දිවයින පුරා පවතින දැඩි වියළි කාලගුණික තත්ත්වය හමුවේ, ඉදිරි සති දෙකක කාලය තුළ ජලය අරපිරිමැස්මෙන් භාවිත කරන ලෙස ජාතික ජල සම්පාදන හා ජලාපවාහන මණ්ඩලය මහජනතාවගෙන් දැඩි ඉල්ලීමක් කරයි. පවතින තත්ත්වය කළමනාකරණය කරගනිමින් අඛණ්ඩ ජල සැපයුමක් පවත්වාගෙන යාම සඳහා මෙම සහයෝගය අත්යවශ්ය බව එම මණ්ඩලය අවධාරණය කරයි.
ජාතික ජල සම්පාදන හා ජලාපවාහන මණ්ඩලයේ සභාපති ඉංජිනේරු චන්දන බණ්ඩාර මේ සම්බන්ධයෙන් අදහස් දක්වමින් කියා සිටියේ, මේ වන විටත් ලබුගම සහ කලටුවාව ඇතුළු දිවයිනේ ප්රධාන ජල මූලාශ්ර රැසක ජල මට්ටම සීඝ්රයෙන් පහළ බැස ඇති බවයි.
ජල සැපයුම සීමා වීමේ අවදානමක්
පවතින තත්ත්වය මත ඉදිරි සති දෙක තුනක කාලය තුළ පවතින ජල ධාරිතාව දැඩි කළමනාකරණයකට ලක් කිරීමට සිදුවන බව සභාපතිවරයා පෙන්වා දෙයි. ඒ අනුව, ඉදිරි දිනවලදී ඇතැම් ප්රදේශවලට පැය 24 පුරා අඛණ්ඩව ජලය සැපයීමට බාධා එල්ල විය හැකි අතර, සීමා සහිත කාලසීමාවන් යටතේ ජල සැපයුම ක්රියාත්මක කිරීමට සිදුවනු ඇත.
විශේෂයෙන්ම, දැනට ජලය නොලැබෙන ප්රදේශවලට ජල සැපයුම ලබා දීම සඳහා, දැනට පැය 24 පුරා ජලය ලැබෙන ප්රදේශවල සැපයුම දිනකට පැය කිහිපයකට සීමා කිරීමට සිදු විය හැකි බවද ඔහු සඳහන් කළේය. ඉදිරි සති දෙක තුළ කාලගුණික වෙනසක් සිදු වී වර්ෂාව නොලැබුණහොත් මෙම තීරණය ක්රියාත්මක කිරීමට මණ්ඩලයට සිදු වනු ඇත.
අපතේ යාම වළක්වා ගැනීමට සහය වන්න
කෙසේ වෙතත්, මේ දක්වා කිසිදු ප්රදේශයකට නිල වශයෙන් ජල කප්පාදුවක් හෝ සීමා කිරීමක් සිදු කර නොමැති බව සභාපතිවරයා අවධාරණය කළේය. පවතින තත්ත්වයට සාර්ථකව මුහුණ දීම සඳහා නිවෙස් තුළ මෙන්ම රාජ්ය ආයතන වැනි විශාල පරිශ්රයන්හි සිදුවන ජල කාන්දුවීම් සහ ජලය අපතේ යාම් වළක්වා ගැනීමට කටයුතු කරන ලෙස ජල සම්පාදන මණ්ඩලය ජනතාවගෙන් වැඩිදුරටත් ඉල්ලා සිටියි.
