සුනේත්රා ඇතුගල්පුර –
ඡායාරූප – ශෂී සුබ්රමනියම් –
- එක ගවයෙක් හැඩ කරන්න ලංකාවෙ මුදලින් රුපියල් 12 000ක්
- ඇතැමුන් ගවයින් දිනපතා ගව රූප ලාවන්යාගාරයට ගෙනියනවා
- ඇල්ප්ස් කඳු ආශ්රිත ගොවීන්ගෙ ගවයින් රූපලාවන්ය කටයුතු වලට ගෙනියන්නෙ අවුරුද්දකට වතාවයි….
- ගව රූපලාවන්ය කටයුතු කරන්නේ විශේෂිත අට්ටාලයක…
අද අප හමුවීමට යන්නේ මෙතෙක් සති කීපයක් පුරා අප ඔබට තොරතුරු ගෙනා රෙබෙකා හා මාර්ටින් නොවේ. ඔවුන්ගේ ජීවනෝපාය සරි කර ගැනීම සඳහා උපකාරීවන පිරිසකගේ රූපලාවණ්ය ශිල්පියාවය.
විසිපස් හැවිරිදි මාර්කො සිය රූපලාවණ්ය පෙට්ටියෙහි තමන්ට අවශ්ය ආම්පන්න තෝරමින් සිටී.
විදුලි බලයෙන් ක්රියාත්මක වන හිස බූ ගාන මැෂින් කීපයක්, ප්රමාණයෙන් තරමක් විශාල පනා කීපයක් හා ස්ප්රේ වර්ග කීපයක් ඔහු සිය ගව මඩුවෙහි ඉදිරි දොරටුව අසල රඳවා ඇති පෙට්ටියෙන් ඉවතට ගත්තේය .
අද අප විස්තර කරන කථානායකවරයාගේ පාරිභෝගිකයින් වන්නේ ඇතැම්විට කිලෝග්රෑම් හයසියයක් පමණ බර අයෙකි. අඩුම බර ඇති පාරිභෝගිකයා කිලෝග්රෑම් දෙසීයකට වඩා වැඩිය. ඔවුන් අන් කිසිවකු නොව අප මෙතෙක් විස්තර කළ ඇල්ප්ස් ගවයින්ය..
මිනිසුන් හැඩගන්වන රූපලාවණ්ය ශිල්පීන් ගැන අපි ඕනෑ තරම් අසා ඇත්තෙමු. එහෙත් ගවයින් හැඩගන්වන රූපලාවන්ය ශිල්පීන් පිළිබඳව නම් ඔබ අසා නැතිවනන්ට පුලුවන. ඇතමුන් සිය ගවයන් දිනපතා, සතියකට, මසකට වරක් හො වසරකට වරක් රූපලාවණ්ය ශිල්පීන් වෙත යාම පුරුද්දක් කරගෙන තිබේ. එබැවින් බොහෝ රූපලාවණ්ය ශිල්පීන්ට ඔවුන්ගේ පාරිභෝගිකයින් වසරකට කිහිප වරක් මුණ ගැසීම සාමාන්ය දෙයකි. එහෙත් අද අප කතා කරන පාරිභෝගිකයින් ඔහු වෙත එන්නේ ,”වඩාත් නිවැරදිව කිවහොත්, ඔහු වෙත ගෙන එන්නේ වසරකට එක්වරක් පමණි .”
සෑම වසරකම ඔක්තෝම්බර් මාසය සාමාන්යයෙන් මාර්කොට වැඩ අධික කාලයකි. ඒ ඇල්ප්ස් කඳුවැටිවල සිට පහළට පැමිණෙන ගවයින් ගව ප්රදර්ශනය සඳහා ඔක්තෝම්බර් මාසයේදී සූදානම් කෙරෙන බැවිනි. මෙම ගව ප්රදර්ශනයේදී රූප රැජින තෝරන තරගයක දීමෙන් විවිධ අංශ යටතේ ගවයින් තරඟ වලට ඉදිරිපත් කිරීම සිදු කෙරේ. (ගව ප්රදර්ශනය පිළිබඳ විස්තරාත්මක තොරතුරු මීළඟ මීළඟ කොටසින් බලාපොරොත්තු වන්න)
මාර්කෝ වැනි ගව රූපලාවණ්ය ශිල්පීන්ගේ කාර්ය වන්නේ තරග සඳහා ඉදිරිපත් කරන ගවයින් හා එළදෙනුන් අලංකාරවත් කිරිමය. හැඩ ගැන්වීම ය .”ගවයෙකු තරග දිනවීම සඳහා ලස්සන කිරීම විතරක් නෙවෙයි අපේ කාර්ය. මගේ අදහස වන්නේ තරගයකින් දිනන්න බැරි ගවයෙකු මේකප් හා ස්ටයිලින් ( stylin). මගින් දිනවන්න බැහැ. ඒක තමයි මූලික පදනම . එහෙත් අපට පුළුවන් කිසියම් ආකර්ෂණීය බවක් ස්ටයිලින් මගින් ගවයාට ලබාදෙන්න. එය කිසියම් ප්රමාණයකට හේතුවක් වෙනවා, විනිසුරුවන්ගේ ආකර්ෂණය දිනාගන්න “යැයි මාර්කෝ පැවසීය .
