ප්රකාශිත ඡන්ද ප්රතිඵල අනුව මේ වනවිට ජාතික ජන බලවේගය සුවිශේෂී ජයග්රහණයක් සහිතව ඉදිරියෙනි. ප්රකාශිත ඡන්ද ප්රතිඵල අනුව මේ වනවිට ජාතික ජන බලවේගය අත් කරගත් ඡන්ද ප්රමාණය පනස් ලක්ෂ දෙසීය අනූ හයකි. එය ප්රතිශතයක් ලෙස සියයට 61.6කි. ආසන ප්රමාණය 44කි.
පහළොස් ලක්ෂ හතලිස් එක් දහස් එකසිය දාසයක් සහිතව සමගි ජන බලවේගය ආසන 11ක් දිනාගෙන තිබේ. එය ප්රතිශතයක් ලෙස සියයට 18.99කි. ගෑස් සිලින්ඩරය ලකුණින් තරග වදින රනිල් වික්රමසිංහගේ කණ්ඩායම එක් ආසනයක් සහ සියයට 3 වැටුන පොහොට්ටුව ආසන 2ක් ඉලංකෙයි තමිල් අරසු කච්චි පක්ෂය එක් ආසනයක් සහ වෙනත් අය එක් ආසනයක් දිනාගෙන තිබේ.
නුවරඑළිය දිස්ත්රික්කයේ ආසන 5ක් මාලිමාවටය. සජබට ආසන 2 සහ එක්සත් ජාතික පක්ෂයට එක් ආසනයක් හිමි වී තිබේ. මෙයද අති විශේෂ ජයග්රහණයක් වන්නේ වතුකරයේ සම්ප්රදායික දෙමළ දේශපාලනය කරමුලින් ගෙන සොලවා විසි කිරීමට ඉතිහාසයේ පළමුවරට වතුකර ප්රජාව කටයුතු කර ඇති බැවිනි.
ත්රී කුණාමලය – ඉලංකෙයි තමිල් අරසු කච්චි පක්ෂයේ බලකොටුවක් වූ ත්රිකුණාමලයේ ජයග්රහණය ද ජාතික ජන බලවේගයටය. වර්ගවාදී ගෝත්රික දේශපාලනය ජනතාව විසින් තීරණාත්මක ලෙස වෙනස් කර ඇත්තේ දිස්ත්රික්කයේ ආසන 2ක් මාලිමාවට ලබා දෙමිනි. සජබ සහ ඉලංගෙයි තමිල් අරුස කච්චි වෙත එක් ආසනය බැගින් හිමි වී තිබේ.
මාතලේ දිස්ත්රික්කයත් ජාතික ජන බලවේගය ජයග්රහණය කරන්නේය. ඒ ආසන 4ක් සමගිනි. එක් ආසනයක් සමගි ජන බලවේගයට හිමි වී තිබේ.
බදුල්ල දිස්ත්රික්කයේ ආසන 6ක් මාලිමාවටය. ඒ විශිෂ්ට දිස්ත්රික් ජයග්රහණයක් සමගිනි. සමගි ජන බලවේගයට ආසන දෙකක් හිමි වී ඇත. රනිල් වික්රමසිංහගේ නව ප්රජාතන්ත්රවාදී පෙරමුණට එක් ආසනයකි. නිමල් සිරිපාල ද සිල්වා, චාමර සම්පත් දසනායක ඇතුළු රනිල්ගේ පළපුරුදු කණ්ඩායම තරග වැදුනේ බදුල්ලෙනි.
මොනරාගල දිස්ත්රික්කයේ ද ආසන 5ක් මාලිමාවටය. සජබට එක් ආසනයකි. මොනරාගලත් සේදී ගොස්ය. සිලින්ඩරය හෝ පොහොට්ටුව ලොවෙත් නැත.
මාතර දිස්ත්රික්කයේ ආසන 6ක් මාලිමාව දිනාගෙනය. සජබට එක් ආසනයකි. පොහොට්ටුව, රනිල්ගේ ගෑස් සිලින්ඩරයට එක් ආසනයක්වත් නැතිව විසිවී ගොස්ය. සිලින්ඩරයේ වැඩ දන්නා කාංචනත් පරාදය.
පොළොන්නරුව දිස්ත්රික් ජයග්රහණයත් මාලිමාවටය. ආසන 4ක් මාලිමාව දිනාගෙන තිබේ. සජබට එක් ආසනයක්
හිමිව ඇත. ජාතික ජන බලවේගය පොළොන්නරුව දිස්ත්රික්කයෙන් ආසන 4ක් ජයග්රහණය කර තිබේ. ගෙන් ගෙට ගොස් තම පුතාව දිනවන්නට හැදූ මෛත්රීපාල අවලංගු චරිතයක් බවට පත්ව ඇත. සර්ව ජන බල පක්ෂයට එකදු ආසනයක්වත් පොලොන්නරුවෙන් නැත. රනිල්ගේ ගෑස් සිලින්ඩරයටත් එසේය.
හම්බන්තොට දිස්ත්රික්කයේ ආසන 5ක් මාලිමාව දිනාගෙන දිස්ත්රික්කය ජයග්රහණය කර තිබේ. සජබට සහ පොහොට්ටුවටත් ආසනය බැගින් හිමි වි ඇත. හම්බන්තොටින් ගෑස් සිලින්ඩරය විසි වී ගොස්ය.
ගාල්ල දිස්ත්රික්කයේ ආසන 7ක් මාලිමාවට ය. එය විශිෂ්ට ජයග්රහණයකි. සජබට සහ පොහොට්ටුවටත් ආසනය බැගින් හිමි වී තිබේ. විශාල ඡන්ද වියදමක් දරමින් පාර්ලිමේන්තුවට පොරකෑ රනිල්ගේ පළපුරුදු මනුෂත් ගෙදරය. ගෑස් සිලින්ඩරයට එක් ආසනයක්වත් ගාල්ලෙන් නැත.
පෙනෙමින් ඇත්තේ නව සංස්කෘතියකි. ඉලංකෙයි තමිල් අරසු කච්චි පක්ෂයේ බලකොටුවක් වුන යාපනය මැතිවරණ කොට්ඨාසය මාලිමාව දිනාගෙනය. ත්රීකුණාමලය දිස්ත්රික්කයත් ඔවුන් පරාදය. වතුකරයේ දෙමළ සම්ප්රදායික දේශපාලන නායකත්වය හොම්බෙන් ගොස්ය. බොහෝ විට වතු කම්කරු පවුල්වල දෙදෙනෙක් මාලිමාවෙන් පාර්ලිමේන්තුවට එන්නට ඇති ඉඩ වැඩිය. මේ සුබදායි ජනතා පෙරළිය ජාතික ජන බලවේගය කළමනාකරණය කරගන්නා ආකාරය ඉදිරි අනාගතය තීන්දු කරනු ඇත.
