කපිල කේ. හීනටියන –
2026 විස්සයි 20 ලෝක කුසලානය සඳහා වන 15 දෙනෙකුගෙන් යුත් සංචිතය පාකිස්තානය විසින් නම් කර තිබේ.
බංග්ලාදේශය තරගාවලියෙන් ඉවත් කිරීම සම්බන්ධයෙන් පකිස්ථානය දැක්විය යුතු ප්රතිචාරය සම්බන්ධව පකිස්ථාන ක්රිකට් මණ්ඩලයේ සභාපති මොහ්සින් නක්විගේ දැඩි ප්රකාශයෙන් පසුව මෙම නම් කිරීම සිදුවී තිබීම විශේෂය. පකිස්ථාන ක්රිකට් පාලක මණ්ඩලයේ සභාපතිවරයා ප්රකාශ කළේ ICCයඅනුගමනය කරන්නේ ඉන්දියාවට ලැදි දෙබිඩි පිළිවෙතක් බවය. බංගලාදේශයට අසාධාරණයක් වූ බව ද නක්වි ප්රකාශ කළේය.
එමෙන්ම මේ වනවිට බංගලාදේශය විස්සයි 20 ලෝක කුසලාන තරගාවලියෙන් ඉවත් කර ඒ වෙනුවට ස්කොට්ලන්තය තෝරා ගත්තාක් සේ පකිස්ථානය වෙනුවට සමහර විට 24 වැනියා ලෙස සුදුසුකම් ලැබූ කණ්ඩායම තෝරා ගැනීමට ICC ට සිදුවිය හැකි බව ද නක්වි ප්රකාශ කළේය.
ඔහු පෙන්වා දුන්නේ මේ වනවිට මෙම ප්රශ්නය ක්රිකට් පාලක මණ්ඩලයෙන් ඔබ්බට ගිය රාජ්ය තාන්ත්රික ගැටලුවක් බැවින් පකිසථානය ලෝක කුසලානයට සහභාගී වනවාද නැද්ද යන්න පකිස්ථාන අගමැතිවරයා තීරණය කරනු ඇති බවය.
අයි.සී.සී තර්ජනය
කෙසේ වෙතත් මේ වනවිට අගමැතිවරයාගේ තීරණය ප්රකාශ වී ඇතැයි තේරුම් ගත හැකිවන ආකාරයට නක්වි ගේ අදහස් දැක්වීමෙන් දිනකට පසු, පාකිස්තානය ලෝක කුසලානය සඳහා ඔවුන්ගේ සංචිතය ප්රකාශයට පත් කර තිබේ. මක්නිසාද යත් විස්සයි20 ලෝක කුසලාන තරගාවලියෙන් ඉවත් වුවහොත් පාකිස්තානයට පෙර නොවූ විරූ සම්බාධක පනවන බවට අයිසීසීය අනතුරු අඟවා ඇතැයි වාර්තාවන බැවිනි. විදේශ මාධ්ය වාර්තා කර තිබුණේ මෙම වර්ජනය ක්රියාත්මක වුවහොත් පාකිස්තානයට දිගුකාලීන මූල්යමය හා ව්යුහාත්මක හානියක් ඇතිකළ හැකි අයි.සී.සී. සම්බාධක හමුවේ ගෝලීය ක්රිකට් ක්රීඩාවෙන් හුදකලා විය හැකි බවය.
පාකිස්තානය ලෝක කුසලානය වර්ජනය කිරීමට තෝරා ගන්නේ නම්, ICC එය පාලක මණ්ඩලයේ අධිකාරියට සෘජු අභියෝගයක් ලෙස සලකන බවත්, ගෝලීය තරඟාවලිවල අඛණ්ඩතාව ආරක්ෂා කිරීම සඳහා ස්ථිරව ප්රතිචාර දැක්වීමට බලා පොරොත්තුවන බවත් විදෙස් මාධ්ය වාර්තා කර තිබිණි.
