ඉඳුනිල් කහටපිටිය –
නීතිය යන යන අකුරු තුනෙ “ය” යන්නටත් බිත්තියට හේත්තු කර වෙඩි තැබූ මේ රට ව්යසනයකට ලක් අශිෂ්ට අපාරාධකරුවෝත් අවසානයේ නීතියේ පිළිසරණ පතති. උන් රටක් මහා විනාශයකට පත් කර මිය ගොස් ඇතත් උන් වෙනුවෙන් උන්ගේ ඥාති සමූහය අධිකරණයට අධිකරණයෙන් සාධාරණයක් අයාචනා කරනු පෙනේ.
සමරසිංහ ආරච්චිගේ මදුෂ් ලක්ෂිත හෙවත් මාකඳුරේ මදුෂ් නමැත්තාගේ මරණය සැකසහිත වන බැවින් එකී විමර්ශන අපරාධ පරීක්ෂණ දෙපාර්තමේන්තුවට භාරදෙන ලෙස ඔහුගේ බිරිඳ ඊයේ (07) කොළඹ මහේස්ත්රාත් අධිකරණයෙන් ඉල්ලා සිටියාය.
කුඩු ටොන් ගණන් ලංකාවට එවමින්, එම මත්කුඩු ජාලය අතිශය සාහසික ලෙස මෙහෙයවමින් රට විකල් කළ මාකඳුරේ මධුෂ් නැමැති අපරාධකරුවා සම්බන්ධව රටට අමතක නැත. ඔහුගේ ජඩ ම්ලේච්ඡත්වය කවදාවත් අමතක වන්නේ ද නැත. කෙසේ වෙතත් අප තේරුම් ගත යුතු වැදගත් යථාර්ථය වන්නේ තම අණින් පුද්ගලයින් මරා දමන ආකාරය සජීවීව බලන, භීෂණය වැපිරවීම සදහා මිනී මරා හිස ගෙලෙන් වෙන් කර පාර්සල් කර කොළඹ එවන, ආරක්ෂක අංශ සමග එළිපිට ගේම ඉල්ලමින් රටේ පාතාල ආණ්ඩුවක් හැදීමට උත්සාහ කර තිබුණ මධුෂ් වැනි අපරාධකරුවෙකුට සාධාරණය ඉල්ලමින් අවසානයේ නීතිය ඉදිරියට එන්නට තරම් අවකාශයක් විමර්ශන අංශ විසින් සකස් කර තිබීමය.
ජාත්යාන්තර මෙහෙයුමක් කර ඩුබායි සිට ලංකාවට ගෙන්වා ශ්රී ලංකා රජයේ පොලිසිය යටතේ රඳවාගෙන සිටි අපාරධකරුවෙක් රටට කික් එකක් දීම සදහායැයි අපට හිතෙන ආකාරයට සැක සහිත ලෙස ඝාතනය වීමට ඉඩ හැරීම හරහා නීතිය කැඩූ අපරාධකරුවෙකුටත් නීතිය හමුවේ නීතියෙ සාධාරණය පිළිබඳ ප්රශ්න කිරීමට ඉඩ හසර දැන් සැලසී තිබේ. “මධුෂ් මරපු එක නරකද ?” යි අහන්නට පෙර රටක් ලෙස අප ප්රශ්න කළ යුතු වන්නේ ඒ අශිෂ්ඨ ප්රවේශය පිළිබඳවය.
මධුෂ්ගේ බිරිය ඊයේ මාලිගාවත්ත අධිකරණයට කීවේ මදුෂ්ගේ මරණය සම්බන්ධයෙන් මාලිගාවත්ත පොලිසිය නිසි ලෙස විමර්ශන සිදු නොකරන් යැයි පෙනී යන බවය. මධුෂ්ගේ මරණය සීඅයිඩි එකට භාර දෙන්නැයි ඔහුගේ බිරිඳ අධිකරණයෙන් ඉල්ලන්නේ එවැනි පසුබිමකය. ඇය වෙනුවෙන් පෙනී සිටි නීතිඥ සේනක පෙරේරා ප්රමුඛ නීතිඥවරු අතිරේක මහෙස්ත්රා මහෙස්ත්රාත් මංජුල රත්නායක හමුවේ එම ඉල්ලීම කළහ. නීතිඥවරුන් අධිකරණයට පෙන්වා දෙන්නට උත්සාහ කළේ මාකඳුරේ මධුෂ් යනු හුදකලා පහළ වීමක් නොවන බවය. මේ කුප්ප සමාජයේ ජඩකමේ ස්වරූපය එළියට පෙන්වූ නිර්මිතයක් බවය. එම නිර්මාණය පසුපස දේශපාලනය, පොලිසිය, මෙන්ම මෙම සමාජයේ ඉහළම ප්රභූ චරිත ද වූ බවය.
