ශ්රී ලංකා ඇෆ්ගනිස්ථාන දෙවැනි එක් දින තරගයේ ශ්රී ලංකා ඉනිම අවසානය. පල්ලේකැලේ ජාත්යාන්තර ක්රීඩාංගනයේ පැවැත්වෙන තරගයේ දී කාසියේ වාසිය දිනූ ශ්රී ලංකා කණ්ඩායම පන්දුවට පහරදීම තෝරාගෙන තිබිණි.
හඹා යෑම පිළිබඳ විශ්වාසය තැබිය හැකි ඉතිහාසයක් සහිත ක්රීඩාංගනයක පන්දුවට පහර දීම තෝරාගත් ශ්රී ලංකා කණ්ඩායම කඩුළු 6ක් දැවී ලකුණු 308ක් රැස් කරගෙන ඇත.
ඉතාම ඉහළ තරගකාරීත්වයක් සහිතව තරගවැදුන ඇෆ්ගනිස්ථාන කණ්ඩායම මීට වඩා පීඩනයකින් නිමාකළ හැකිව තිබූ තරගයේ ලිහිල් කළ මුදා හැරියේ 10 වැනි පන්දු ඕවරයේ අවසන් පන්දුවේ දී කුසල් මෙන්ඩිස් විසින් ලබා දුන් ඉතාම පහසු උඩපන්දුව අත්හැරීමෙනි. ෆසාල්හක් ෆාරුකීගේ පන්දුවක් හමුවේ කුසල් මෙන්ඩිස් මිඩ් විකට් කලාපයට ලබා දුන් ඉතා පහසු උඩ පන්දුව ගුල්බඩින් නබී අතහැරියේය.
ඒ වනවිට ලකුණු 41කි. ආරම්භක පිතිකරුවන් දෙදෙනාම දැවී ගොස්ය. ඒ වනවිට ඉතා අසීරුවෙන් පන්දුවට පහර දෙමින් සිටි කුසල් මෙන්ඩිස් පන්දු 17ක් තුළ ලබාගෙන සිටියේ ලකුණු 12ක් පමණි. ඒ උඩපන්දුව රැකගත්තා නම් තරගය මීටත් වඩා හාත්පසින් වෙනස් විය හැකිව තිබුණු බව ජාත්යාන්තර විචාරකයෝ කීහ. අත්හරින උඩපන්දු තරග අත් හරින බව ඔවුහු කීහ.
ඇෆ්ගනිස්ථාන කණ්ඩායම තරගයේ දී උඩපන්දු 03ක් අත හැරියේය. එකක් කුසල් මෙන්ඩිස්ගේය. අනෙක චරිත් අසලංකගේ ය. තුන්වන උඩපන්දුව වනිඳු හසරංග ලබාදුන්නේය.
අවාසනාව වන්නේ ඒ උඩ පන්දු තුනම අතහැරියේ ෆසාල්හක් ෆාරුකීගේ පන්දුවලට වීමය. කුසල් මෙන්ඩිස්ගේ උඩ පන්දුව අත්හැරිය ගුල්බඩීන් නබි හසරංගවත් අත හැරියේය. එවර ඔහු පන්දු රකිමින් සිටියේ මිඩ් ඕෆ් කලාපයේය. ඒ 45වන ඕවරයේ දෙවැනි පන්දුවේ ය. එම ඕවරයේම අවසන් පන්දුවේ දී ඩීප් ස්ක්වෙයාලෙග් හි හතරේ සීමාව අසල පන්දු රැකි ඕමාර්සායි අතින් අසලංකව ගිලිහී ගියේය.
මේ තරගය වාසනාව අතින් ශ්රී ලංකාව පැත්තේ බව දැනට පෙනී යන්නේ මේ උඩපන්දු අත්හැරිය විලාශය ගැන පෙනෙන විටය. මෙවැනිම උඩපන්දු අත්හැරීමකින් තොරව ඉනිම පිටියේ හැසිරෙන්නේ නම් වැඩි වාසිය අත් කරගැනීමේ අවස්ථාව දෛවය අනුව ලියැවී ඇති බව හැඟෙන්නේය.
