-
ක්රිකට් ප්රේමී විදේශගත ශ්රී ලාංකිකයෙක් තම පුද්ගලික මුදලින් හැදූ ක්රීඩාංගනය… අධීක්ෂණය කර ඇත්තේ ශ්රී ලංකාවේ විශිෂ්ටම ක්රිකට් ක්රීඩකයෙක් සහ පරිපාලකයෙක් වූ දිවංගත බන්දුල වර්ණපුර
-
මේ අත්තනෝමතික තහනම ක්රියාත්මක කර ඇත්තේ මඩකලපු දිස්ත්රික් ක්රිකට් සංගමයේ ප්රධාන නිලධාරීන් දෙදෙනකු හා එම පළාතේ ක්රිකට් නිලවරණ කටයුතු මෙහෙයවන ක්රිකට් ආයතනයේ ඉහළ නිලධාරියකුගේ බලපෑම නිසා…
ක්රිකට් ආයතනය විසින් කෝටි ගණන් වියදම් ඇස්තමේන්තු හදමින් තැන් තැන් වල ක්රිකට් ක්රීඩාංගණ හදන්න සැළසුම් කරද්දී තනි මිනිසකු විසින් මිලියන 750 ක් වැය කොට මඩකලපුවේ ඉදි කර ඇති අලංකාර ක්රිකට් ක්රීඩාංගණය ක්රිකට් දේශපාලනය හේතුවෙන් කිසිදු ක්රිකට් ආයතන තරගයක් නොපවත්වන ලෙස තහනමකට ලක් කොට ඇත.
ක්රිකට් ආයතනයේ විධායක සභාව විසින් ගන්නා ලද මෙම තීරණය හේතුවෙන් ක්රීඩාංගණ නොමැති පළමු පෙළ ක්රීඩා සමාජ කිහිපයකටම ගැටලුවකට මුහුණ දීමට සිදුව තිබේ.
පසුගිය ප්රිමියර් දෙවන කොටසේ තරගාවලියේ තම හෝම් තරග හතක් සඳහා ගාල්ල ක්රිකට් ක්රීඩා සමාජය විසින් මෙම කොඩමුනෙයි ක්රීඩාංගණය වෙන් කරගෙන තිබුණත් ක්රිකට් විධායක සභාව විසින් ගන්නා ලද අත්තනෝමතික තීරණය හේතුවෙන් ඔවුන්ට ක්රීඩාංගණ සොයා ගැනීම අතිශයින් දුෂ්කර කටයුත්තක් බවට පත්ව තිබිණ.
එළඹෙන ප්රිමියර් තරගාවලිය සඳහා තම තරග පැවැත්වීමට මෙම ක්රීඩාංගණය ලබා දෙන මෙන් හලාවත මේරියන්ස් ක්රීඩා සමාජයද ඉල්ලා ඇතත් ක්රිකට් බලධාරීන් විසින් එය ප්රතික්ෂේප කර තිබේ.
මුළු උතුරු නැගෙනහිර පළාත් දෙකටම ඇති මේ මට්ටමේ අංග සම්පූර්ණ ක්රිකට් ක්රීඩාංගණය වන්නේ කොඩමුනෙයි ක්රිකට් ක්රීඩාංගණයයි.
මඩකලපුවේ උපත ලබා එහි ශා. මයිකල් විදුහලේ අධ්යාපනය ලද පුවනසිංහම් වසීහරන් නම් දැනට එංගලන්තයේ පදිංචිව සිටින ක්රිකට් ප්රේමී ශ්රී ලාංකිකයකු විසින් තම පෞද්ගලික ධනයෙන් ඉදිකරන ලද මෙම ක්රීඩාංගණයේ ඉදිකිරීම් භාරව කටයුතු කර ඇත්තේ හිටපු ටෙස්ට් ක්රිකට් නායක බන්දුල වර්ණපුර විසිනි.
ඔහු මාස ගණනක් මඩකලපුවේ රැඳී සිටිමින් එම කටයුත්ත කර තිබේ.
මෙම ක්රීඩාංගණය 2022 වසරේ ආරම්භ කිරීම නිමිත්තෙන් අර්ජුන රණතුංගගේ නායකත්වයෙන් යුත් හිටපු ශ්රීලංකා ක්රීඩකයන්ගෙන් සැදුම් ලත් කණ්ඩායමක් ප්රදර්ශන තරගයකටද සහභාගි විය.
ඉන්පසු මේ දක්වා එහි දෙස් විදෙස් කණ්ඩායම් රැසක් තරග පවත්වා ඇති අතර ක්රිකට් ආයතනයේ සරා කුසලාන තරග නවයක්ද පවත්වා තිබේ.
නැගෙනහිර පළාතේ සංචාරක ආකර්ෂණය දිනාගත හැකි ස්ථානයක් ලෙසද මෙය ප්රවර්ධනය කර ගත හැකි බවත් ඉදිරියේ ජාත්යන්තර තරග පැවැත්වීමට හැකි මට්ටමට දියුණු කර ගත හැකි බවත් මෙහි ක්රීඩා කළ ක්රීඩකයෝ පවසති.
බාහිරින් පැමිණෙන කණ්ඩායම් වලට නවාතැන් ගත හැකි පහසුකම්ද ක්රීඩාංගණයම තුළ ඇති අතර පුහුණුව සඳහා පුහුණු තණ තීරු අටක්ද මෙහි තිබීමත් ඉලෙක්ට්රොනික් ලකුණු පුවරුවක්ද තිබීමත් විශේෂත්වයකි.
ලංකාසරට වාර්තාවන ආකාරයට ක්රිකට් විධායක සභාව විසින් මෙම ක්රීඩාංගණයට අත්තනෝමතික ලෙස තරග තහනමක් පවරා ඇත්තේ මඩකලපු දිස්ත්රික් ක්රිකට් සංගමයේ ප්රධාන නිලධාරීන් දෙදෙනකු හා එම පළාතේ ක්රිකට් නිලවරණ කටයුතු මෙහෙයවන ක්රිකට් ආයතනයේ ඉහළ නිලධාරියකුගේ බලපෑම නිසාවෙනි.
මේ අසාධාරණ තහනම හේතුවෙන් තමන්ට කියා ක්රීඩාංගණයක් නොමැති පළමු පෙළ ක්රිකට් ක්රීඩා සමාජ රැසකට හොඳ තණතීරු හා අවට පිටියක් සහිත ක්රීඩාංගණයක් තම තරග වෙනුවෙන් යොදා ගැනීමේ අවස්ථාව අහිමිව තිබේ.
මෙම අසාධාරණ හා අත්තනෝමතික තීරණයට එරෙහිව අභිනව ජනාධිපති වරයාට හා ක්රීඩා ඇමතිනියද වන අගමැතිවරියට ලිඛිතව දැන්වීමට කොඩමුනෙයි ක්රීඩාංගණ අධිකාරිය කටයුතු කරමින් සිටින බව වාර්තා වේ.