රටට පිළිගැනීම සඳහා තර්කානුකූල කතාවක්වත් නොමැතිව විහිළු සහගත ආකාරයෙන් මාකඳුරේ මධුෂ් නමැත්තා ඝාතනය වන්නේ ඔහු සමඟ සබඳතා පැවැත්වූ දේශපාලනඥයන් රැසකගේ තොරතුරු ඔහු හෙළිකිරීමට සූදානම්ව සිටි අවස්ථාවකදී බව විටෙක පාර්ලිමේන්තුවේ දී ද කියැවිනි. මෙවැනි අවස්ථාවක මාකඳුරේ මධුෂ් වෙඩි වැදීමකින් මිය යෑම සැකසහිත බව එදා විපක්ෂයේ සිට පෙන්වා දුන්නේ අද මහජන ආරක්ෂාව පිළිබඳ අමාත්ය විජිත හේරත්ය. මේ බව නීතිඥවරු අධිකරණයේ දී මතු කළේ වත්මන් මහජන ආරක්ෂක අමාත්ය විජිත හේරත්ගේ එම ප්රකාශය හැන්සාඩ්ගතව ඇති ආකාරය උපුටා දක්වමිනි.
එබැවින් එකී මරණය සම්බන්ධයෙන් ඉදිරි විමර්ශන මාලිගාවත්ත පොලිසියෙන් ඉවත්කරන ලෙසත් අධිකරණය හමුවේ පෙනී සිටින ලෙස දන්වා අපරාධ පරීක්ෂණ දෙපාර්තමේන්තුවට නොතීසි නිකුත්කරන ලෙසත් මාකඳුරේ මධුෂ්ගේ බිරිය වෙනුවෙන් පෙනී සිටි නීතිඥවරු අධිකරණයෙන් ඉල්ලා සිටියහ.
නීතිඥවරු පෙන්වා දුන්නේ පොලිස් භාරයේ සිටි ප්රබල පාතාල කල්ලි නායකයකු හා මත්ද්රව්ය ජාවාරම්කරුවකු වන මාකඳුරේ මධුෂ් නමැත්තා සඟවා ඇති අවි ආයුධ කිහිපයක් අත්අඩංගුවට ගැනීම සඳහා හද්දා මැදියමේ එළියට ගෙන කොළඹ මාලිගාවත්ත නිවාස සංකීර්ණයට ගෙන ගිය අවස්ථාවේ දී ඝාතනය වූ බවය. 2020.10.20 වැනිදා දෙපාර්ශ්වයක් අතර ඇතිවූ වෙඩි හුවමාරුවක දී වෙඩි වැදී මියගොස් ඇති බව පොලිසිය අධිකරණයට මේ ගැන දන්වා ඇතත් එම කරුණු දැක්වීම් හා ඔහුගේ මරණය ඉතා සැකසහිත බව මරණකරුගේ බිරිඳගේ අයිතිවාසිකම් වෙනුවෙන් පෙනී සිටි නීතිඥවරු කියා සිටියහ.
නීතිඥවරු අධිකරණයට කීවේ මධුෂ්ගේ මරණය සැක සහිත වුවත් ජීවිත තර්ජන නිසා මෙතෙක් දිනක් ඒ පිළිබඳව ඔහුගේ බිරිය නිහඬව සිට ඇති බවය.
අධිකරණ සේවා කොමිෂන් සභාව විසින් නිකුත්කර ඇති චක්රලේඛය අනුව තම අධිකරණයට සීමා පනවා ඇති බැවින් අගතියට පත් පාර්ශ්වය කරන එම ඉල්ලීමට අවසර දීමේ හැකියාවක් තම අධිකරණයට නොමැති බව අතිරේක මහේස්ත්රාත්වරයා කීවේය. විමර්ශන සම්බන්ධයෙන් සෑහීමට පත් නොවන්නේ නම් මාලිගාවත්ත පොලිස් ස්ථානාධිපතිවරයා දැනුවත් කරන ලෙසට ද අගතියට පත් පාර්ශ්වයේ නීතිඥවරුන්ට අධිකරණය දැනුම් දුන්නේය.
නීතිපතිවරයාට, පොලිස්පතිවරයාට හෝ අපරාධ පරීක්ෂණ දෙපාර්තමේන්තුවට ඒ පිළිබඳව පැමිණිලි කිරීමට ද අගතියට පත් පාර්ශ්වයට හැකියාව ඇතැයි ද අතිරේක මහෙස්ත්රාත්වරයා වැඩිදුරටත් පෙන්වා දුන්නේය.
යළිත් මතුව සංවාදයට එන්නේ අමුතුම කතාවකි. මේ කතාව යළිත් වරක් කියන්නේ නීතිය උන් අතේ තියාගෙන හිටිය ප්රමාණය ගැනය. ඒ ගැන මතක් කිරීමට අපාරධකරුවෙක් මතුවීම ගැන අපට දුක හිතෙන්නේය. පොලිස්පතිවරුන් ලෙස සිටි සිඟිති ආතල් කාරයන් ගැලරියේ විසිල් පාර ගන්නට ගත් ලාභ තීරණ අවසානයේ රටක් නිරුවත් කර ඇති ආකාරය දකිමු.
