දිනසේන රතුගමගේ –
-
අර්චුනා ඉවත් නොකරන්නේ නම් නිලධාරින් දිස්ත්රික් සංවර්ධන කමිටු රැස්විමෙන් ඉවත්වන බව දන්වයි… තමන්ට සර් නොකී බව කියා අවසාන මොහොතෙත් අර්චුනා නිලධාරියෙක් සමග පැටලෙයි…
ඊයේ (14) පැවති යාපනය දිස්ත්රික් සංවර්ධන කමිටු රැස්වීමේදී නිලධාරීන්ට බැණ වදිමින් තර්ජනය කළ යාපනය දිස්ත්රික් ස්වාධීන මන්ත්රී රාමනාතන් අර්චුනා මන්ත්රීවරයාට දැඩි විරෝධයක් පළ කළ එම රැස්වීමට එක්වූ සියලුම දෙනා වහාම ඔහුව එතැනින් ඉවත් කරන ලෙස බල කර තිබේ.
යාපනයේ සංවර්ධන කටයුතු පිළිබඳව කරුණු සාකච්ඡා වූ අවස්ථාවේදි නිලධාරීන් විසින් දක්වන අදහස් වලට විරුද්ධ අදහස් දක්වමින් මෙම මන්ත්රීවරයා කෑ කෝ ගසන්නට පටන් ගැනීම නිසා යාපනයේ මන්ත්රීවරුන් හා රාජ්ය නිලධාරීන් ඔහුට රැස්වීම් ශාලාවෙන් ඉවත් වන ලෙස දන්වා ඇත.
ඔහු ඉවත් නොවන්නේ නම් හෝ ඉවත් කිරීමට පියවර නොගන්නේ නම් තමන් රැස්වීමෙන් පිටව යන බව නිලධාරීන් තරයේම ප්රකාශ කිරීම නිසා යාපනය දිස්ත්රික් සංවර්ධන කමිටු රැස්වීමේ කටයුතු විනාඩි ගණනාවකට නැවතී තිබේ.
මේ අවස්ථාවේදී ධීවර අමාත්ය හා යාපනය දිස්ත්රික් සංවර්ධන කමිටුවේ සභාපති රාමලිංගම් චන්ද්රසේකර් අමාත්යවරයා උදා වූ තත්ත්වය සමථයකට පත් කරගෙන රැස්වීම ඉදිරියට ගෙන ගොස් ඇත.
එහෙත් රැස්වීම අවසන් වීමට විනාඩි කීපයකට පෙර අර්චුනා මන්ත්රීවරයාට ආමන්ත්රණය කිරීමේදී එක් රාජ්ය නිලධාරියෙකු සර් නොකීම නිසා කිපී ඇති මන්ත්රීවරයා එම නිලධාරියා සමගද බහින් බස් වීමක් ඇති කරගෙන තිබේ.
මේ වන විට අර්චුනා මන්ත්රීවරයා පිළිබඳව යාපනයේ මන්ත්රීවරු හා රාජ්ය නිලධාරීන් අතර ඇතිව තිබෙන්නේ ඉතාම අප්රසන්න හැගීමක් හා අමුතු චිත්රයකි.
