අග්රාමාත්ය අචාර්ය හරිනී අමරසූරියට එරෙහිව විපක්ෂය ගෙන එන විශ්වාස භංග යෝජනාව දේශපාලන පලිගැනීමක් බවත් එම විශ්වාස භංගයට අත්සන් කිරීම හෝ ඊට පක්ෂව ඡන්දය ප්රකාශ කිරීම තම කණ්ඩායම විසින් නොකරන බවත් ඉලංගෙයි තමිල් අරසු කච්චි පක්ෂයේ පාර්ලිමේන්තු කණ්ඩායම් නායක එස්. ශ්රී ධරන් අද ( 11 ) පැවසීය.
නව අධ්යාපන ප්රතිසංස්කරණ පාදක කර ගනිමින් අධ්යාපන අමාත්ය හා අග්රාමාත්ය හරිනී අමරසූරියට එරෙහිව අපහාස කිරීමේ උත්සාහයක් සිදුවෙමින් පවතින බවත්, විපක්ෂයේ කණ්ඩායමක් අත්සන් ලබා ගනිමින් ඇය අග්රාමාත්ය අමාත්ය තනතුරින් සහ අධ්යාපන අමාත්ය තනතුරින් ඉවත් කිරීමට විශ්වාස භංගයක් කථා නායකවරයාට ලබා දී ඇති බව ශ්රී ධරන් මන්ත්රීවරයා කීවේය.
නමුත් එම විශ්වාස භංගයට ඉලංකෙයි තමිල් අරසු කච්චි පක්ෂය සහ තවත් කණ්ඩායමක් අත්සන් කර නොමැති බව මන්ත්රීවරයා හෙළි කළේය. මේ විශ්වාස භංගය ගෙන එන්නේ අදාල මොඩියුලයේ ප්රශ්නගත කොටස ඉවත් කර ඇති බවටත් එවැනි දෙයක් සිදුනොවන බවටත් ඇය පාර්ලිමේන්තුවේ දී සහතික කර ඇති පසුබිමක දී වීමත් මේ විශ්වාස භංගයේ අරමුණ ඇය නින්දාවට පත් කිරිම බැවින් එය පක්ෂයක් ලෙස තමන් අනුමත නොකරන බවත් ශ්රි ධරන් මන්ත්රීවරයා පෙන්වා දුන්නේය.
විශ්වාස භංගයට පක්ෂව ඡන්දය දීමේ ස්ථාවරයක් ඉලංකෙයි තමිල් අරසු කච්චි පක්ෂයේ නොමැති බව ද මන්ත්රීවරයා පැවසුවේය.
“ අපට ආණ්ඩුව ගැන විවේචන තිබෙනවා. අපි ඒ ගැන වෙනස් විදිහකට කටයුතු කරනවා. අධ්යාපන ප්රතිසංස්කරණයක් අපේ රටට ඉතාම අවශ්යයයි. අග්රාමාත්ය තුමිය කාන්තාවක් කියන එකවත් සලකා බලන්නේ නැතිව ඉතාම නින්දිත විදිහට කරන ප්රචාරවල කොටස් කරුවෙක් වෙන්න අපි කැමති නෑ.” මන්ත්රීවරයා කීවේය.