පිතිකරණය
පසුගිය තරගයේ විශිෂ්ට ද්විත්ව ශතකයක් ලබා ගත් ශ්රී ලංකා ආරම්භක පිතිකරු පැතුම් නිශ්ශංක ලකුණු 18කට දවා ගැනීමට වේග පන්දු යවන අස්මතුල්ලා ඕමාර්සායි සමත් වූයේය. තුන්ව ඕවරයේ අවසන් පන්දුවට ඔහු කඩුල්ල මුවා කිරීමේ වරදට හසු කරගැනිමට අස්මතුල්ලා සමත් වූයේය.
ඒ වනවිට හතරේ පහර තුනක් සමග ලකුනු 18ක් පන්දු 17ක් තුළදී ලබා ගැනීමට පැතුම් නිශ්ශංක සමත් වී තිබිණි. ඊට හතරේ පහර තුනක් ඇතුළත් විය. දැවී යෑම සම්බන්ධව නැවත විමසීමක් ඉල්ලා සිටියත් ඒ වනවිට පැතුම් නිශ්ශංකට එම ඉල්ලීම කළ හැකිව තිබුණු තත්ත්පර 15 කාලය පසු වී තිබිණි.
මේ වනවිට ඇෆ්ගනිස්ථාන පන්දු යවන්නන් අනෙක් අන්තයේ තරගය ආරම්භ කළ අවිශ්ක ප්රනාන්දු වෙත දැඩි පීඩනයක් එල්ල කරමින් සිටියහ. ඇත්තටම ඔහු ක්රිඩා කළේ ඉතා අසරණ විලාශයෙනි. පන්දු 23ක දී ලකුණු 05ක් පමණක් ලබා සිටිය දී අවිශ්ක ප්රනාන්දු ෆසාල්හක් ෆාරුකී ගේ පන්දුවක් ඉදිරියේ පොයින්ට්හි පන්දු රැකි ගුල්බඩීන් නබි අතට උඩ පන්දුවක් දී දැවී ගියේය.
අනතුරුව පිටියට පැමිණියේ කුසල් මෙන්ඩිස්ය. 10 වැනි පන්දු ඕවරයේ අවසන් පන්දුවට ඉතා දුර්වල පහරක් එල්ල කර ලබා දුන් උඩපන්දුව අත හැරීමෙන් දෙවැනි ජීවිතයක් ලද කුසල් මෙන්ඩිස් ලකුණු 61ක් ලබා ගත්තේය. ඔහු හා එක්ව සධීර සමරවික්රම තුන්වන කඩුල්ල වෙනුවෙන් ලකුණු 103 සම්බන්ධතාවයක් ගොඩනැගුවේය. සධීර සමරවික්රම තුන්වන කඩුල්ල ලෙස ලකුණු 52කට දැවී යන්නේ ය. ඔහු පන්දු 61කට මුහුණ දෙමින් ගොඩනැගූ ඉනිමේ දී එල්ල කරන්නේ හතරේ පහර 03ක් පමණි. ක්වයිස් අහමඩ්ගේ පන්දුවකට මිඩ් විකට් කලාපයට උඩපන්දුවක් දී සධීර දැවී යන්නේ ලකුණු 52ක් ලබාගෙනය. 3වන කඩුල්ල ලකුණු 139 දී දැවී ගියේය.
චරිත් අසලංක සමග එක්වන කුසල් මෙන්ඩිස් සධීර නික්ම ගිය පසු වැඩි වෙලාවක් පිටියේ රැඳී සිටියේ නැත. ඔහු ලද දෙවැනි ජීවිතය මීට වඩා ඵලදායී කරගැනීමට තිබුණු බව ක්රිකට් විචාරකයෝ විශ්වාස කළහ. හතරේ පහර 06ක් සහ එක් 06 පහරක් සමග ලකුණු 61ක් ලබා ගන්නා කුසල් මෙන්ඩිස් අස්මතුල්ලා ඕමාර්සායි ගේ කෙටි පන්දුවකට පුල් පහරක් එල්ල කිරීමට ගොස් දැවී ගියේය. ඒ ඩීප් බැක්වර්ඩ් ස්ක්වෙයාලෙග් හි පන්දු රැකි රහමනුල්ලා ගුර්බාස් අතටම උඩපන්දුවක් ලබා දීමෙනි. 28 වැනි ඕවරයේ 3 වැනි පන්දුවේ දි ඔහු දැවී යනවිට මුළු ලකුණු සංඛ්යාව ලකුණු 147කි.
