ප්රතිශක්තිකරන එන්නතක් යනු කොයි මොහොතකදීවත්, සියයට සීයක් සාර්ථක වන්නක් නොවන බවත්, සංකූලතා, විවිධ බලපෑම් ඇති විය හැකි බවත් එන්නත් ලබාදීම හෙට ආරම්භ කරන කළ ද, එය අවසන් කිරීමට වසර දෙකක් පමණ ගත විය හැකි නිසා එන්නත මගින් වුවද, “ව්යාජ ආරක්ෂාවක්” මවා ගනිමින් කටයුතු කළහොත් සිදු වන්නේ ධම්මික පැණියෙන් සිදුවූ දෙයම බවත් වෛද්ය රසායනාගාර විද්යාඥ වෘත්තියවේදීන්ගේ විද්වත් ආයතනය පවසයි.
අද ආරම්භ වූ මෙම එන්නත්කරණය සරල ක්රියාවලියක් නොවන බව ඔවුන් පෙන්වා දෙයි.
“එය රටේ අස්සක් මුල්ලක් නෑර බෙදා හැරිය යුතුයි. ගබඩා කළ යුතුයි. එන්නත් ලබාදීම සඳහා වෘත්තිකයන් යෙදවිය යුතුයි. විදීමේ අනු පිළිවෙළ සඳහා නිශ්චිතව ලේඛන සකස් කළ යුතුයි
“විදීමෙන් පසු ප්රතිදේහ පරීක්ෂණ සිදුකළ යුතුයි. සංකූලතා ඇති වුවහොත් ඊට සූදානම් විය යුතුයි. මොකද මේ එන්නත විද්දට පස්සේ සංකූලතා ඇති වෙනවද, එන්නත ශරීරයේ වැඩ කරනවද, රුධිරයේ වර්ධනය වන ප්රතිදේහ මොනවද, ප්රතිදේහ වර්ධනය වීමට කොච්චර කල් ගත වෙනවද, එක එක ප්රභේද වලට මොන වගේද හැසිරීමක්ද වැනි කරුණු පිළිබඳව අපි තවම මොකුත් දන්නේ නැහැ. “
“මේ සියල්ල එක රැයෙන් කලහැකි දේවල් නෙවේ. එසේ කිරීමට ගොස් අනවශ්ය අර්බුද ඇති කර ගැනීමේ කලබලයක් හදා ගන්න ලොකු වුවමණාවකුත් අපට නැහැ.“ යැයි වෛද්ය රසායනාගාර විද්යාඥ වෘත්තියවේදීන්ගේ විද්වත් ආයතනයේ සභාපති රවී කුමුදේශ් කියයි.
ලක්ෂ තුනකට එන්නත් ලබාදීම මගින්, කොවිඩ් එකවර පාලනය වන්නේ නැති බවට වූ අවබෝධය සහිතව වසංගතයෙන් ආරක්ෂාවීම සඳහා අප තවදුරටත් දැඩිව විශ්වාස කළ යුත්තේ අවට සිටින පුද්ගලයාගෙන් තමන්ට රෝගය පැමිණීමත්, තමන්ගේ රෝගය අවට සිටින පුද්ගලයාට ලබාදීමත් වළක්වා ගැනීමත් බව කියන වෛද්ය රසායනාගාර විද්යාඥ වෘත්තියවේදීන්ගේ විද්වත් ආයතනය සෞඛ්ය පුරුදු සාමාන්ය ජීවිතයේ කොටසක් ලෙස ක්රියාත්මක නොකර ව්යාජ ආරක්ෂාව පිළිබඳ සමාජ මානයන් නිර්මාණය කිරීම යනු, කොවිඩ් වෛරසයට කකුල් ලබාදීම බව අමතක නොකළ යුතු යැයි කියයි.
