යන්ත්‍ර දෙකම අක්‍රීයයි… කරාපිටිය රෝහලේ පිළිකා රෝගීන්ගේ විකිරණ ප්‍රතිකාර මුලුමනින්ම ඇනහිටී!

ශ්‍රියානි විජේසිංහ –

• විකිරණ ප්‍රතිකාර ආරම්භ කළ පසු දිගටම එම ප්‍රතිකාර පවත්වාගෙන යා යුතුයි… දින 04ක් තිස්සේ ලීනියර් ඇක්සලරේටර් ප්‍රතිකාර යන්ත්‍රය සහ කොබොල්ට් විකිරණ ප්‍රතිකාර යන්ත්‍ර අක්‍රීයයි… රෝගී ජීවිත බරපතල අනතුරක….

ගාල්ල ජාතික රෝහලේ පිලිකා රෝගීන්ගේ විකිරණ ප්‍රතිකාර සම්පූර්ණයෙන්ම ඇණහිටීම හේතුවෙන් රෝගීන්ගේ ජිවිත දැඩි අනතුරකට පත්ව ඇතැයි රජයේ විකිරණ තාක්ෂණවේදීන්ගේ සංගමය සඳහන් කරයි.

පිළිකා රෝගීන්ට විකිරණ  ප්‍රතිකාර ලබා දෙන ලීනියර් ඇක්සලරේටර් ප්‍රතිකාර යන්ත්‍රය සහ කොබොල්ට් විකිරණ ප්‍රතිකාර යන්ත්‍ර පසුගිය 12 වෙනිදා සිට   බිඳවැටී ඇති බව සංගමයේ සභාපති චානක ධර්මවික්‍රම  සඳහන් කරයි.

පිලිකා  රෝගීන්ගේ විකිරණ ප්‍රතිකාර සිදුකිරීමේ දී එම ප්‍රතිකාරය දින 5 ත් 35 ත් අතර කාලයක් දක්වා දිනපතා සිදුකරනු ලබන බවත්  එම ප්‍රතිකාර සිදුකළයුතු දින ගනණ    තීරණය වන්නේ රෝගියාගේ තිබෙන පිලිකාවේ ස්වභාවය සහ එහි තත්වය අනුව බවත්හෙතෙම පෙන්වාදේ.

ලීනියර් ඇක්සලරේටර් විකිරණ ප්‍රතිකාර යන්ත්‍රය මගින් දිනකට පිලිකා රෝගීන් 100 ක් සහ කොබෝල්ට් විකිරණ ප්‍රතිකාර යන්ත්‍රය මගින් දිනකට රෝගීන් 25 ත් 30ත් අතර ප්‍රමාණයකට ප්‍රතිකාර කිරීම   සිදුකරමින් පැවතුන බවද පැවසේ.

කෙසේ නමුත් පිළිකා රෝගීන්ගේ විකිරණ ප්‍රතිකාර ආරම්භ කළ පසු එම ප්‍රතිකාර සේවාව අඛණ්ඩව සිදුකළ යුතු අතර මේ ලෙස යන්ත්‍ර බිඳ වැටීම හේතුවෙන් රෝගීන්ගේ ප්‍රතිකාර අඩාල වීම බරපතල ගැටලුවක් වී ඇත.

විකිරණ තාක්ෂණවේදීන් විසින් මෙම බිඳවැටීම් සම්බන්ධයෙන් අදාළ සේවා සපයන සමාගම සහ සෞඛ්‍ය අමාත්‍යාංශයේ අදාළ බලධාරීන් දැනුවත් කර ඇති අතර මේ වනතුරුත් එම යන්ත්‍ර යථාවත් කිරීම සිදුවී නොමැති බවත්  ලීනියර් ඇක්සලරේටර් විකිරණ ප්‍රතිකාර යන්ත්‍රය බිඳවැටීම යථාවත් වීම ප්‍රමාද වීම පිටුපස එම යන්ත්‍රයට අදාළ සේවා ගිවිසුම්ගතවීම  වේලාවට සිදු නොකිරීම හේතු වී ඇති බවත් සංගමය පෙන්වාදේ.

මෙම යන්ත්‍ර මිලදී ගැනීම් සහ නඩත්තුවට සම්බන්ධ ගිවිසුම් ගතවීමේ දී  තාක්ෂණික කමිටුවලට විකිරණ තාක්ෂණවේදී නිලධාරියෙකු වූ සම්බන්ධ කරගෙන නොමැති අතර මේ පිළිබඳව ද සංගමය සෞඛ්‍ය බලධාරීන්ට දැනුවත් කළද එම තත්ත්වය නිවැරදි කිරීමට කිසිදු සෞඛ්‍ය බලධාරියෙකු කටයුතු කර නොමැති බව සභාපතිවරයා පවසා සිටියි.