කළුතර ප්රදේශයේ දී සංචාරකයෙකු විලි ලජ්ජා නැති ලෙස රවටා උළුඳු වඩයක් සහ ප්ලේටින්යක් රුපියල් දහසක මුදලකට අලෙවි කරන්නට ගොස් රටටම විශාල අපවාදයක් ගෙනා 60 හැවිරිදි වියපත් ගොබ්බයා මොරගොල්ල සංචාරක පොලිසිය විසින් අත් අඩංගුවට ගෙන තිබේ.
මෙම සිද්ධිය සම්බන්ධයෙන් මොරගොල්ල සංචාරක පොලිසියට විද්යුත් තැපෑලෙන් පැමිණිල්ලක් අනුව මේ තැනැත්තා අත් අඩංගුවට ගෙන ඇත.
මෙම සිද්ධිය සිදුවී තිබුණේ 2024 පෙබරවාරි 09 වැනි දිනය. සිද්ධියට මුහුණ දෙන්නේ රටේ ස්වරූපය සම්බන්ධව සංචාරක වීඩියෝවක් සකස් කරමින් සිටි ටිම් ටෙන්ට් නැමැති බෙල්ජියම් ජාතිකයෙකි.
පාරේ ගමන් කරමින් පරිසරය රූගත කරමින් ගමන් කරන විදේශිකයා හෝටලය තුළට කැඳවාගෙන ගොස් උළුඳු වඩයක් සහ ප්ලේන්ටියක් ඔහුට ලබා දී තමන් බෞද්ධයෙක් බවද කියන මේ ප්රාථමික වෙළෙන්දා රුපියල් දහසක මිලක් නියම කර රුපියල් දෙසීයක් අඩු කර රුපියල් 800ක මුදලක් ඔහුට නියම කරන්නේය.
මෙහිදී ටිම් ටෙන්ට් කරන්නේ තමන්ව රැවටූ ආකාරය ලෝකයට පෙනෙන සේ ඔප්පු කිරීමය. මග යන පුද්ගලයෙකුගෙන් වඩේ ඒකක මිල විමසන ඔහු වෙළෙන්දාට කියන්නේ අවංක වන ලෙසය.
“ඔබ අවංක නෑ…. ප්රශ්නය මුදල නෙමෙයි. මිලක් සඳහා මූලධර්මයක් තිබිය යුතුයි…” ටෙන්ට් කියන්නේය.
මේ වීඩියෝව ලෝකයට මුදා හැර තිබිණි. රටේ සමාජ මාධ්ය ඔස්සේ වීඩියෝව ප්රචාරය වන්නේ දැඩි විවේචනයක් සමගිනි.
ඒ් සමග ලැබෙන පැමිණිල්ලක් මත මොරගොල්ල සංචාරක පොලිසිය විසින් පලාතොට පදිංචි මෙම පුද්ගලයා අද (18) අත් අඩංගුවට ගෙන කළුතර පොලිසිය වෙත භාර දී ඇත.
සැකකරු ප්රදේශයේ දන්නා හඳුනන අයකු බවත් එම ආපනශාලාවට පැමිණෙන විදේශිකයන් රවටා මුදල් ලබාගෙන ඇති බවත් විමර්ශනවලදී අනාවරණය වී ඇත.
සැකකරු හෙට කළුතර මහේස්ත්රාත් අධිකරණයට ඉදිරිපත් කිරීමට නියමිතයි.
මින් පෙර සමාජ මාධ්ය මගින් හෙළිදරව් කළ අලුත්කඩේදි විදේශිකයෙකුට අඩම්තේට්ටම් කළ චන්ඩි කොත්තුවා ද පොලිස් අත් අඩංගුවට පත් වූයේය. දැන් ඒ මුග්ධයාත් ඉන්නේ ඇප පිටය.
මෙවැනි කපුටන් වැනි ප්රාථමික මිනිසුන් සම්බන්ධව නීතිය ක්රියාත්මකවීම ඉතා සාධනීය තත්ත්වයක් බව සංචාරක ක්ෂේත්රයේ නියුතු පිරිස් පවසති.
