කීර්ති ප්රනාන්දු –
සිය හිසකෙස් කැරළි ගන්වා සකස් කරගැනීම සඳහා ඊයේ (30) මිනුවන්ගොඩ ප්රදේශයේ රූපලාවන්යාගාරයකට ගිය කාන්තාවකට එම රූප ලාවන්යාගාරයෙන් ගැල්වූ රසායනික මිශ්රණයක් අසාත්මික වීම නිසා සියලුම හිස කෙස් ගැලවී ගොස් තට්ට හිස පමණක් ඉතිරීවීමේ බරපතල තත්ත්වයක් තුළ මේ වනවිට ගම්පහ රෝහලේ ප්රතිකාර ගනිමින් සිටින බව මිනුවන්ගොඩ පොලිසිය අනාවරණය කරයි.
මිනුවන්ගොඩ පොලිිසය පවසන පරිදි සිද්ධිය මෙසේය.
මිනුවන්ගොඩ බොරගොඩවත්ත ප්රදේශයේ 35 හැවිරිදි කාන්තාවක් සිය හිස කෙස් කැරළි ගන්වා සකස් කරගැනීම සඳහා ඊයේ (30) උදේ වරුවේ මිනුවන්ගොඩ බස් නැවතුම්පල ඉදිරිපිට ඇති සණස ගොඩනැගිල්ලේ පිහිටි රූපලාවන්යාගාරයක් වෙත ගොස් තිබේ.
එහිදී හිස කෙස් සකස් කිරීමට රසායනික මිශ්රණයක් මෙම කාන්තාවගේ හිසෙහි ගල්වා තිබේ. ස්වල්ප වෙලාවක් ගතවනවිට ඇයට යම් අපහසුතාවයක් ඇති වී තිබෙන අතර හිසකෙස් අතගාද්දී අහුරු පිටින් ගැලවී අතට එන්නට පටන් ගෙන ඇත.
කාන්තාව වහාම මිනුවන්ගොඩ රෝහලට ඇතුළත් කිරීමෙන් අනතුරුව ගම්පහ රෝහල වෙත ඇතුළත් කර මේ වනවිට ගම්පහ රෝහලේ ප්රතිකාර ගනිමින් සිටී.
සිද්ධිය පිළිබඳව මිනුවන්ගොඩ පොලිසියේ සිදුකළ පැමිණිල්ලකට අනුව ළමා හා කාන්තා කාර්යාංශයේ නිලධාරීන් සහිත පොලිස් කණ්ඩායමක් රූපලාවන්යාගාරයට යන විට එම රූපලාවන්යාගාරය ඉබි යතුරු දමා වසා තිබී ඇත. රූපලාවන්යාගාරය හිමිකාරිය පිළිබඳව පොලිසිය සොයා බලනවිට ඇය ප්රදේශයෙන් පලාගොස් ඇතැයි නිරික්ෂණය වූ බව මිනුවන්ගොඩ පොලිසිය පවසයි.
සිද්ධිය සම්බන්ධව මිනුවන්ගොඩ පොලිසිය අද අධිකරණය වෙත කරුණු වාර්තා කිරීමට නියමිතව තිබේ. රූපලාවන්යාගාරය හිමිකාර තැනැත්තිය අත් අඩංගුවට ගැනීමට මිනුවන්ගොඩ පොලිසිය විමර්ශන ආරම්භකර ඇත.
