මනම්පිටිය නිමල් ජයරත්න –
පොලොන්නරුව වැලිකන්ද ත්රිකෝණමඩු රක්ෂිතයට මායිම්ව සූරියවැව ආසන්නයේ ඇති අලි කොරිඩෝවක් ලෙස හඳුනා ගත් අලි සංක්රමණ කලාපයක් ජාතික පශු සම්පත් මණ්ඩලය විසින් බඩඉරිඟු වගාවක් සඳහා හෙක්ටයාර 49 බැගින් ආයෝජකයින් 29 දෙනෙක් වෙත බෙදා දී තිබේ.
මේ වනවිට රූස්ස පලු වීර බුරුත ඇතුළු දැවැන්ත වනස්පතීන් උගුලුවා දමමින් මේ අලි කලාපය වසා දමමින් බඩඉරිගු වගාවකට බිම් සකසන ආකාරය අප අද (21) එම ස්ථානයට යන විට දෑසින්ම දැකිය හැකි විය. ප්රදේශයේ මහා සංඝරත්නය සහ සූරියවැව ගොවි නියෝජිතවරු ලංකාසරට පැවසුවේ දින කීපයක සිට මේ වන සංහාරය දියත් වී ඇති බවය.
ප්රදේශයේ මහා සංඝරත්නය පෙන්වා දෙන්නේ වනජීවී දෙපාර්තමේන්තුවට සහ ශ්රී ලංකා මහවැලි අධිකාරියට අයත් මෙම රක්ෂිත ඉඩම් අක්කර 1500 ට වැඩි ප්රමාණයක් බඩ ඉරිගු වගාවක් සඳහා ආයෝජකයන්ට ලබාදී ඇති බවය. ඔවුන් හිතුමනාපයේ මෙම රක්ෂිතය වනසමින් සිටින බව උන්වහන්සේලා කීහ.
ඩෝසර් දමා විනාශ කරන මෙම රක්ෂිතය අලි කොරිඩෝවක් හැටියට නම් කර ඇති බවත්, සෝමාවතී සහ මාදුරුඔය අතර අලින් එහා මෙහා ගමන්කරනු ලබන්නේ මෙම රක්ෂිතය හරහා බවත් ගම්වාසීන් සඳහන් කරති,
මෙම රක්ෂිතයේ විනාශය පිළිබඳ අප මහවැලි බී කලාපීය නේවාසික ව්යාපාර කළමනාකාර ඉන්දික රණවීරගෙන් දුරකථනයෙන් කළ විමසීමකදී ඔහු පැවසුවේ තමන්ට එම භූමිය අයත් නොවන බවයි.
ඉන් අනතුරුව අප මේ පිළිබඳව වනජීවී දෙපාර්තමේන්තුවේ ශ්රී ලංකා වනජීවී නිලධාරීන්ගේ වෘත්තීය සංගමයේ සභාපති අඩවි ආරක්ෂක කුමාරසිරි විජයකෝන්ගෙන් අප කළ විමසීමකදී ඔහු සඳහන් කළේ විනාශ වෙමින් පවතින්නේ අලි සංක්රමණය වන රක්ෂිතයක් බවත්, මෙම තත්ත්වය නිසා අලි මිනිස් ගැටුම උග්ර වීමේ විශාල අවධානමක් පවතින බවත්ය.
ඒ තුළින් ජීවිත හා දේපොළ හානි සිදුවිය හැකි බව ඔහු පෙන්වා දුන්නේය. මේ පිළිබඳ ප්රදේශයේ සංඝරත්නය සහ ගොවි ජනතාවගේ දැඩි විරෝධයක් පවතින බවත්, තමන් වනජීවී වෘත්තීය සංගමයේ සභාපතිවරයා හැටියට මෙම විනාශය නතර කිරීමට හැකි සෑම වෘත්තීය ක්රියාමාර්ගයක්ම ගන්නා බවයි.
එම රක්ෂිතය ඩෝසර් දමා විනාශ කරන ආයෝජකයෙකුගෙන් අප කළ විමසීමේදී ඔහු සඳහන් කළේ ජාතික පශු සම්පත් සංවර්ධන මණ්ඩලය හරහා තමන් ඇතුළු විසි නව දෙනකුට හෙක්ටයාර 49 බැගින් එම ඉඩම් බඩ ඉරුගු වගාව සඳහා ලබා දී ඇති බවත්, එය නතර කිරීමට නම් දේශපාලන අධිකාරියත්, ප්රදේශයේ ගොවි ජනතාව, මෙන්ම මහා සංඝරත්නයත්, මෙම ඉඩම් ලබාගෙන ඇති ආයෝජකයින් අතර සාකච්ඡාවක් කළ යුතු බවත්ය.
