අපේක්ෂා කළ ශ්රමදානයට බහුතර ජනතාව සහභාගී වාර්තාගත ජයග්රහණයක් ලබා දී ඇති බැවින් පත් වූ මැති ඇමතිවරුන් ඉදිරියේ දැන් වැඩ පෙන්වා වාර්තගත වීමේ අභියෝගයක් ඇති බව මල්වතු පාර්ශවයේ මහා නායක අතිපූජ්ය තිබ්බටුවාවේ ශ්රී සිද්ධාර්ථ සුමංගල නා හිමියෝ පැවසූහ.
උන් වහන්සේ අවධාරණයෙන් පෙන්වා දුන්නේ මින් පෙර කිසිදු පක්ෂයකට රටේම ජනතාවගේ විශ්වාසය දිනා ගැනීමට නොහැකි වූ බවත් මෙවර මෙවර එම තත්ත්වය ද වෙනස් කරමින් ජාතික ජනබලවේගයේ ජයග්රහණයට උතුරේ ජනතාව ද දායක වී තිබෙන්නේ විශාල බලාපොරොත්තු කන්දරාවක් සමඟ බවත් මහා නායක හිමියෝ පෙන්වා දුන්හ.
මල්වතු මහනාහිමියන් එසේ පැවසුවේ විදේශ කටයුතු, විදේශ රැකියා සහ සංචාරක අමාත්ය විජිත හේරත්, කෘෂිකර්ම,පශු සම්පත්, ඉඩම් සහ වාරිමාර්ග ඇමැති කේ.ඩී ලාල්කාන්ත පසුගිය සිකුරාදා 22 දා පස්වරුවේ මල්වතු මහා විහාරයට ගොස් උන්වහන්සේ බැහැදැක ආශිර්වාද ලබාගත් අවස්ථාවේදී ය.
එහි දී මල්වතු මහනායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියන් මෙසේ ද පැවසූහ.
පසුගිය පාලන කාලයන් තුළ රටේ සිදුවූ දේවල් හොඳින් දැන සිටි මේ රටේ ජනතාව ජාතික ජනබලවේගයට වාර්තාගත ජයග්රහණයක් ලබා දී තිබෙනවා. පත් වූ මැති ඇමැතිවරුන්ට දැන් තිබෙන්නේ වැඩ කිරීමෙන් වාර්තා තබා පෙන්වීමේ අභියෝගයයි. ශ්රමදානයට මේ රටේ බහුතර ජනතාව සම්බන්ධ වී තිබෙන බව ප්රතිපල අනුව පේනවා.ඉතිහාසයේ ප්රථම වතාවට මැතිවරණ දිස්ත්රික්ක 22 න් 21 ක්ම ජයග්රහණය ඔබලාට ලබා දී තිබෙනවා. ජනතාව මේ ආකාරයෙන් ඡන්දය පාවිච්චි කර තිබෙන්නේ විශාල බලාපොරොත්තු කන්දරාවක් සමඟයි. ඒවා ඉටු කිරීමේ වගකීම තමයි දැන් ආණ්ඩුව ඉදිරියේ තිබෙන්නේ. සියලු දෙනා ඒ සඳහා කැපවිය යුතුයි.
