාට ප්රතිලාභය ලැබෙන නිර්ණායක සකස් කිරීමට සහ එය මහජනතාවගේ දැනගැනීමට ප්රදර්ශනය කරන ලෙසටත්, සුදුස්සාට පමණක් අස්වැසුම ලබාදීමට අවශ්ය කටයුතු කරදෙන ලෙසත් ප්රදේශවාසීහු ජනාධිපතිවරයා ප්රමුඛ අදාල බලධාරීන්ගෙන් ඉල්ලීමක් කර සිටිති.
මේ ජනතා චෝදනා සම්බන්ධව අප ජාතික ජන බලවේගය පොළොන්නරුව දිස්ත්රික් පාර්ලිමේන්තු මන්ත්රී නිවාස නියෝජ්ය අමාත්ය ටී.බී සරත්ගෙන් කළ විමසීමකදී ඔහු මෙසේ සඳහන් කළේය.
” අස්වැසුම යනු පසුගිය ආණ්ඩුවේ චන්ද මෙහෙයුමක්… අස්වැසුම ප්රතිලාභ ලබාදීම සඳහා සැකසූ නිර්ණායකවල විශාල අඩුපාඩුකම් රැසක් තිබෙනවා. සැබවින්ම අස්වැසුම ලැබීමට සුදුසු ප්රතිලාභීන්ට වර්තමානයේ අස්වැසුම ප්රතිලාභය නොලැබෙන බවට තොරතුරු ලැබී තිබෙනවා.
හිඟුරක්ගොඩ ප්රාදේශීය ලේකම් කොට්ඨාසයේ අස්වැසුම ලබාගැනීමට ආරම්භ කරපු බැංකු ගිණුම්වලින් ඔවුන් මුදල් ලබා නොගෙන ස්ථිර ඉතිරි කිරීම් වශයෙන් එය පවත්වාගෙන යන බවට මට තොරතුරු ලැබී තිබෙනවා. ”
සුදුස්සාට අස්වැසුම ලබාදීමට හැකි චක්රලේඛනයක් ජනාධිපතිවරයාගේ උපදෙස් මත අදාළ අමාත්යාංශය සහ කැබිනට් මණ්ඩලය සමඟ සාකච්ඡා කරමින් නිකුත් කිරීමට කටයුතු කරන බවත්, සුදුස්සාට අස්වැසුම ප්රතිලාභය ලබාදීමේ ක්රමවේදය සකසන බවත් නියෝජ්ය ඇමතිවරයා කීවේය,