පකිස්ථානයට දඬුවම් කළ හැකි පෙර නොවූ විරූ සම්බාධක අතරට
- පාකිස්තාන සුපර් ලීගයට (PSL) විදේශීය ක්රීඩකයින්ට සහභාගී වීම තහනම් කිරීම
- ICC අරමුදල් අඩු කිරීම සහ ඒ හේතුවෙන් පකිස්ථාන ක්රිකට් පාලක මණ්ඩලයට දැවැන්ත ආදායම් පාඩුවක් ඇති කිරීම
- පාකිස්ථාන සුපර් ලීගය සඳහා ජාත්යන්තර පිළිගැනීම සහ වාණිජමය සහාය ඉවත් කිරීම
- ආසියානු කුසලානයෙන් බැහැර කිරීම
- පාකිස්තානය සම්බන්ධ සියලුම ද්විපාර්ශ්වික තරඟාවලි අත්හිටුවීම වැනි සම්බාධක ඒ අතර විය හැකි බව වාර්තා වී ඇත.
කෙසේ වෙතත් ලෝක කුසලාන සහභාගීත්වය සම්බන්ධයෙන් පකිස්ථාන ක්රිකට් ආයතනය ඒකපාර්ශ්වික තීරණයක් නොගන්නා බව නක්වි පැහැදිලි කර තිබිණි. මාධ්යයට අදහස් දක්වමින් ඔහු පැවසුවේ අගමැති ෂෙබාස් ෂරීෆ් විදේශගතව සිට ආපසු පැමිණි පසු අවසන් තීරණයක් අපේක්ෂා කරන බවය.
නම් කළ සංචිතය –
මේ වනවිට නම් කර ඇති සංචිතයෙන් ජ්යෙෂ්ඨ ක්රීඩකයින් වන මොහොමඩ් රිස්වාන් සහ හරිස් රවුෆ් ඉවත් කර ඇත. අවසන් වරට 2024 දී ක්රීඩා කළ පසු රිස්වාන් වසරකට වැඩි කාලයක් පාකිස්තානයේ විස්සයි 20 තරග සඳහා සහභාගී වී නොමැත. 2025 ආසියානු කුසලාන අවසන් මහා තරඟයේදී ඔහු පෙන්වූ අඩු දක්ෂතා හේතුවෙන් වේග පන්දු යවන හරිස් රවුෆ් ද කණ්ඩායමෙන් ඉවත් කර ඇත. මෑතකදී ඕස්ට්රේලියාවේ පැවති 2025-26 බිග් බෑෂ් ලීග් (BBL) තරඟයේදී ඔහු දැක්වූ දුර්වලතා නොතකා ප්රවීණ පිතිකරු බාබර් අසාම් කණ්ඩායමේ ඔහුගේ ස්ථානය රඳවා ගෙන තිබේ.
සල්මන් ආගාගේ නායකත්වයෙන් යුත් පාකිස්තානය, නෙදර්ලන්තය, ඇමරිකා එක්සත් ජනපදය, නැමීබියාව සහ ඉන්දියාව සමඟ A කාණ්ඩයේ ස්ථානගත කර ඇත. ඔවුන් පෙබරවාරි 7 වන දින කොළඹදී ඔවුන්ගේ ආරම්භක තරඟයේදී නෙදර්ලන්තයට මුහුණ දීමට නියමිතය.
තරඟාවලියට පෙර, පාකිස්තානය ජනවාරි 29, 31 සහ පෙබරවාරි 1 යන දිනවල ලාහෝර් හි ගඩාෆි ක්රීඩාංගණයේදී තරඟ තුනකින් යුත් T20I තරගාවලියකට ඕස්ට්රේලියාවට මුහුණ දීමට නියමිත අතර, ජනවාරි 25 වන දින සිට සූදානම ආරම්භ වේ.
2026 T20 ලෝක කුසලානය සඳහා වන පාකිස්තාන සංචිතය මෙසේය – සල්මන් අලි ආගා (නායක), අබ්රාර් අහමඩ්, බාබර් අසාම්, ෆහීම් අෂ්රෆ්, ෆකාර් සමාන්, කවාජා මොහොමඩ් නෆේ (කඩුල්ලු රකින ක්රීඩක ), මොහොමඩ් නවාස්, මොහොමඩ් සල්මන් මිර්සා, නසීම් ෂා, සහිබ්සාඩා ෆර්හාන් (කඩුලු රකින ක්රීඩක ), සයිම් අයුබ්, ෂහීන් ෂා අෆ්රිඩි, ෂඩාබ් ඛාන්, උස්මාන් ඛාන් (කඩුලු රකින ක්රීඩක) සහ උස්මාන් තාරික්.