මාර්කො ගේ දෛනික ජීවනෝපාය වන්නේ කිරි ගව කර්මාන්තයයි . බොහෝ කිරි ගොවීන් මෙන් මාර්කො ඒ සඳහා විශේෂ අධ්යාපනයක් ලබා ගෙන තිබේ. කිරි ගොවි කර්මාන්තය සිය පරම්පරාවෙන් උරුම වූ වත් සෑම කිරි ගොවියකු ම හැකි පමණින් ඒ පිළිබඳ මූලික අධ්යාපනය ලැබීම සිදු කරයි. එහෙත් ගව රූපලාවන්ය සඳහා එවැනි අධ්යාපන වැඩපිළිවෙලක් ස්විට්සර්ලන්තයේ නොමැත. ඊට උනන්දුවක් දක්වන්නන් සිදුකරන්නේ ජේෂ්ඨයෙකු ළඟට ගොස් ඉගෙන ගැනීම හෝ තනිවම තමන් සතු ගවයින් අලංකාරවත් කර ඉගෙන ගැනීමය.
“ගවයෙකු ස්ටයිලින් stylin කිරීමේදී අපගේ ප්රධානතම අවධානය යොමුවන ස්ථාන කීපයක් තියෙනවා . ඒ තමයි පිටකොන්දේ රෝම කූප අඟල් කිහිපයක ප්රමාණයකට රඳවා ඉතිරි ප්රමාණය අඩු කිරීම. වලිගය අලංකාරවත් කිරීම හා කුර වර්ණවත් කිරීමට ඊලඟට අවධානය යොමු වෙනවා. ඊට අමතරව ගවයින්ගේ මතුපිට සමට කිසියම් ප්රමාණයක දීප්තියක් ගෙන දීම සඳහා අප ස්ප්රේ වර්ග පාවිච්චි කරනවා.” යැයි මාර්කො සිය වෘත්තිය වෘත්තියේ ස්වභාවය පැහැදිලි කළේය.
ගවයින් අලංකාරවත් කිරීම ගව ප්රදර්ශනය පැවැත්වෙන දින හෝ ඊට දින කීපයකට පෙර සිදු කිරීම සාමාන්ය සිරිතයි. එහෙත් ඊට සතියක කාලයක් තුළ කීප වතාවක් ගවයකු නාවා තිබීම සිය කාර්යය පහසු කරවන්නක් බව මාර්කො ගේ අදහසයි. පිරිසුදු සම හා රෝම කූප සමගින් හැඩගැන්වීමේ කටයුතු කිරීම පහසු බව ඔහුගේ මතයයි.
එමෙන්ම එක් ගවයකු හැඩගැන්වීම සඳහා ස්විස් ප්රෑන්ක් හැටක් පමණ අය කෙරේ. එය ශ්රී ලංකා මුදලින් රුපියල් 12,000 කට ආසන්නය. එක් ගවයකු හැඩගැන්වීමට සාමාන්යයෙන් විනාඩි විස්සත් තිහත් අතර කාලයක් ගතවේ.
සාමාන්යයෙන් අප රූපලාවණ්ය කටයුතු සිදු කිරීමේදී සංයමයකින් සිටීම රූපලාවණ්ය ශිල්පියාගේ කාර්යය පහසු කරවන අනිවාර්ය දෙයකි. ගවයින් සම්බන්ධයෙන්ද රූපලාවන්ය කාර්යයේ දී ද එය එසේමය. එහෙත් කිලෝග්රෑම් හයසියයක් පමණ බර ඇති සද්දන්තයකු කිලෝ ග්රෑම් 60ක් පමණ බරැති මාර්කොට මේච්චල් කිරීම පහසු කටයුත්තක් නොවේ. එබැවින් ගවයින් ස්ටයිලින් කිරීම සඳහාම සකස් කළ විශේෂිත අට්ටාලයක් මාර්කො ළඟ මෙන්ම සෑම ගව රූපලාවණ්ය ශිල්පියකු ළඟ තිබිය යුතු අනිවාර්ය දෙයකි .
රූපලාවණ්ය ශිල්පියෙකු ලඟට ගොස් පැමිණෙන බොහෝ දෙනෙකුගේ සතුට හා ආත්ම තෘප්තිය ඔවුන්ගේ ඇස් සහ මුහුණ දෙස බැලීමෙන් වටහාගත හැකිය. එහෙත් එය ගවයින්ගෙන් බලාපොරොත්තු විය නොහැකි හැඟීමකි. ඒ වෙනුවට එය දැකගත හැක්කේ ගවයාගේ හිමිකරුගේ මුහුණේ හා දෑස් වලිනි .