මනම්පිටිය නිමල් ජයරත්න –
මෙවර යල කන්නයේ වී නිෂ්පාදනය සඳහා වැයකල මුදලට අනුව ලාභයක් ලබා ගැනීමට රජය විසින් වී කිලෝවක් සඳහා නියම කරනු මිල සාධාරණ නො වන බවත්, අවම වශයෙන් වී කිලෝවක් සදහා රුපියල් 200 ක් මිළකටවත් ලබාදිය යුතු බවත් පුලතිසි ගොවි වෙළෙඳ පාරිභෝගික හවුල පවසයි.
අද (21) පෙරවරුවේ වැලිකන්දේ දී මාධ්ය හමුවක් පවත්වමින් ඔවුන් සඳහන් කළේ සෑම නිශ්පාදනයකම මිල නිශ්පාදකයා විසින් තීරණය කළත් එම අයිතිය වී ගොවියා සතුව නැති බවය.
පුලතිසි, ගොවි, වෙළඳ, පාරිභෝගික හවුලේ අනුශාසක, දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාලංකාර නාහිමියන් විසින් මෙම මාධ්ය හමුව කැඳවා තිබිණි,
මෙවර යල කන්නයේ නාඩු වී කිලෝවක් සඳහා රුපියල් 120 ක් ද, සම්බා වී කිලෝවක් සඳහා රුපියල් 125ක්ද, කීරි සම්බා කිලෝවක් සඳහා රුපියල් 130 කද රජය විසින් නියම කර තිබිණි.
අක්කර දෙකහමාරක් වී වගා කර වි අස්වනු මිලදී ගැනීම දක්වා ගොවියාට රුපියල් ලක්ෂ තුනහමාරක්, හතරක්, පමණ මුදලක් පමණ වැය වී ඇති බැවින් රජය විසින් වී සඳහා නියම කරන ලද මුදලින් මෙවර යල කන්නය යන්නේත් අතේ පාඩුවට බව ගොව නියෝජිතවරු කාරණා සහිතව පෙන්වා දුන්හ.
මෙම මාධ්ය හමුවේදී අදහස් දැක්වූ පුලතිසි, ගොවි, වෙළෙඳ, පාරිභෝගික හවුලේ අනුශාසක දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාලංකාර නාහිමියෝ මෙලෙස සඳහන් කළහ.
“අද පවතින මිල ගණන් අනුව ගොවියාට අක්කර දෙකහමාරක් වී වගා කිරීම සඳහා රුපියල් ලක්ෂ 3 ක්, 4ක් පමණ මුදලක් වැය වෙනවා. කෘමිනාශක වල්නාශක ඩීසල් ගණන් අහස් උසට නැගල. මෙවර යූරියා පොහොර මිටි දෙකක් ලබා දුන්නා. නමුත් ගොවියාට අක්කර දෙකහමාරකින් ලබා ලබාගන්න පුළුවන් වන්නේ වී කිලෝ 3000ක්, 3500 ක් විතර ප්රමාණයක්, ගොවියා ආහාරයට වී කිලෝ 1000 ක් මාස හයට තබා ගත්තොත් වී කිලෝ 2000 පමන තමයි ඉතිරි වෙන්නේ.
වී කිලෝ 2000 රුපියල් 120 ගානේ දුන්නොත් ගොවියගේ අතට ලැබෙන්නේ රුපියල් 2,40,000 ක් පමණ, මුදලක්, එහෙම වුනොත් ගොවියාට අතින් පාඩුයි, ඒ නිසා මම මහවැලි බී කලාපයේ ගොවීන් සහ සමස්ත ගොවීන් වෙනුවෙන් රජයෙන් ඉල්ලන්නේ අඩුම තරමේ වී කිලෝවක් සඳහා පාලන මිලක් දාලා රුපියල් 200ක් වත් නියම කරන්න කියලා. එහෙම කළොත් අපිට හාල් පාරිභෝගිකයන් ආරක්ෂා කරගනිමින් හාල් කිලෝ එකක් රුපියල් දෙසිය 250කට අඩුවෙන් ලබාදීමේ හැකියාවක් තිබෙනවා.“
අද හාල්වලින් වැඩිපුර ලාභ උපයන්නේ කළුකඩ හාල් මුදලාලිලා. මේක අසාධාරණයි. ඒ නිසා වී ගොවියා වෙනුවෙන් ජාතික ප්රතිපත්තියක් සකසා වී ගොවියාට සහනයක් ලබා දෙන්න කියලා ඉල්ලීමක් කරනවා. අද අපි දානය වළඳලා මේ පන්සල් දියුණු කරන්නේ මේ ප්රදේශයේ අසරණ ගොවි ජනතාව හින්දා. ඔවුන් දුක් මහන්සියෙන් වී වගා කරලා ගන්න ආදායමෙන් තමා රටේ ගොඩක් වැජඹෙන්නේ. ඒ නිසයි අපි මෙව්වට හඬක් නගන්නේ“ යැයි දිඹුලාගල රාහුලාලංකාර නාහිමියෝ සඳහන් කළහ.
