ලෝක විවාහක රූ රැජන තෝරන්නෙ ඇමරිකාවේ කැලිෆෝනිය නුවර මිසිස් වර්ල්ඩ් සමාගමය. එම සමාගම වර්ෂ 2020 – 21 වසර සඳහා ලෝක විවාහක රූ රැජන ලෙස තෝරාගෙන සිටියේ අපේ කැරොලයින්ය. කැරොලයින් ජූරිය.
කැරොලයින් කිරුළ අත් හැරියාය. ලංකාවේ විවාහක රූ රැජන තේරීමේ තරගය තුළ සිදුවූ සිදුවීම් මාලාව අවසානයේ ප්රකාශයට පත්වූයේ විවාහක රූ රැජන ලෙස කිරුළු පලන් පුෂ්පිකා ද සිල්වාට පැළඳූ කිරුළ කැරොලයින් ජූරි විසින් ඉවත් කිරීමෙනි. එය විවාහක රූ රැජනකට නුසුදුසු ක්රියාවක් බව විවේචන එල්ල වූයේය.
ඒ අතර කැරොලයින් වීඩියෝවක් නිකුත් කළාය. නිකුත් කර තමන් නිවැරදි බව ලෝකයට කීවාය. අවසානයේ දී ඇය ප්රකාශ කලේ තමන් සාධාරණය වෙනුවෙන් පෙනී සිටිය බවය. යුක්තියේ නාමයෙන් තමන් ඉල්ලා අස්වීමට සූදානම් බවය. එසේ පවසමින් ඇය කිරුළ ඉවත් කළාය.
මේ සංඥාව ඔස්සේ ඇමරිකාවේ මිසිස් වර්ල්ඩ් සමාගම ඇය වැරදිකාරිය බව සඳහනක් නොකර කැරොලයින් ඉල්ලා අස්වූ බව ඔවුන් වෙත දැනුම් දුන් බව ප්රකාශ කළේය. හිස්තැන දෙවැන්නාගෙන් පුරවන බවත් නිවේදනය කළේය. කැරොලයින්ට සුබ පතමින් සුබවාදී ලෙස ප්රශ්නය නිමා කළේය.
මේ අනුව ඉදිරි මාස හත තුළ කැරොලයින් ලෝක විවාහක රූ රැජන ලෙස අත්සන් කර තිබූ සියලු කොන්ත්රාත් වලින් ඉවත් වන්නීය. ලබන දෙසැම්බර් 21 දින කොළඹ දී පැවැත්වෙන 2021 ලෝක විවාහක රූ රැජනට කිරුළු පැළඳීමේ අවස්ථාවද ඇයට අහිමි වන්නේය.
කැරලයින් ජූරි විසින් දැරී 2020 ලෝක විවාහක රූ රැජන කිරුළ එම තරගයේ දෙවැනි ස්ථානය දිනූ අයර්ලන්තයේ කේට් ෂිනයිඩර් වෙත පිරිනැමීමට කටයුතු කරනු ලැබුවේය.
එහෙත් මෙහි ඇති ගැටලුව පෙනෙනවාට වඩා සංකීර්ණය. එහි යථාව පසුගිය සතියේ මෙම තරගයට සහභාගී වී අවසන් වටයට තේරුණු තරගකාරියන් 20 දෙනා මාධ්ය වෙත පැමිණ ප්රකාශ කළේය.
පුෂ්පිකා ද සිල්වා වෙනුවෙන් තරග ඉසවු ඉවත් කිරීම, ඇය විවාහක රූ රැජන කිරීම සඳහා සැලසුම් කරගෙන කටයුතු කිරීම, පුරා වසර හතරක් සැමියාගෙන් වෙන් වී දික්කසාදයේ අවසන් අදියර උසාවියේ පවතිද්දී දික්කසාද තීන්දුව ලබා ගැනීමට නොයා උසාවිය මග හැරීම, ඇතුළු කාරණා ගණනාවක් නිසා සියලු තරගකාරියන් වික්ෂිප්තව සිටි ආකරය හෙළි විය. විවාහ ජීවිතයක් නැති විවාහක රූ රැජන එම තරගය අවසන් වී දික්කසාද සහතිකය ලබා ගැනීමට සූදානම් වී සිටීමේ සදාචාරය පිළිබඳව ඔවුහු ප්රශ්න කළහ.
ඔවුන් කියා සිටියේ කැරොලයින් ජූරි තරගයේ මුල සිටම ඔවුන්ට ශපථ වූයේ කිසිවෙකුට අසාධාරණයක් වන්නේ නම් තමන් ඔවුන් වෙනුවෙන් පෙනී සිටිනබවත් කී ලෙසම ඇය සියල්ල අත්හැර අයුක්තිය හා අසාධාරණය වෙනුවෙන් පෙනී සිටි බවත්ය.
දැවැන්ත දේශපාලන බලයක් සහිතව මේ වනවිට පුෂ්පිකා ද සිල්වා දේශපාලන වේදිකාවේ හැසිරෙමින් සිටින්නීය. ඇයගේ සැමියා වූ තිලංක දාබරේරා සමාජ මාධ්යය ඔස්සේ කියා තිබුණේ දික්කසාද නඩුව අවසන් කිරීමට නොපැමිණෙන පුෂ්පිකා උසාවිය මග හරින බවය.
“ ඇය මාව දාල නොගියා නම් මමත් විවාහක සැමියෙක් වෙන්න තිබුණා.“ ඔහු පවසා තිබිණි.
අසාධාරණයට ලක් වූ බව ප්රකාශිත විවාහක රූ රැජන තරගයේ අවසන් වටයේ තරගකාරියන් පැවැත්වූ මාධ්ය හමුව
මෙයත් කියවන්න….
