මනම්පිටිය නිමල් ජයරත්න –
මඩකලපුව දිස්ත්රික්කයේ යුද්දෙට පෙර සීයට එකොළහක් සිටි සිංහල පවුල් අද වන විට සියයට දශම එක දක්වා අඩු වී ඇති බවත්, දිස්ත්රික්කයේ සිංහල ජනතාවට විශාල වශයෙන් අසාධාරණයක් සිදුව තිබෙන බවත් නැගෙනහිර පලාත් ආණ්ඩුකාර අනුරාධා යහම්පත් සඳහන් කළාය.
නැගෙනහිර පළාතේ අවතැන් වූ පවුල් 37000 ට පමණ ඉඩම් නැවත ලබා දී ඇති බවත්, ඉන් පවුල් 36,000 දමිළ පවුල් බවත්, සිංහල පවුල් අසූ දෙකකටත්, මුස්ලිම් පවුල් 110 කටත් ඉඩම් ලබාදී ඇති බවත් ආණ්ඩුකාරවරිය පැවසුවාය,
මඩකලපුව කල්කුඩා සිරි සීලාලංකාර සිංහල විද්යාලය ඊයේ (24) සවස විවෘත කිරීමේ අවස්ථාවට එක්වීමෙන් අනතුරුව මාධ්යවේදීන් අසන ලද ප්රශ්න වලට පිළිතුරු දෙමින් ඇය ඒ බව සඳහන් කළාය.
නැගෙනහිර පළාතේ අන්තවාදී පිරිස් විසින් මේ වෙනවිට සිදුකරන පුරාවස්තු සහ ඉඩම් කොල්ලය පිළිබඳව මාධ්යවේදීන් ආණ්ඩුකාරවරියගෙන් අසනලද ප්රශ්න වලටද මෙලෙස පිළිතුරු දුන්නාය.
මුහුදු මහා විහාර භූමියේ මුස්ලිම් පවුල් 250ක් පදිංචි වෙලා ඉන්නවා. නමුත් අපි ඒ අය ඒ තැන්වලින් ඉවත් කරලා නෑ. අපි කළේ පුරාවිද්යා භූමියක් ලෙස වෙන් කළා පමණයි . අපි පුළුවන් තරම් ජනතාවට ඉඩම් ලබා දෙනවා කෘෂිකර්ම කටයුතු සඳහා. අපි කිසිම භේදයක් නොමැතිව සිංහල දමිළ මුස්ලිම් ජනතාව සඳහා ඉඩම් ලබා දීලා තියෙනවා කෘෂිකර්මාන්තය සඳහා. අවුරුදු 30ක යුද්ධය නිසා ඉඩම් අහිමි පවුල් තාම ඉන්නවා.
යුද්දෙන් වැඩිපුර පීඩා වින්දෙ දෙමළ පවුල්. ඒ නිසා ඒ අයට වැඩිපුර ඉඩම් ලබාදීම සාධාරණයි. මධ්යම රජය හරහා අපි මානුෂීය පදනම සැලකිල්ලට ගෙන සියලු දෙනාටම සමානව ඉඩම් ලබාදීමට තවදුරටත් කටයුතු කරනවා. එවගේම බොහෝ සිංහල පවුල් වලට අසාධාරණයක් වෙලා තියෙනවා. ඒ අය මං ගාවට ඇවිල්ලා විසඳුම් ඉල්ලුවොත් මම බොහොම නිර්භීතව ඒවාට විසඳුම් ලබා දීමට මැදිහත් වෙනවා. නැගෙනහිර පළාතේ ගැසට් කරපු ඉඩම්වලට වඩා නොකරපු පුරාවස්තු භූමි විශාල වශයෙන් තිබෙනවා. ඒවා අපේ රටට විශාල සම්පතක්. නැගෙනහිර පළාතේ තිබෙන පුරාවිද්යා ස්ථාන සංචාරක කර්මාන්තයටත් විශාල සම්පතක්.
අපි ඒවා පලමුව සංරක්ෂණය කරලා රටේ සම්පතක් ලෙස බාර ගන්න එක තමා මේ කරන්නේ. ඒවා අපි හඳුනා ගන්න ගියාම විවිධ දේශපාලන මතිමතාන්තර තියෙන අය අපිට චෝදනා කරලා තියෙනවා.“
නැගෙනහිර පලාත් ආණ්ඩුකාර අනුරාධා යහම්පත් පැවසුවාය.
