දිනසේන රතුගමගේ –
යාපනය, කොඩිකාමම් ප්රදේශයේදී වැලි ප්රවාහනය කළ ටැක්ටරයකට යටකර පොලිස් නිලධාරියෙකු ඝාතනය කිරීමේ සිද්ධියට සම්බන්ධ ප්රධාන සැකකරු අත්අඩංගුවට ගැනීම සඳහා පොලීසිය විශේෂ මෙහෙයුම් ආරම්භ කර තිබේ.
මෙම සිද්ධිය සම්බන්ධයෙන් කොඩිකාමම් පොලීසිය මේ වන විට සැකකරුවන් දෙදෙනෙකු අත්අඩංගුවට ගෙන ඇත. මුලින්ම අත්අඩංගුවට ගත් ටැක්ටරයේ හිමිකරු චාවාකච්චේරී අධිකරණයට ඉදිරිපත් කිරීමෙන් අනතුරුව ලබන මස 14 වනදා දක්වා රිමාන්ඩ් බන්ධනාගාරගත කිරීමට මහේස්ත්රාත්වරයා නියෝග කළේය.
පොලිස් නිලධාරියා ඝාතනය කිරීමට සෘජුවම සම්බන්ධ රියදුරු මේ වන විට ප්රදේශයෙන් පලාගොස් ඇති අතර, ඔහු අත්අඩංගුවට ගැනීම සඳහා පොලිස් කණ්ඩායම් කිහිපයක් පරීක්ෂණ පවත්වයි. මේ අතර, අදාළ ටැක්ටරයේ රියදුරු සහායකයා ද පොලීසිය විසින් අත්අඩංගුවට ගෙන ඇති අතර ඔහුව අධිකරණයට ඉදිරිපත් කිරීමට නියමිතය.
පසුගියදා සිදුවූ මෙම අවාසනාවන්ත සිදුවීමෙන් හෙට්ටිආරච්චිගේ ඇල්බට් නැමති පොලිස් සැරයන්වරයා ජීවිතක්ෂයට පත් වූ අතර තවත් නිලධාරියෙකු තුවාල ලැබීය. සේවය ඉටුකරමින් සිටියදී ඝාතනයට ලක්වූ ඇල්බට් නිලධාරියා මරණින් පසු උප පොලිස් පරීක්ෂක ධූරයට උසස් කිරීමට ද පියවර ගෙන තිබේ.
මේ ලිපියත් කියවන්න –
යාපනය කොඩිකාමම්හිදී වැලි ජාවාරම්කරුවන් පොලිස් සැරයන්වරයෙකු ටැක්ටරයට යටකර මරා දමයි!
