රේගු පරීක්ෂාවකින් තොරව මුදාහල බවට චෝදනා ලද බහාලුම් 323න් එක් බහාලුමක් හෝ බස්නාහිර ආණ්ඩුකාර හනීෆ් යූසුෆ්ට අයත් කිසිම සමාගමට අයත් නැති බව මෙම බහාලුම් සම්බන්ධව හෙළිදරවු කළ රේගු වෘත්තීය සමිති සන්ධානය අද (30) මාධ්ය සාකච්ඡාවක දී හෙළි දරවු කළේය.
ඔවුන් පෙන්වා දුන්නේ ශ්රි ලංකා රේගු ඉතිහාසයේ කිසිම අවස්ථාවක එක් වර එක් පුද්ගලයේ විසින් බහාලුම් 323ක් වැනි විශාල ගණනක් ආනයනය කර නැති බවය. මෙම චෝදනාව මුසාවක් බවත් තමන් රට වෙනුවෙන් සිදුකළ හෙළිදරව්ව දේශපාලනිකය පාවිච්චි කිරීමට විරෝධය දක්වන බවත් රේගු වෘත්තීය සමිති සන්ධානයේ සභාපති අමිල සංජීව ප්රකාශ කළේය.
රේගු වෘත්තීය සමිති තුනක සහභාගීත්වය සහිතව අද පැවැත්වු මාධ්ය හමුවේ දී අදහස් දක්වමින් රේගු වෘත්තීය සමිති සන්ධානයේ සභාපති අමිල සංජීව ප්රකාශ කළේ මෙවැන්නකි.
“අපි මතු කළ කරුණුවලින් බැහැරව ගිහිල්ලා මේ කාරනාවට දේශපාලන මුහුණුවරක් එක් කරන්න ඇතැම් පුද්ගලයින් සහ කණ්ඩායම් උත්සාහ කරනවා . ඒ අනුව අපි සහ රජය අතර අනවශ්ය බිඳවැට්ටීමක් කරන්න විවිධ පාර්ශව විසින් විවිධාකාර උත්සාහ ගන්නවා. ඒ නිසා අපි ඉතාම පැහැදිලිව කියන්න අවශ්යයයි වෘත්තීය සමිති ව්යාපාරයක් ලෙස ඒ කපන බොරු වලේ වැටෙන්න අපි ලෑස්ති නෑ. මොකද අපි රාජ්ය සේවයේ වෘත්තීය සමිතියක් විදිහට අප පවතින රජයත් එක්ක අනුගත වෙලා තමයි කටයුතු කරන්නේ.”
“අපට රජය පාර්ශවයෙන් ඉතාම සාධනීය පැහැදිලි කිරීමක් දීලා තියනවා මේ කරුණු කාරණා ගැන ඉතාම අපක්ෂපාතී පරීක්ෂණයක් පවත්වනවා. ඒ පරීක්ෂණය ඉතාමත්ම කඩිනමින් පවත්වනවා කියලා. ඒ විශ්වාසනීය දැනුම් දීම රජය පාර්ශවයෙන් අපට කරලා තියනවා. ඒ නිසා අපි රජයේ ක්රියාමාර්ගය ගැන පූර්ණ විශ්වාසය තියලා තියනවා. ”
“මේ කාරණාව මුල් කරගෙන ශ්රී ලංක රේගුව සමග ශ්රී ලංකා රජයත් මුදල් අමාත්යාංශයත් අතර අනවබෝධයක් ඇති කරන්න යම් කිසි පාර්ශවයක් උත්සාහ දරනවා නම් රේගු වෘත්තීය සමිති ව්යාපාරය වශයෙන් අපි ඒ අනවබෝධය ඇති වෙන්න ඉඩ තියන්නේ නෑ.”
රේගු පරීක්ෂණයෙන් තොරව මුදාහල ප්රශ්නගත බහාලුම්වලට බස්නාහිර ආණ්ඩුකාරවරයාගේ සම්බන්ධතාවයක් ඇතිදැයි මෙහිදී මාධ්ය කළ විමසීමක දී සභාපතිවරයා මෙසේ පිළිතුරු දුන්නේය. ”
” ශ්රි ලංකා රේගුවේ පරිගණක දත්ත පද්ධතිය ඔස්සේ අපි ලබා ගත් තොරතුරු අනුව මම ඉතාම අවධාරණයෙන් ප්රකාශ කරන්නේ… මේ ඉතාම අසාධාරණ චෝදනාවක් ඉදිරිපත් කරන්නේ. මොකද අපට තියන ලේඛනය අනුව විවිධ පාර්ශවයන්ට අයත් ආනයනික බහාලුම් තමයි මේ ආකාරයට මුදා හැරලා තියෙන්නේ.”
“එතකොට මෙතන ඉන්නවා විවිධ පාර්ශව. එක පාර්ශවයකට, එක් පුද්ගලයෙකුට අයිති කන්ටේනර් තුන්සියයකට ආසන්න ප්රමාණයක් මම හිතන්නේ රේගු ඉතිහාසයේ කොයිම වෙලාවකවත් ලංකාවට ඇවිත් නෑ. එහෙම කෙනෙක් කියනවා නම් ඒක මුසාවක්. “
