අරක්කු කොම්පැණිවලින් පඩි ගන්නා නිලධාරීන් කීප දෙනෙක් මුදල් අමාත්යාංශයේ සිටින බවත්, සීනි කාර්මාන්තය සහ උක් ගොවීන්ගේ ජීවන තත්ත්වය පිළිබඳ ගැටලුවට නිසි විසඳුමක් ලබා ගත නොහැකි සේ අර්බුද ඇති කරන මෙම නිලධාරින් සම්බන්ධව ඉදිරියේ දී හෙළි දරවු කරන බවත් කර්මාන්ත සහ ව්යවසායකත්ව සංවර්ධන අමාත්ය සුනිල් හඳුන්නෙත්ති අද (06) පාර්ලිමේන්තුවේ දී පැවසුවේය.
ඔහු මේ බව ප්රකාශ කළේ රුපියල් 475ට මිල කර ඇති එතනෝල් ලීටරයක මිල රුපියල් 800 දක්වා වැඩිකිරීම ආර්ථික වශයෙන් සුරාබදු ආදායමට බලපානු ඇති බවට රවුෆ් හකීම් මන්ත්රීවරයා මතුකළ ප්රශ්නයට පිළිතුරු දෙමිනි.
හඳුන්නෙත්ති මන්ත්රීවරයා අද පාර්ලිමේන්තුවේදී ප්රකාශ කළේ ගල්ඔය සහ පැලවත්ත සීනි සමාගම් සතුව සීනි මෙට්රික් ටොන් 23696ක් සහ එතනෝල් ලීටර 223,50000ක් ඇති බවය. සීනි අලෙවිය සිදුකරන්නේ කිලෝව රුපියල් + වැට් මිලට බව කී ඇමතිවරයා එතනෝල් ලීටරය රුපියල් 800කට මිල කරන බවත් එතනෝල් ආනයනය නවත්වන බවත් පැවසුවේය.
ඇමතිවරයා රවුෆ් හකීම් මන්ත්රීවරයාට පිළිතුරු දෙමින් මෙසේ ද කීවේය.
“එතනෝල් ලීටර්ය 1500ට තියනකොටත් අරක්කු මිල වෙනස් වුනේ නෑ. 475ට විකුණනකොටත් ඒ ගානමයි මිල. 90% එතනෝල් ලීටරයකින් අරක්කු බෝතල් තුනක් හදන්න පුලුවන්. රුපියල් 475ට එතනෝල් ලීටරය අරන් අරක්කු බෝතල් 03ක් හදන්න පුලුවන්නම් කොච්චර අඩුවට අරක්කු බෝතලයක් දෙන්න පුලුවන් ද?. ඒ දෙන්නේත් 4000ට ගල් අරක්කු බෝතලේ. ඒ අනුව රුපියල් 800 වුනා කියලා මිල වැඩි කරන්න ඕන නෑ.”
“කසිප්පු කරිඤ්ඤන් දවසකට ලීටර ලක්ෂ 2ක් මේ රටේ පරිහරණය කරනවා. ඒක නතර කරන්න තමයි අපි කිව්වේ ගල් ඔයට ඇතිමලේ වගේ සීනි නිශ්පාදනය කරන ආයතනවලට ලයිෂන් එක දෙන්න කියලා අරක්කු බෝතලයක් හදන්න.”
“දැන් මම කියන්නම්. මේක අපේ ප්රශ්නයක් නෙමෙයි. මුදල් අමාත්යාංශයේ නිලධාරීන් දෙන්නෙක් තුන්දෙනෙක් ඉන්නවා අරක්කු කොම්පැණිවලින් සල්ලි ගන්න. ඒ අය හෙට අනිද්දට හෙළිදරවු කරනවා. ඒ අය මේ වැඩේ කරන්නේ. රටේ මේ තත්ත්වය පාලනය කරන්න දෙන්නේ නැත්තේ මේ බිස්සන් එකේ ඉන්න කට්ටිය.”
“පහුගිය දේශපාලන චර්යාවන් අනුව හැදුනු වැරදි ටිකක් තියනවා. ඒ වැරදි අමාරුයි නිවැරදි කරන්න. ඒ වෙනසට බැරි කට්ටිය කීප දෙනෙක් ඉන්නවා. මේක වැරදි කරන්න ඕන. මේක නිවැරදි කළේ නැතිනම් මේ කර්මාන්තයත් ඉවරයි. සීනි කර්මාන්තයත් ඉවරයි. ”
“මට තියෙන්නේ තීරණ දෙකයි. ගොවියන්ට ගෙවන මිල අඩු රකන්නන ඕන නැතිනම් එතනෝල් මිල වැඩි කරන්න ඕන. අපි එතනෝල් මිල වැඩි කරනවා. “
