ඉඳුනිල් කහටපිටිය –
කුලියාපිටිය, පහළ වීරඹුව ප්රදේශයේ පිහිටි සිය පෞද්ගලික නිවසේ ගෙවත්තේ තිබී අභිරහස් ලෙස මියගොස් සිටියදී හමුවූ මුදල් අමාත්යාංශයේ බාහිර සම්පත් දෙපාර්තමේන්තුවේ සහකාර අධ්යක්ෂ රංග නිශාන්ත රාජපක්ෂගේ මරණය, තමා විසින්ම සිරුරට සිදුකරගන්නා ලද දරුණු කැපුම් තුවාල හේතුවෙන් සිදුවූ සියදිවි නසාගැනීමක් බව විශේෂඥ වෛද්ය මණ්ඩලය විසින් නිල වශයෙන් අද (01) තහවුරු කළේය.
අප්රේල් 30 වැනිදා පස්වරුවේ සිදුවූ මෙම මරණය මුලින් සැකකටයුතු ලෙස වාර්තා වූ අතර, ඒ පිළිබඳව විධිමත් විද්යාත්මක පරීක්ෂණයක් පැවැත්වීම සඳහා සෞඛ්ය අමාත්යාංශයේ ලේකම් විශේෂඥ වෛද්ය අනිල් ජාසිංහ විසින් ජ්යෙෂ්ඨ අධිකරණ වෛද්යවරුන් සිව්දෙනෙකුගෙන් සමන්විත විශේෂ වෛද්ය මණ්ඩලයක් පත් කරන ලදී.
විශේෂඥ වෛද්ය මණ්ඩලයේ සංයුතිය
මෙම පශ්චාත් මරණ පරීක්ෂණය සහ සිද්ධිය වූ ස්ථානය පරීක්ෂා කිරීම සඳහා පහත සඳහන් ජ්යෙෂ්ඨ වෛද්යවරුන් සහභාගී වූහ:
- වෛද්ය ඉලංගරත්න බණ්ඩා – සභාපති, විශේෂඥ අධිකරණ වෛද්ය නිලධාරී (කුරුණෑගල ශික්ෂණ රෝහල)
- වෛද්ය අජිත් ජයසේන – විශේෂඥ අධිකරණ වෛද්ය නිලධාරී (කුරුණෑගල ශික්ෂණ රෝහල)
- වෛද්ය සම්පත් සේනතුංග – විශේෂඥ අධිකරණ වෛද්ය නිලධාරී (අනුරාධපුර ශික්ෂණ රෝහල)
- වෛද්ය යූ.ඩී.ජී. දිසානායක – විශේෂඥ අධිකරණ වෛද්ය නිලධාරී (නිකවැරටිය රෝහල)
ස්ථානීය පරීක්ෂාව සහ මරණ පරීක්ෂණයේ තීරණාත්මක සොයාගැනීම්
විශේෂඥ වෛද්ය මණ්ඩලය විසින් පශ්චාත් මරණ පරීක්ෂණය පැවැත්වීමට පෙර රංග නිශාන්ත රාජපක්ෂගේ සිරුර හමුවූ කුලියාපිටිය පහළ වීරඹුව ප්රදේශයේ පිහිටි නිවසේ ගෙවත්තට ගොස් ක්ෂේත්ර පරීක්ෂණයක් පවත්වන ලදී. එහිදී සිරුර වැටී තිබූ ආකාරය, කෙසෙල් ගසක් අසල දක්නට ලැබුණු විශාල රුධිර පැල්ලම් සහ සිරුර අසල තිබී සොයාගත් කුඩා පිහිය සම්බන්ධයෙන් විශේෂ අවධානයක් යොමු විය.
අද ( 01 ) කුලියාපිටිය ශික්ෂණ රෝහලේදී පවත්වන ලද සම්පූර්ණ පශ්චාත් මරණ පරීක්ෂණයේදී පහත කරුණු අනාවරණය විය:
මරණයට හේතුව: සිරුරේ ස්ථාන කිහිපයක දක්නට ලැබුණු ගැඹුරු කැපුම් තුවාල හේතුවෙන් අධික ලෙස රුධිරය වහනය වීම (Severe Hemorrhage) මරණයට හේතුව ලෙස වෛද්යවරුන් නිගමනය කර ඇත.
තුවාලවල ස්වභාවය: මියගිය පුද්ගලයාගේ එක් පාදයක ගැඹුරු කැපුම් තුවාල තුනක් සහ එක් අතක දරුණු කැපුම් තුවාලයක් දක්නට ලැබුණි. මෙම තුවාලවල දිශානතිය, ගැඹුර සහ පිහිටීම අනුව ඒවා වෙනත් පුද්ගලයෙකු විසින් සිදු කරන ලද ඝාතන උත්සාහයක ලක්ෂණ පෙන්නුම් නොකරන බව වෛද්ය මණ්ඩලයේ ඒකමතික තීරණය විය.
විද්යාත්මක සාධක: සියදිවි නසාගැනීමකට උත්සාහ කරන අයෙකුගේ සිරුරේ බහුලව දක්නට ලැබෙන ‘පසුබෑමේ හෝ පිරික්සුම් කැපුම් තුවාල’ (Hesitation or Tentative Marks) මෙම සිරුරේ දක්නට ලැබීම තුළින් මෙය තමා විසින්ම සිදුකරගත් තුවාල බව තහවුරු විය. එසේම තෙවැනි පාර්ශවයක ප්රහාරයකින් ආරක්ෂා වීමට උත්සාහ කිරීමේදී ඇතිවන ‘ආරක්ෂක තුවාල’ (Defensive Wounds) සිරුරේ කිසිදු ස්ථානයක දක්නට නොලැබීමද මෙහිදී විශේෂ අවධානයට ලක්විය.
නෛතික සහ විමර්ශන මට්ටම
50 හැවිරිදි දෙදරු පියෙකු වූ රංග නිශාන්ත රාජපක්ෂ මියයන විට රජයේ අරමුදල්වලට අදාළ අමෙරිකානු ඩොලර් මිලියන 2.5ක මහා පරිමාණ සයිබර් මූල්ය වංචාවක් සම්බන්ධයෙන් වැඩ තහනමට ලක්ව විමර්ශනවලට මුහුණ දෙමින් සිටි අයෙකි.
පොලිස් මාධ්ය ප්රකාශක නියෝජ්ය පොලිස්පති මිනුර සේනාරත්න සඳහන් කළේ විශේෂඥ වෛද්ය මණ්ඩලයේ වාර්තාවට අනුව මෙය සියදිවි නසාගැනීමක් බවට දැන් විද්යාත්මකව තහවුරු වී ඇති බවයි. කෙසේ වෙතත් කුලියාපිටිය පොලිසිය විසින් මහේස්ත්රාත් පරීක්ෂණයට අදාළ ඉදිරි විමර්ශන තවදුරටත් ක්රියාත්මක කරනු ලබයි.
මේ ලිපියත් කියවන්න..
