ජනාධිපති අනුර කුමාර දිසානායක ජනාධිපති සමාව අවභාවිතා කරමින් මහාධිකරණයෙන් වරදකරු වී දින 10ක් පමණක් සිරදඬුවම් ලැබූ, තවත් අධි චෝදනා 20කට වැඩි ප්රමාණයක අධිකරණ කටයුතු ක්රියාත්මකවන අපරාධකරුවෙකුට ජනාධිපති සමාව ලබා දී ඇතැයි සමගි ජන බලවේගයේ පාර්ලිමේන්තු මන්ත්රී නීතිඥ අජිත් පී පෙරේරා පාර්ලිමෙින්තුවේ දී හෙළිදරවු කළේය.
ඔහු කීවේ මේ තීන්දුව ගෙන ඇත්තේ මෛත්රීපාල සිරිසේන ජනාධිපති සමයේ දී ජනාධිපති සමාව අවභාවිතා කිරීම සම්බන්ධව ඔහුව දැඩි ලෙස විවේචනය කළ දේශපාලන නායකයෙක් විසින් වීම අතිශයින්ම කණගාටුදායක බවය.
අද පාර්ලිමේන්තුවේදී මාවෙයි සේනාධිරාජා සම්බන්ධ ශෝක යෝජනාව ඉදිරිපත් කරන අතර අජිත් පී පෙරේරා මන්ත්රීවරයා මේ කතාව කියමින් පෙන්වා දුන්නේ තමන් කරන දේ කියන කියන දේ මත පිහිටා සිටින මාවෙයි සේනාධිරාජා වැනි දේශපාලන නායකයින් අද නොමැති බවය.
අජිත් පී පෙරේරා මන්ත්රීවරයා මෙසේ ද කීවේය.
අනුරාධපුර මහාධිකරණයේ HC69/2018 නඩුවෙදි 2025/05/02 දා දණ්ඩනීති සංග්රහයේ 386 වගන්තිය යටතේ වරදකරු කරන ලද අතුල සේනාරත්න නැමැති අයෙක්….
ඔහුට තිබුණා මහාධිකරණ විනිසුරු ලක්මාලි හේවාවසම් විසින් වරදකරු කරපු චෝදනාවට අමතරව මහේස්ත්රාත් අධිකරණයේත්, මහාධීකරණයෙත් අධි චෝදනා 20කට වැඩි ප්රමාණයක් තියනවා.
ඔහුව වරදකරු කළේ 2025/05/02 දින. 2025/05/12 වැනිදා වෙසක් පෝය දවසේ වර්ථමාන ජනාධිපති තුමා අනුර කුමාර දිසානායක මැතිතුමා ජනාධිපති සමාවක් ලබා දීලා තියනවා.
ඉතාම බරපතලයි. සිර දඬුවම් ලැබු තැනැත්තෙකුට… දඩ ගෙවීමට නැති තැනැත්තෙකුට… මෙවැනි යුක්තිය ඉටු විය යුතු තැන්වල අයුක්තිය ඉටුවන, තව නඩු තිබෙන බරපතල අපරාධකරුවන්ට ජනාධිපති සමාව ලැබෙන විදිහක් අද ඇති වෙලා තියනවා.
ජනාධිපති සමාව ලබා දීමේදී ආණ්ඩුක්රම ව්යවස්ථාවේ දක්වා ඇති මූලික ක්රමවේදය අනුගමනය කළ යුතු බවට ශ්රේෂ්ඨාධිකරණය දැනට නඩු කීපයකම කටයුතු කළා. හිටපු ජනාධිපති මෛත්රීපාල සිරිසේන මැතිතුමාට වන්දි ගෙවන්නත් නියම කළා.
ඒ පාඩම් ඉගෙන ගන්නේ නැතිව අද මේවා සිද්ධ වෙනවා. එදා මෛත්රීපාල සිරිසේන ජනාධිපති සමාව අවභාවිතා කරද්දී ඊට විරුද්ධ වුන නායකයො අද ඒ විදිහටම ඒ ජනාධිපති සමාව ලබාදීමේ වැඩ පිළිවෙළ ක්රියාත්මක කිරීම අතිශයින් කණගාටු දායකයි.
