සොයිසා පවුල් දෙකක් අතර අම්බලන්ගොඩ දි සිදුවන ඝාතන දාමයේ තවත් ඝාතනයක් ලෙස සැක කෙරෙන ඝාතනයක් අද (31) රාත්රියේ වාර්තා වී තිබේ.
අද 7.20ට පමණට අම්බලන්ගොඩ පොලිස් වසමේ බලපිටිය මූලික රෝහල ඉදිරිපිට ගාල්ල කොළඹ ප්රධාන මාර්ගයේ දි යතුරුපැදියකින් පැමිණි නාඳුනන පුද්ගලයකු විසින් T 56 වර්ගයේ ගිනි අවියකින් සිදු කරන ලද වෙඩි තැබීමකින් එම ඝාතනය සිදුකර ඇත.
මරා දමා ඇත්තේ අංක 06 සීනිගොඩ ,වතුගෙදර ලිපිනයේ පදිංචි . මදුර කසුන් ගුණතිලක නැමැත්තෙකි.
මරා දැමූ තරුණයා අහුංගල්ල ප්රදේශයේ සිට අම්බලන්ගොඩ දෙසට යතුරුපැදියකින් ගමන්කරමින් සිටියදී මෙම වෙඩි තැබිම සිදු කොට ඇති බවට අනාවරණය වේ. .
මේ වනවිට අජිත් සොයිසා පවුල සහ වසන්ත සොයිසා පවුල අතර සිදුවෙමින් පවතින ඝාතන දාමයෙන් හය දෙනෙකු ඝාතනය වී තිබේ. මෙම මිය ගිය තරුණයා වසන්ත සොයිසාගේ පාර්ශවයෙන් ඝාතනය කරන්නට ඇතැයි පොලිස් විමර්ශකයෝ සැක පහළ කරති.
මෙම ඝාතන දාමය අලුතින් ආරම්භ වන්නේ පසුගිය ජූලි මස 26 වැනිදා අම්බලන්ගොඩ දී වසන්ත සොයිසා නැමැත්තා ඝාතනයත් සමගය.
මෙම ඝාතනයට මුල් වන්නේ අම්බලන්ගොඩ දී අජිත් සොයිසා හෙවත් බූරු අජිත් නැමැත්තා ඝාතනය කිරීමේ සිද්ධිය ය. බූරු අජිත් ඝාතනය වන්නේ 2020 අගෝස්තු 22 දාය. එම ඝාතනයේ ප්රධාන සැකකරු වූයේ වසන්ත සොයිසාය.
වසන්ත සොයිසා බූරු අජිත් හෙවත් අජිත් සොයිසා ඝාතනය සම්බන්ධව අත්අඩංගුවට පත් වී බන්ධනාගාරගතව සිට ඇප මත නිදහස්ව සිටි අයෙකි. එම ඝාතනය සම්බන්ධව බලපිටිය උසාවියේ පැවති නඩු වාරයට ගොස් යළි පැමිණෙමින් සිටියදී අම්බලන්ගොඩ ඌරාවත්ත ප්රදේශයේ දී යතුරු පැදියකින් පැමිණි ඝාතකයින් දෙදෙනෙක් විසින් ඔහුව පසුගිය ජූලි 26 වැනිදා වෙඩි තබා මරා දැම්මේය.
ඊට පසුදා එනම් ජූලි 27 අම්බලන්ගොඩ, ගලගොඩ ප්රදේශයේ මළ ගෙදරකට පැමිණි තුවක්කු කරුවෙක් එම මළ ගෙදර සිටි පුද්ගලයන් දෙදෙනෙකුට වෙඩි තබා ඝාතනය කළේය. එසේ ඝාතනය කරනු ලැබුවේ ඌරවත්තේ දී වසන්ත සොයිසාට වෙඩි තැබූ බවට සැක කරන පුද්ගලයාගේ සොයුරාය. ඌරවත්තේ දී වසන්ත සොයිසාට වෙඩි තැබූ බව කීවේ බූරු අජිත් හෙවත් අජිත් සොයිසාගේ සොයුරු සුජිත් සොයිසා නැමැත්තෙකි. මළ ගෙදරදී ඝාතනය වන්නේ අජිත්ගේ හා සුජිත්ගේ සොයුරාවන විජිත් සොයිසා නැමැත්තෙකි.
එහි පලිය ගැනීමට අම්බලන්ගොඩ දෙල්දූව ප්රදේශයේ අවන්හලකට පැමිණි ඝාතකයෙක් එහි ඉහළ මහලේ රැඳි සිටි පුද්ගලයෙකුට වෙඩි තබා පසුගිය 21 වැනිදා ඝාතනය කළේය. එසේ ඝාතනය කර තිබුණේ වසන්ත සොයිසාගේ බාප්පාගේ පුතාය.
කාර් රථයකින් පැමිණි ඝාතකයා ටි 56 ගිනි අවියකින් පසුගිය 21 වැනිදා රාත්රී 8.30 – 9ත් අතර මෙම ඝාතනය සිදුකර තිබිණි.
එම ඝාතනය සිදුකරන්නේ අජිත් සොයිසාගේ පාර්ශවයෙනි. ගලගොඩ මළගෙදර දී සිදුවන ඝාතනයේ පලිය ගැනීමට මෙම ඝාතනය සිදුකළ බවට තොරතුරු ලැබී තිබිණි.
ගලගොඩ ඝාතනයේ පළිය අද බලපිටිය පොලිසිය අසලදී ගෙන ඇති බව සැක කරන්නේ මේ තරුණයා ඝාතනයත් සමගය.
අම්බලන්ගොඩ පොලිසිය පරික්ෂණ පවත්වයි
