අද මෙල්බර්න් හි පැවැත්වුණු ලෝක කුසලාන තරඟාවලියේ ශ්රී ලංකාව හා නැමීබියාව අතර පැවැත්වුණු තරඟයේදී ශ්රී ලංකාව පරාජයට විය. ඒ සම්බන්ධයෙන් නායක දසුන් ශානකට ‘නිව්ස් වයර්’ වෙබ් අඩවිය ප්රශ්නාවලියක් ඉදිරිපත් කර තිබිණි. මේ එම ප්රශ්න 09ට දසුන් දුන් පිළිතුරුය.
ප්රශ්නය – ලෝක කුසලාන තරඟාවලියේ පළමු තරඟය හොඳ එකක් වුණේ නෑ.. ඔබ කොහොමද තරඟය තක්සේරු කරන්නේ? ඇත්තටම කොහෙද වැරදුණේ..?
පිළිතුර – මේක අපේ පළවෙනි තරඟය. මම හිතන්නේ අපි ඒ ගැන කනස්සල්ලට පත්වෙන්න ඕනේ නෑ.. අපි කනස්සල්ලට පත් වෙන්න ඕනේ අපි සෙල්ලම් කරපු විදිය ගැන. මම හිතන විදියට අපි මීට වැඩිය හොඳ කණ්ඩායමක්. නැමීබියාවේ පන්දු යැවීම ගත්තාම එයාලා හොඳ පන්දු යැවීමක නිරත වුණා.. අපේ පන්දු යවන්නන්ට ඒක කරන්න බැරි වුණා.
මම හිතන්නේ අපි ඉක්මණින් ඉගෙනගෙන ඊළඟ තරඟයේදී හොඳ තරඟයක් දෙන්න ඕනේ..
අනිත් දේ තමයි පිතිකරණය. අපි පවර්ප්ලේ එකේදී කඩුළු තුනක් අහිමි කර ගත්තා. ඒ වගේ තත්ත්වෙක 150ට වැඩි ලකුණු සංඛයාවක් හඹා යෑම ලේසි නෑ.
මම හිතන්නේ සියලුම ගෞරවය හිමිවෙන්න ඕනේ නැමිබීයානු ක්රීඩකයින්ට වගේම එයාලගේ ක්රීඩා විලායට.
ප්රශ්නය – ඔබේ පන්දු යවන්නන් මුල් පන්දුවාර 15 ඉතා හොඳින් ක්රීඩා කළා. ඒත් ටිකෙන් ටික පන්දු යැවීම මන්දගාමී වුණා.. අන්තිම පන්දුවාර හතරේදී මොකද වුණේ..?
පිළිතුර – මම හිතන්නේ කෙටි සීමාවන් සමඟ ඔවුන් ඕනෑවට වඩා උත්සාහ කළා. ඔවුන් දිගටම නිවැරදි තැන පන්දුව පතිත කරලා කඩුල්ලටම බෝලය යැව්වා නම් මීට වැඩිය තත්ත්වය වෙනස් වෙන්න තිබුණා. නැමීබියා පන්දු යවන්නන් ඒක කලා..
ප්රශ්නය – ළකුණු 93කදී නැමීබියාවේ කඩුළු හයක් දැවී ගිහින් තිබුණා. ඊට පස්සේ ඔවුන් ලකුණු 70ක් එකතු කර ගත්තා. ඒ වෙලාවේදී පන්දු යැවීමේ සිද්ධ වුණේ මොකක්ද..?
පිළිතුර – හයවෙනි කඩුල්ල බිඳ වැටුණට පස්සේ අපිට කරන්න තිබ්බේ ඊළඟ කඩුල්ල දවා ගන්නයි. මම හිතන්නේ අපේ පන්දු යවන්නන් කඩුලු දවාගන්න පන්දු යැව්වේ නෑ. අත්දැකීම් සහිත ක්රීඩකයින් විදියට අපි අවධානය යොමු කරන්න ඕනේ ඒ කරුණු ගැන. මම හිතන්නේ හැම කෙනෙක්ම අතලොස්සක් ක්රීඩා කරලා තියෙන නිසා පන්දුවට පහර දෙනවාට වැඩිය ඉක්මණට කඩුලු දවාගන්න ඉගෙන ගන්න ඕනේ.. අපි හතරේ හයේ පහරවල් ගහන්න පුළුවන් විදියට දුර්වල පන්දු ගොඩක් දැම්මා.
ප්රශ්නය – ප්රේක්ෂකයෝ හිතනවා පැරදුණාට කමක් නෑ. දැන් කණ්ඩායමට පුළුවන් ඕස්ට්රේලියාව, එංගලන්තය හා නවසීලන්තේ වගේ කණ්ඩායම් මඟ ඇරලා ඉන්දියාව, පාකිස්ථානය, බංග්ලාදේශය හා දකුණු අප්රිකාව සමඟ සෙල්ලම් කරන්න කියලා. ඔබ ඒ වගේ පියවරකට ලෑස්ති ද..?