ඉන් අනතුරුව පිටියට එක්වන ජනිත් ලියනගේ චරිත් අසලංක සමග එක් වී විශිෂ්ට ඉනිමක් ගොඩනැගූහ. පස්වන කඩුල්ල වෙනුවෙන් ගොඩ නැගූ ලකුණු 111ක එම සම්බන්ධතාවය නොවන්නට ශ්රී ලංකා කණ්ඩායමට ලකුණු 308ක ඉලක්කය සිහිනයකි. එසේ සිතෙන්නේම මේ වනවිට වනිඳු හසරංගගේ පෙර තිබුණු පිතිකරණ පරිචය ඔහුගෙන් ගිලිහී ගොස් ඇති ඛේදනීය ආකාරය දකින විටය. මෑත කාලය පුරාම ඔහු පිතිකරුවෙක් ලෙස සාර්ථක වූයේ නැත.
ජනිත් ලියනගේ පන්දු 48ක් තුළ මනරම් අර්ධ ශතකයක් රැස් කළේය. ඊට හතරේ පහර දෙකක් මෙන්ම හයේ පහර දෙක්ක ඇතුළත් විය. චරිත් අසලංක මෙන්ම ජනිත් ලියනගේ කඩුළු අතර දිවයමින් ලකුණු රැස්කළ ආකාරය පෙන්වා දුන්නේ ක්රීඩකයන්ගෙන් මෑත කාලයේ දී ගිලිහී ගිය ජවය පවත්වා ගත යුතු ආකාරය ය.
ශ්රි ලංකා ඉනිමේ ඉහළම ක්රීඩා විලාශය පෙන්නුම් කළේ චරිත් අසලංකය. චරිත් නොදැවි ලකුණු 97ක් රැස් කළේය. ඒ පන්දු 74ක දී ය. හතරේ පහර 09ක් සහ හයේ පහර 02ක් ඊට ඇතුළත් විය. අවසන් ඕවරයේ 05වන පන්දුවේ දී ලකුණකට පැති මාරු කර නොගෙන තමන් ගැන කල්පනා කර අවසන් පන්දුවට මුහුණ දුන්නා නම් බොහෝ විට ඔහුට ශතකය ලබා ගැනීමට ඉඩ තිබිණි. එහෙත් කණ්ඩායම වෙනුවෙන් ක්රීඩා කළ අසලංක ශතකය අත්හැරියේය.
එහෙත් ඉතිරි වූ පන්දුවෙන් චරිත්ට හෝ කණ්ඩායමට සාධාරණයක් කිරීමට අනෙක් අන්තයේ දැවී යෑමේ අවස්ථා දෙමින් ක්රීඩා කරමින් සිටි වනිඳු හසරංගට හැකි වූයේ නැත. ලකුණු 13ක් ලබාගෙන සිටි වනිඳු හසරංග අවසාන පන්දුවේ දී දැවී ගියේය.
පන්දු යැවීම –
තරගයේ අවාසනාවන්ත පන්දු යවන්නා ෆසාල්හක් ෆාරුකීගේ උඩ පන්දු තුනක් ගිලිහී ගිය පසුත් කඩුල්ලක් ලබා ගත්තේය. ඔහු පන්දු ඕවර 10 තුළ එක් නිලකුණු පන්දු ඕවරයක් ද යැව්වේය. ලකුණු 55ක් ලබා දුන්නේය.
අස්මතුල්ලා ඕමාර්සායි ලකුණු 56ට කඩළු 03ක් ලබා ගත්තේය. නූර් අහමඩ් සහ ක්වයිස් අහමඩ් කඩුල්ල බැගින් ලැබූහ.
ලකුණු 309ක ජයග්රාහී ඉලක්කයක් සොයා ඇෆ්ගනිස්ථාන කණ්ඩායම දැන් ඉනිම අරඹා ඇත.
