කීර්ති ප්රනාන්දු –
රාජ්ය දේපල පරිහණය කරමින් රජයට විරෝධතා දක්වන බව පවසා මිනුවන්ගොඩ ගෝඨාගෝගම ශාඛාවක් පිහිටවු විරෝධතා කරුවන්ට විදුලිය ලබා දුන්නේ යැයි චෝදනා කර නගර සභාවට අයත් කඩ කාමර දෙක්ක සීල් තැබීමට අද මිනුවන්ගොඩ නගරසභාව කටයුතු කර ඇත.
එමෙන්ම විරෝධතාවය පවත්වන මිනුවන්ගොඩ තුරුවදුල උද්යානය අවට ඇති සියලුම විදුලි බුබුලුවල වයර් ගලවා විදුලිය විසන්ධි කිරීමට ද නගරසභා සභාපතිගේ උපදෙස් පිට මිනුවන්ගොඩ නගරසභාව කටයුතු කර තිබේ.
මේ සම්බන්ධව අප කළ විමසීමක දී මිනුවන්ගොඩ නගරසභාවේ සභාපති නීල් ජයසේකර ප්රකාශ කළේ රජයේ දේපල යොදා ගනිමින් රජයටත් ජනාධිපතිවරයාටත් එරෙහිව උද්ඝෝෂණ කිරීමට ඉඩ දිය නොහැකි බවය.
“ බලන්ඩකො ඒ මිනිස්සු අතේ තියන දේවල්.. ස්පීකර් බැඳගෙන කෑ ගහනවා. මොනවද මේ විකාර. ගෝටා ගෝ ලු. මේ මිනිස්සු මේ නගර සභා කඩ කාමරයක් පොස්ටර් දාන්නත් පාවිච්චි කරලා තිබුණා. ඒවට ඉඩ දෙන්න විදිහක් නෑ නෙ…“ සභාපතිවරයා කීවේය.
තවදුරටත් අදහස් දැක්වූ සභාපතිවරයා උද්ඝෝෂණකරුවන් විදුලි බුබුලු කිහිපයටක හානි කර ඇති බවත් කීවේය. මේවා ජාතික දේපල බවත් පෙන්වා දුන්නේය.
මේ හේතුවෙන් විදුලිය විසන්ධි කිරීමට කටයුතු කළ බවත් නගර සභාවේ කඩකාමරයකින් විදුලිය ලබා ගැනීම ජාතික දේපල අවභාවිතා කිරීමක් බවත් පැවසුවේය. එම කඩ කාමර සීල් කලේ ඒ නිසා බවත් පැහැදිලි කළේය.
එහෙත් මෙම කඩකාමරවලට වරිපනම්, කඩකුලී නගරසභාවට ගෙවාගෙන විදුලි බිල් ගෙවන්නේ තමන් බව එම කඩ හිමියෝ ලංකාසරට කීහ.
උද්ඝෝෂණයේ නියලුන තරුණයින් ප්රකාශ කරන්නේ නගරසභාවේ සභාපති මේ කියන්නේ පට්ටපල් බොරුවක් බවය.
“ මොන බල්බ් වලටද අපි හානි කළා කියලා එයා කියන්නෙ. එක තණකොල ගහකට හානියක් වෙලා නෑ. අපි පොලිසියට ගිහින් ඇහුවා ශබ්ද විකාශන පාවිච්චි කරන්න පුලුවන් ද කියලා. පොලිසිය කිව්වා බෑ කියලා. අපි ශබ්ද විකාශන යන්ත්ර එකක් වත් පාවිච්චි කරලා නෑ. ඔය කියන එක කඩ කාමරයකින්වත් අපි කරන්ට් ගත්තෙ නෑ.“
මෙවැනි බාල වැඩ කර මේ විරෝධතාවය වැළැක්විය නොහැකි බව නගර සභා සභාපතිවරයාට දන්වන්නැයි ඔවුහු පැවසූහ.
