දිනසේන රතුගමගේ –
අද (15) සිදුවන ජනාධිපතිවරයාගේ පලමු ඉන්දීය සංචාරයේදී ඉන්දු – ලංකා ධීවර ප්රශ්නයට ගත හැකි විසඳුම් පිළිබදව ඉන්දීය අග්රාමාත්යවරයා සමග කරුණු සාකච්ඡා කිරීමට නියමිත බව ධීවර අමාත්ය රාමලිංගම් චන්ද්රසේකරන් යාපනයේදී පැවසීය.
ඊයේ (14) මාධ්යවේදීන්ට අදහස් දක්වමින් ධීවර අමාත්යවරයා කියා සිටියේ ඉන්දීය ධීවරයින් උතුරු මුහුද ආශ්රිතව සිදු කරණ බොටම් ට්රෝලින් ක්රියාවලිය නවතා දමන තුරු මේ ප්රශ්නයට ස්ථිර විසඳුමක් ලබා ගැනීම අසීරු බව වත්මන් ජනාධිපති අනුර කුමාර දිසානායක ද පිළිගෙන ඇති බවය.
මේ තත්ත්වය නිසා ඉන්දීය අග්රාමාත්ය නරේන්ද්ර සිං මෝදි මහතා පවැත්වෙන ද්වී පාර්ශ්වීය සාකච්ඡාවේදී මේ ප්රශ්නය ඉතා දීර්ඝ වශයෙන් සාකච්ඡා කෙරෙන බවද ධීවර අමාත්යවරා පැවසීය.
ඉන්දීය ධීවරයින්ගේ බලහත්කාර ආක්රමණය නිසා උතුරේ ධීවරයින්ට වසරකට මාලු මෙට්රික් ටොන් 20 ත් 25 ත් අතර ප්රමාණයක් අහිමි වී යන බවද බොටම් ක්රමය මගින් ඔවුන් මසුන් මැරීමේදී මත්ස්ය බිත්තර වලට හා සාගර සම්පත් වලට විශාල හානියක් සිදුවන බවද රාමලිංගම් චන්ද්රසේකරන් අමාත්යවරයා සදහන් කළේය.
මේ තත්ත්වය නිසා උතුරේ සාගර සම්පත් වසර ගණනාවක කාලයකට විනාශයට පත්වීම උතුරේ ධීවරයින්ට මසුන් අහිමි වීමට වඩා විශාල තර්ජනයක් වන බවද ධීවර අමාත්යවරයා පෙන්වා දුන්නේය.
මේ වන විට ඉන්දු – ලංකා ධීවර ප්රශ්නය රාජ්ය තාන්ත්රික ගැටලුවක් බවට පත් වි ඇති බව කී අමාත්යවරයා ඉන්දීය රජය සමග සාකච්ඡා කොට මානුෂීය මුණුවරක් යටතේ මේ ප්රශ්නයට විසඳුම් සෙවිය යුතු බවද කියා සිටියේය.
