සූරියවැව නුවන් ජයසේකර –
ප්රේම සම්බන්ධය නැවැත්තුවයි තුවක්කු දෙකක් පිහි දෙකක් සහිතව 21හැවිරිදි පෙම්වතිය පැහැර ගන්නට පැමිණි 22 හැවිරිදි පෙම්වතෙක් අත් අඩංගුවට ගැනීමට වලස්මුල්ල පොලිසිය කටයුතු කර ඇත. වලස්මුල්ල වත්තේහේන්ගොඩ ප්රදේශයේදී පෙම්වතිය බලහත්කාරයෙන් පැහැරගන යාමට තැත් කළ මෙම පෙම්වතා ගල් කටස් වර්ගයේ ගිනි අවි දෙකක්, පිහි දෙකක් හා වෙඩි බෙහෙත් සමග වලස්මුල්ල පොලිසිය විසින් අත් අඩංගුවට ගෙන තිබුණේ අද (08) අළුයම 1ට පමණය.
මෙලෙස අත්අඩංගුවට ගෙන ඇත්තේ දෙනියාය යාපිටකන්ද ප්රදේශයේ පදිංචි 22 හැවිරිදි තරුණයෙකි. අත්අඩංගුවට පත් තරුණයා වලස්මුල්ල වත්තේහේන්ගොඩ ප්රදේශයේ පදිංචි 21 හැවිරිදි තරුණියක සමග වසරක පමණ කාලයක් ප්රේම සබඳතාවයක් පවත්වාගෙන ගොස් ඇති අතර පසුව තරුණිය මෙම ප්රේම සබඳතාවය නවත්වා තිබේ.
එකවරම තරුණිය ප්රේම සබඳතාවය නැවැත්වීම හේතුවෙන් උරන වූ පෙම්වතා යකඩ බට ආධාරයෙන් සකස් කරන ලද ගල් කටස් ප්රමාණයේ ගිනි අවි දෙකක් , පිහිදෙකක් හා වෙඩි බෙහෙත් ප්රමාණයක්ද සමඟ වලස්මුල්ල පිහිටි තරුණියගේ නිවසට පැමිණ තරුණියව බියගන්වා පැහැරගෙන යාමට උත්සාහ කර තිබේ. එම අවස්ථාවේදී තරුණිය හා නිවැසියන් විසින් 119 පොලිස් හදිසි ඇමතුම් අංශයට පැමිණිලි කර ඇත. ඒ අනුව වලස්මුල්ල පොලිස් ස්ථානයේ නිලධාරින් කණ්ඩායමක් එම ස්ථානයට පැමිණ පෙම්වතා අත්අඩංගුවට ගෙන තිබේ.
අත්අඩංගුවට පත් සැකකාර පෙම්වතා අපරාධ වලට සම්බන්ධ හෝ ආරක්ෂක අංශවලට සම්බන්ධ බවට මේ දක්වා සිදු කර විමර්ශනවලදී අනාවරණය වි නොමැත. ඔහු වලස්මුල මහේස්ත්රාත් අධිකරණයට ඉදිරිපත් කිරීමට නියමිතය.වලස්මුල පොලිස්ස්ථානය සිද්ධිය සම්බන්ධයෙන් වැඩිදුර විමර්ශන පවත්වයි.
