අයි.පී.එල් ඉන්දියාව හෙම්බත් කළා ද?… ඉන්දියාවට තවත් දැවැන්ත පරාජයක්..

යළිත් ඉන්දියාව දැවැන්ත පරාජයකය.  අයි.පී.එල් ගසා ලෝකය තමන් අතට පත් කරගැනීම පරමාර්ථය වී නම් මේ අප දකින්නේ එහි අනෙක් අන්තය ය. ඉන්දියාව  ක්‍රිකට්වලින් හෙම්බත් වී සිටිනු සේය. පකිස්තානය හමුවේ කඩුලු 10ක දැවැන්ත පරාජයක් ලැබූ ඉන්දියාව නවසීලන්තය හමුවේ අද (31) කඩුලු 8ක පරාජයක් ලැබුවේය.

ඩුබායි ජාත්‍යාන්තර ක්‍රිකටට් ක්‍රීඩාංගනයේ තරගය පැවැත්විනි. ඉන්දියානුවෝ නවසීලන්තය අභියස ලකුණු 110කට සීමා වුනේය. ඒ කඩුලු 07ක් දැවී යමිනි. කාසියේ වාසිය දිනූ නවසීලන්ත කණ්ඩායම පන්දු රැකීම තේරුවේය. කාසියේ වාසිය  මේ තරගාවලියේ ජයග්‍රහණයට පදනමක් වූ බව සැබෑය. නමුත් මේ තරම් දුර්වල ක්‍රීඩා විලාශයකට කාසියේ වාසිය වගකියන්නේ නැති බව පෙනුණි.

ඉන්දීය ආරම්භක පිතිකරුවන්ට වැඩි වෙලා ක්‍රීඩා කිරීමට අවස්ථාව ලැබුණේ නැත. ඉශාන් ක්‍රිෂාන් පන්දු 8ක දී ලකුණු 4කට දැවී ගියේය. කේ.එල්. රාහුල් ලබා ගත්තේ ලකුණු 18කි. පන්දු කීපය දී වේගවත් ප්‍රහාරයක් දියත් කළ බව පෙනුනත් පළමු කඩුල්ල බිඳ වැටීමෙන් පසු පැමිණි රෝහිත් ෂර්මා ලබා ගන්නේ ලකුණු 14ක් පමණි.  විරාට් කෝලි ලකුණු 09කි. හර්දික් පාණඩ්‍යා ලකුණු 23ක් හා රවීන්ද්‍ර ජඩේජා ලකුණු 26ක් අවසාන මොහොතේ නොලබන්නට ඉන්දියාව ලකුණු 100වත් ඉක්මවා යන්නේ නැත. පන්දු ඕවර 20ක්ම පන්දුවට පහර දී මේ තරම් අසීරුවෙන් ලකුණු 110ක් රැස්කරනු ඉන්දියානු ක්‍රීඩා ලෝලීන් බලා සිටියේ අපේෂා රහිතවය.

ඔවුන්ගේ මුල්ම බිඳ වැටීම සිදුවූයේ ඉන්දියාව පකිස්තානය හමුවේ කඩුලු 10කින් පරාජය වීමෙනි.

නවසීලන්ත පන්දු යවන්නන් පස් දෙනාම නියමිත පන්දු ඕවර 04 යැව්වේය. කදිම පන්දු යැවීම වාර්තා කළේ ට්‍රෙන්ට් බෝල්ට් ය. බෝල්ට් ලකුණු 20කට කඩුලු 03ක් දවා ගත්තේය. ඉෂ්  සෝධි ලකුණු 17 කඩුලු 02ක් දවා ගත්තේය. ඉන්දියානු පිතිකරුවන් මැනවින්ම පාලනය කළේ ඔහුය. සෝධිගේ ඕවරයකට ලකුණු ලබා දීමේ සාමාන්‍ය 4.25ක් විය. ටිම් සවුති හා ඇඩම මිල්නෙ කඩුල්ල බැගින් දවා ගත්හ. ඉන්දියාව ලකුණු 110කට සීමා විය.

පිළිතුරු ඉනිම ක්‍රීඩා කිරීමට පැමිණි නවසීලන්ත ක්‍රීඩකයන් ආරම්භක පිතිකරුවන් වූ  මාටින් ගුප්ටිල් සහ ඩෙරිල් මිෂෙල් මැනවින් පන්දුවට පහර දුන්හ. ගුල්පිට් ලකුණු 20කට දැවී ගියේය. ඩේරි මිෂෙල් ලකුණු 49ක් ලබා ගත්තේය. ඒ පන්දු 35ක දීය. දැවී ගියේ ඔවුන් දෙදෙනා පමණි. නායක කේන් විලියම්සන් සහ කඩුලු රකින ක්‍රීඩක ඩෙවොන් කොන්වේ පහසුවෙන් තරගය නිමා කළහ. කෙන් විල්යම්සන් පන්දු 31කට ලකුණු 33ක් රැස් කරගෙන සිටියේය.

නවසීලන්ත පිතිකරුවෝ කඩුලු 2ක් දැවී ලකුණු 111ක් ලබා ගන්නට වැය කළේ පන්දු ඕවර 14.3ක් පමණි.