ලලිත් චාමින්ද –
නෙළුව ප්රාදේශිය ලේකම් කොට්ඨාශයට අයත් මිල්ලව ග්රාම නිලධාරි වසමේ යද්දෙහි කන්න නැමති ඉඩමේ අක්කර 02ක පමණ වගාකොට තිබු සම්පුර්ණ තේ වගාවම කිසියම් පිරිසක් විසින් ගලවා ගිනි තබා විනාශකොට ඇති බැව් කුඩා තේ වතු හිමියෙක් වූ තුෂාර නන්ද (50) පවසයි.
තමන් මේ පිළිබද නෙළුව පොලිසියට පැමිණිල්ලක් ඉදිරිපත්කොට ඇතත් නෙළුව පොලිසියෙන්ද තමන්ට සාධාරණයක් ඉටුවි නොමැති බවද හෙතෙම පවසයි. අගනගරයේ පදිංචි කෝටිපති කාන්තාවක් විසින් තම ගෝලබාලයින් යොදවා තේ වගාව සම්පුර්ණයෙන්ම ගලවා දමා ගිනි තබා විනාශකොට ඇති බවද මෙම කුඩා තේ වතු හිමියා කියයි.
” මේ ඉඩම අපේ තාත්තා තමයි භුක්තිවින්දේ . ඊට පසු මෙම ඉඩම මා භුක්ති විදිනවා. මිට වසර තුනකට පමණ ඉහතදි මේ ඉඩමේ මම තේ වගා කළා. මේ වනවිට තේ ඉඩමේ තේ දළු කැඩිමත් සිදුකරමින් පැවතුනා. ඉඩමේ භුක්තිය සඳහා අක්කර බදු මුදල්ද ගෙවලා තියෙනවා. මේ අතර කොළඹ තිඹිරිගස්යාය ප්රදේයේ පදිංචි කාන්තාවක් මා විසින් තේ වගාකොට තිබු ඉඩම තමන් අයිති බව සඳහන් කරමින් ඉඩමෙන් ඉවත්වන ලෙස මට දුරකථනයෙන් තර්ජනය කළා. නෙළුව පොලිසියේ ස්ථානාධිපතිවරයාත් මට දුරකථන ඇමතුමක් ලබාදෙමින් කීවා ඉඩමෙන් ඉවත් වෙන්න කියලා. ”
“මෙම මාසයේ 07 වැනිදින මම ඉඩමේ නොසිටි අවස්ථාවේ ඉඩම තමන් සතු බව කියන කාන්තාව තවත් පිරිසක් සමග පැමිණ තේ ගස් උදුරා දමා වගාව සම්පුර්ණයෙන්ම ගලවා දමලා ගිනි තබා තිබුණා. මේ සදහා නෙළුව පොලිසියේ සහයෝගය මෙම කාන්තාවට ලැබි තියෙනවා. තේ දළු කඩමින් තිබු වගාව තමයි විනාශ කළේ. මේ කරපු අපරාධය දකින විට මගේ පපුව හොස් ගාලා යනවා. තේ වගාවට කරපු විනාශය වෙනුවෙන් මට සාධාරණ වන්දි මුදලක් ලබාදෙන ලෙස ඉල්ලා සිටිනවා.”
රුහුණ රට ගොවි සංවිධානයේ කැදවුම්කරු රවින්ද්ර ජාගොඩ මේ පිළිබද කිවේ මෙවැනි කථාවකි.
“මේ ගොවි මහතාට දැඩි අසාධාරණයක් වෙලා තියෙනවා. තේ වගාව උදුරා දමා විනාශ කිරිම වැරදියි. නෙළුව පොලිසියේ ස්ථානාධිපතිවරයා පක්ෂග්රාහිව කටයුතු කරලා තියෙනවා.වගාවට කරපු හානිය වෙනුවෙන් ගොවි මහතාට සාධාරණ වන්දි මුදලක් ලබාදිය යුතුයි.ඒ වෙනුවෙන් රුහුණ රට ගොවි සංවිධානය පෙනි ඉන්නවා.” මේ පිළිබද නෙළුව පොලිසිය මෙසේ කිවේය.
“මේ ඉඩම වයස අවුරුදු 78ක විතර කාන්තාවකට අයිති ඉඩමක්. මේ කාන්තාව නෙළුව පොලිසියට මිට මාස තුනකට පමණ කලින් පැමිණිල්ලක් දමා තිබුනා. මෙම ඉඩම තමන්ට අයිති ඉඩමක්… ඉඩම සදහා සින්නක්කර ඔප්පුවක් තියෙනවා කියලා. ඒ ඉඩමේ දෙදෙනෙකු තේ වගා කරණවා කියලා. මේ පිළිබද දේපාර්ශවය පොලිසිය කැදවලා පැමිණිල්ල විභාග කළා. ”
“එහිදි ඉඩමේ තේ වගා කළ පුද්ගලයා කිවා තේ වගාව ඉවත් කරගන්නවා කියලා.පස්සේ ඉඩම්හිමි කාන්තාව විදේශතවෙනවා. ඇය යලිත් එනවිට තේ වගාව ඉඩමෙන් ඉවත්කර නොතිබු නිසා තේ වගාව ඉවත් කරලා තියෙනවා. ”
“ඉඩමට ඇතුල්වෙලා තේ වගාව විනාශ කිරිම සම්බන්දයෙන් අදාළ කාන්තාවට එරෙහිව උඩුගම අධිකරණයේ නඩු පවරලා තියෙනවා. ඉඩමේ අයිතිය සම්බන්දයෙන් දිසා අධිකරණයේ නඩුවක් පවරලා නිත්යානුකුල අයිතිය තහවුරුකරගන්න කියලා දේපාර්ශවයටම දැනුම් දුන්නා පොලිසිය අපක්ෂපාතිව රාජකාරිය ඉටුකර තියෙනවා.”