පිළිතුර – අපි ඉස්සරහදී සෙල්ලම් කරන සමූහය මොකක්ද කියලා අපි හිතන්නේ නෑ. මොකද ඊට කලින් ඒ සමූහයන්වලට එන්න අපි තරඟ දෙකක් දිනන්න ඕනේ. අපේ සම්පූර්ණ අවධානය තියෙන්නේ ඒ තරඟ දෙක ගැනයි. ඊළඟ වටයට තේරුණාට පස්සේ අපිට ඒවාට ගැලපෙන්න සැලසුම් කර ගන්න පුළුවන්..
ප්රශ්නය – දසුන් අපිට කියන්න පුළුවන් ද ලහිරු කුමාර වෙනුවට ප්රමෝද මධුෂාන් වගේ කෙනෙක් තෝරා ගත්තේ ඇයි කියලා
පිළිතුර – දුෂ්මන්ත චමීරගේ පන්දු යැවීම ගැන මම ඇහුවොත් ඔයාලා හැමෝම ඒ ගැන දන්නවා. එක ජාත්යන්තර තරඟයක්වත් ක්රීඩා නොකර කණ්ඩායමට පරක්කු වේලා ආව ක්රීඩකයින් දෙදෙනෙක් ආසියානු කුසලාන අවසන් තරඟවලදී ප්රමෝද් මදුෂාන් හරි දිල්ෂාන් මදුෂංක හරි ක්රීඩා කරපු විදියට ක්රීඩා කරයි කියලා හිතන්න බෑ. ඒ වගේම තමයි ඔයා මගෙන් අහන්න පුළුවන් ඩිල්ෂාන් අනතුරකට මූණ දීලා ඉද්දී ඇයි මම ප්රමෝද්ව තියා ගත්තේ, දිල්ෂාන් මධුෂංක එළියේ තියලා ඇයි ළහිරුව ඇතුළට ගත්තේ කියලා. අන්න එතකොට අපිට ඒ ගැන තර්ක කරන්න පුළුවන්.
ප්රශ්නය – ශ්රී ලංකා ප්රේක්ෂකයින් විශාල සංඛ්යාවක් අද හිටියා. එයාලා ගෙවල්වලට ගියේ බලාපොරොත්තු කඩවෙලා. නැමීබියාව වගේ රටකට එරෙහිව ජයග්රහණය කරන්න බැරුව නෙදර්ලන්තයට හරි යූඒඊවලට හරි එරෙහිව දිනන්න පුළුවන් ද කියලා එයාලා හිතයි.
පිළිතුර – හැමෝටම ඕනේ ජයග්රහණය. අපි කොහෙ ගියත් අපේ ප්රේක්ෂකයින් අපිට සහය දක්වනවා.. විශේෂයෙන් මෙල්බර්නවල ලොකු පිරිසක් හිටියා. අපිට කරන්න පුළුවන් දේ තමයි ඊළඟ තරඟ දෙක ජයග්රහණය කරන එක. ඒ තරඟ දෙකේදී හොඳ තරඟයක් දෙන්න අපි බලාපොරොත්තු වෙනවා..
ප්රශ්නය – ඔබේ සූදානම් වීමේ ගැටළුවක් නිසා මෙහෙම තත්ත්වයක් ඇති වුනා කියලා හිතනව ද?
පිළිතුර – ඇත්තටම නැහැ. අපි මෙහෙ ඉන්නේ ඔක්තොම්බර් 2 ඉඳලා. අපි ගොඩක් හොඳට සූදානම් වුණා.. ඒත් අපේ සැලසුම් වැඩ කළේ නෑ. අපිට ඒ ලකුණු ප්රමාණය ඉක්මවන්න බැරිවුණේ ඒකයි.
ප්රශ්නය – පහුගිය කාලේදී ශ්රී ලංකා කණ්ඩායම ඉතා හොඳ කණ්ඩායමක් කියලා පෙන්නුවා. රාජපක්ෂටයි ඔබටයි ලොකු වගකීමක් තිබ්බා. පහුගිය තරඟ නමයක දහයකදීම අසාර්ථක වුණු ගුණතිලකට ඉහලින් අත්දැකීම් බහුල දිනේෂ් චන්දිමාල් වගේ කෙනෙක් හිටියා නම් මේ වගේ අධි පීඩනයක් සහිත තරඟයකදී ඔබට හොඳ සහයක් වෙන්න තිබ්බා නේද?
පිළිතුර – මම හිතන්නේ ඔබ කතා කරන්නේ “නම්“ ගැන. “නම් “ ගැන කතා කරනවා නම් අපේ රටේ ඕනේ තරම් කට්ටිය ඉන්නවා. ඒත් මේක එක පුද්ගලයෙකු හෝ පුද්ගලයින් දෙන්නෙක් ගැන දෙයක් නෙමෙයි. සම්පූර්ණ කණ්ඩායමක් ගැන. අපේ රටේ චන්දිමාල්, ඇන්ජලෝ වගේ ගොඩක් අය ඉන්නවා. ඒත් මේ වෙලාවේ අපේ සංචිතයෙ ඉන්න හොඳම විකල්පය තමයි චරිත් අසලංක. ඒ නිසා අපි කරන්න ඕනේ ඔහුව පැත්තට ගෙන ඉදිරි තරඟවලදී හොඳ දස්කම් දැක්වීමට වග බලා ගන්න එකයි.
