දිනසේන රතුගමගේ –
යාපනය, පේදුරුතුඩුව කට්ටුකෝවලම් ප්රදේශයේ අනවසරයෙන් වැලි ගොඩදමා ප්රවාහනය කරමින් තිබූ වෑන් රථයක් පොලිස් විශේෂ කාර්ය බලකාය (STF) විසින් අත්අඩංගුවට ගෙන තිබේ. ඊයේ (29) අලුයම සිදුකළ මෙම වැටලීමේදී වෑන් රථයේ රියදුරු නිලධාරීන් මඟහැර පලා ගොස් ඇති බව වාර්තා වේ.
පොලිස් විශේෂ කාර්ය බලකායේ පේදුරුතුඩුව කඳවුරේ නිලධාරීන්ට ලැබුණු බුද්ධි තොරතුරකට අනුව අලුයම 2.00 ට පමණ මෙම වැටලීම සිදු කර ඇත. නිලධාරීන් එම ස්ථානයට ළඟා වනවාත් සමඟ වැලි පටවා තිබූ වෑන් රථයේ රියදුරු අසල පිහිටි ලඳු කැලෑවකට පැන සැඟවී තිබේ.
අත්අඩංගුවට ගත් වැලි පිරවූ වෑන් රථය ඉදිරි විමර්ශන කටයුතු සඳහා පේදුරුතුඩුව පොලිසිය වෙත භාර දී ඇත.
යාපනය අර්ධද්වීපය තුළ කාලයක සිට මහා පරිමාණයෙන් සිදුවන මෙම අනවසර වැලි ජාවාරම පාලනය කිරීම ආරක්ෂක අංශවලට දැඩි අභියෝගයක් වී තිබේ. මීට දින තුනකට ඉහතදී ද කොඩිගාමම් ප්රදේශයේදී අනවසර වැලි ප්රවාහනය කළ ට්රැක්ටරයකට යට කිරීමෙන් පොලිස් සැරයන්වරයෙකු ඝාතනය කෙරුණු අතර, එම සැකකරු අත්අඩංගුවට ගැනීමට මෙතෙක් හැකි වී නොමැත.
මේ ලිපියත් කියවන්න…
යාපනය කොඩිකාමම්හිදී වැලි ජාවාරම්කරුවන් පොලිස් සැරයන්වරයෙකු ටැක්ටරයට යටකර මරා දමයි!
