භාණ්ඩ අපනයනකරුවන් සහ වක්ර අපනයනකරුවන් (Indirect Exporters) විසින් තමන්ට ලැබෙන අපනයන ආදායම්වලින් අවසර ලත් ගෙවීම් සිදු කිරීමෙන් අනතුරුව ඉතිරි වන ශේෂ විදේශ විනිමය මුදල් (Residual Proceeds), උදාවන ඊළඟ මාසයේ 10 වැනිදා හෝ ඊට පෙර අනිවාර්යයෙන්ම ශ්රී ලංකා රුපියල් බවට පරිවර්තනය කළ යුතු බව දන්වමින් ශ්රී ලංකා මහ බැංකුව විසින් අති විශේෂ ගැසට් නිවේදනයක් නිකුත් කර තිබේ.
“2026 අංක 2 දරන ශ්රී ලංකාව තුළට අපනයන ආදායම් නැවත ගෙන්වා ගැනීමේ රීති” (Repatriation of Export Proceeds into Sri Lanka Rules No. 2 of 2026) ලෙස හඳුන්වා ගැසට් කළ මෙම නව රෙගුලාසි මාලාව, පාර්ලිමේන්තුවේ අනුමැතිය ලබන දිනයේ සිට බලාත්මක වීමට නියමිතය.
මීට පෙර ක්රියාත්මක වූ 2024 අංක 1 දරන රීති සහ 2026 ජනවාරි 30 දිනැති අංක 2473/30 දරන අතිවිශේෂ ගැසට් පත්රය මඟින් පනවා තිබූ 2026 අංක 1 දරන රීති තවදුරටත් සංශෝධනය කරමින් මහ බැංකුව මෙම නව ගැසට් නිවේදනය නිකුත් කර තිබේ. මෙම නව නීති පැනවිමට පෙර අපනයනකරුවන්ට මෙම ඉතිරි අපනයන ආදායම් පරිවර්තනය කිරීම සඳහා ලබා දී තිබුණේ ඊළඟ මාසයේ 07 වැනිදා දක්වා වූ කාලසීමාවකි.
නව රෙගුලාසිවලට අනුව, ඕනෑම දින දර්ශන මාසයක් (Calendar Month) තුළ ශ්රී ලංකාවට අපනයන ආදායම් ලබන සෑම භාණ්ඩ අපනයනකරුවෙකුම සහ විදේශ විනිමය මඟින් ගෙවීම් ලබන වක්ර භාණ්ඩ හා සේවා අපනයනකරුවෙකුම, තමන්ගේ විදේශ විනිමය ආදායම් පහත සඳහන් අවසර ලත් ගෙවීම් සඳහා පමණක් භාවිත කළ යුතු අතර, ඉන්පසු ඉතිරි වන සියලුම ශේෂ මුදල් ඊළඟ මාසයේ 10 වැනිදා හෝ ඊට පෙර අනිවාර්යයෙන්ම රුපියල් බවට පරිවර්තනය කළ යුතුය.
අපනයනකරුවන්ට විදේශ විනිමයෙන් සිදු කළ හැකි අවසර ලත් ගෙවීම්:
- අපනයන ව්යාපාරයට අදාළ ජංගම ගනුදෙනු: අපනයන ව්යාපාරයට සෘජුවම සම්බන්ධ ජංගම ගනුදෙනුවලට අදාළ ගෙවීම් (මීට මාසයක කාලසීමාවක් සඳහා වන බැඳීම්/වියදම් ද ඇතුළත් වේ).
- විදේශ ව්යවහාර මුදල් ණය පියවීම්: මහ බැංකු රෙගුලාසිවලට අනුකූලව ලබාගෙන ඇති විදේශ විනිමය ණය සහ පහසුකම් වෙනුවෙන් වන ණය සේවාකරණ වියදම් සහ ණය ප්රතිපූරණය කිරීම් (මීට මාසයක ණය බැඳීම් ද ඇතුළත් වේ).
- ලාභාංශ සහ විදේශිකයන්ගේ වැටුප්: මෙරට රැඳී නොසිටින (Non-resident) ආයෝජකයන් වෙනුවෙන් ප්රකාශයට පත් කරන ලද ලාභාංශ (Dividends) ගෙවීම් සහ විදේශ විනිමය පනතේ විධිවිධාන යටතේ අවසර ලබා දී ඇති විදේශීය ජාතිකයන් හෝ ද්විත්ව පුරවැසිභාවය හිමි විදේශගත සේවකයන්ගේ වැටුප් ගෙවීම්.
- සංචාරක වියදම්: අපනයන ව්යාපාරයට අදාළ සංචාරක අරමුණු සඳහා විදේශ ව්යවහාර මුදල් නෝට්ටු වශයෙන් ලබාගැනීම් හෝ අරමුදල් හුවමාරු කිරීම්.
- රජයේ ණය සුරැකුම්පත් ආයෝජන: ශ්රී ලංකා රජය විසින් විදේශ ව්යවහාර මුදලින් නිකුත් කරනු ලබන ණය සුරැකුම්පත්වල (Debt Securities) ආයෝජනය කිරීම් (මෙය තමන්ට ලැබුණු සමස්ත අපනයන ආදායමෙන් 10% ක ප්රතිශතයක් දක්වා පමණක් සීමා වේ).
- වක්ර අපනයනකරුවන්ට ගෙවීම්: විදේශ විනිමය පනතේ විධිවිධාන යටතේ අවසර දී ඇති පරිදි, විදේශ විනිමය බැඳීම් පවතින වක්ර භාණ්ඩ හා සේවා අපනයනකරුවන් වෙත සිදු කරනු ලබන ගෙවීම්.
මෙම නව රීති මඟින් වක්ර අපනයනකරුවන් සඳහා ද විශේෂ රෙගුලාසියක් හඳුන්වා දී ඇත. ඒ අනුව, ඉහත සඳහන් පරිදි සෘජු අපනයනකරුවන්ගෙන් විදේශ විනිමය මඟින් ගෙවීම් ලබන සෑම වක්ර භාණ්ඩ හා සේවා අපනයනකරුවෙකුම, එම මුදල් ඉහත දැක්වූ (1 සිට 5 දක්වා වන) අවසර ලත් ගෙවීම් සඳහා පමණක් භාවිත කළ යුතු අතර, ඉන් අනතුරුව ඉතිරි වන සියලුම විදේශ විනිමය ශේෂයන් ද ඊළඟ මාසයේ 10 වැනිදා හෝ ඊට පෙර අනිවාර්යයෙන්ම ශ්රී ලංකා රුපියල් බවට පරිවර්තනය කළ යුතු වේ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
