පෙර පාසල් සහ පාසල් යන වයසේ පසුවන දරුවන් ඉලක්ක කරගෙන විදේශීය චොක්ලට් සහ රසකැවිලි විකුණන අලෙවිසලක් වටලා ආහාරයට නුසුදුසු ලක්ෂ පහක් පමණ වටිනා රසකැවිලි කිලෝ 100ක තොගයක් අත් අඩංගුවට ගැනීමට මහනුවර නාගරික සෞඛ්ය වෛද්ය දෙපාර්තමේන්තුව අද කටයුතු කළේය.
මහනුවර නගර මධ්යයේ මෙම රසකැවිලි අලෙවිසල තුළ අලෙවි කර ඇත්තේ නීති විරෝධීව මෙරටට ගෙන්වනු ලැබූ චොක්ලට් සහ රසකැවිලි බවත් මෙම සමහර කෑම වර්ගවල කල් ඉකුත් වූ දිනය තිනර් දියරය දමා මකා ඒ වෙනුවට වෙනත් මුද්රාවක් තබා තිබුණ බවත් නාගරික සෞඛ්ය වෛද්ය කාර්යාලය කීවේය.
මේ කටයුත්ත කරන්නට ගොස් හොඳටම වරද්දා ගත් අලෙවිකරුවන් කල් ඉකුත් වූ දිනයට වඩා වසර දෙකක් ඉදිරි කාලයක් නිශ්පාදිත දිනය ලෙස සටහන් කර තිබෙනු සෞඛ්ය අංශ වෙත නිරීක්ෂණය වී ඇත.
විදේශ රටවලින් පැකට් වශයෙන් ගෙන එන ලද මෙම චොක්ලට් සහ ටොෆී එම පැකට්වලින් ඉවත් කර වෙන වෙනම අලෙවියට තබා තිබුණු බවත් එම නිශ්පාදනවල කල් ඉකුත් වූ දිනයක් හෝ නිශ්පාදිත දිනයක් සටහන්ව නොතිබූ බවත් සෞඛ්ය අංශවලට පෙනී ගොස් තිබේ.
මිනිස් පරිභෝජනයට නුසුදුසු ආහාර අළෙවි කිරීමේ චෝදනාව යටතේ වෙළෙඳ සැලේ හිමිකරුට එරෙහිව අධිකරණයේ නඩු පවරන බව නාගරික සෞඛ්ය වෛද්ය දෙපාර්තමේන්තුව අප කළ විමසිමකදී පැවසීය.
