ඉඳුනිල් කහටපිටිය –
2026 වසරේ දෙවන කාර්තුව සඳහා විදුලි ගාස්තු සංශෝධනය කරමින් විදුලි ගාස්තු ඉහළ දමීමට තීරණය කර ඇති බව ශ්රී ලංකා මහජන උපයෝගිතා කොමිෂන් සභාව (PUCSL) නිවේදනය කරයි.
- නව ගාස්තු සංශෝධනයට අනුව මාසිකව ඒකක 30 දක්වා පරිභෝජනය කරන අඩු ආදායම්ලාභී පාරිභෝගිකයන් සඳහා සියයට 3 ක ගාස්තු වැඩිකිරීමක් සිදු කර ඇත. ඒ අනුව එම කාණ්ඩයේ මාසික බිල්පත රුපියල් 15 කින් පමණ ඉහළ යනු ඇත.
- ඒකක 31 සිට 60 දක්වා පරිභෝජනය කරන නිවාස ඒකක සඳහා සියයට 9 ක ගාස්තු වැඩිකිරීමක් සිදු කර ඇති අතර, එය රුපියල් 45 ක පමණ අගයකි. එමෙන්ම ඒකක 61 සිට 90 දක්වා භාවිත කරන පාරිභෝගිකයන් සඳහා ද සියයට 6.9 ක ගාස්තු වැඩිවීමක් ක්රියාත්මක වන අතර, ඔවුන්ගේ බිල්පත රුපියල් 120 කින් පමණ ඉහළ යනු ඇත.
- වැඩි වශයෙන් විදුලිය පරිභෝජනය කරන ඒකක 91 සිට 180 දක්වා වන කාණ්ඩය සඳහා සියයට 2 ක ගාස්තු වැඩිවීමක් ප්රකාශයට පත් කර ඇති අතර, එමගින් ඔවුන්ගේ බිල්පත රුපියල් 420 කින් පමණ ඉහළ යනු ඇත.
කෙසේ වෙතත්, වැඩිම බලපෑම එල්ල වී ඇත්තේ මාසිකව ඒකක 180 ට වඩා වැඩි විදුලි ඒකක ප්රමාණයක් පරිභෝජනය කරන පාරිභෝගිකයන්ටය. එම කාණ්ඩය සඳහා සියයට 25 ක දැවැන්ත ගාස්තු වැඩිවීමක් සිදු කිරීමට මහජන උපයෝගිතා කොමිෂන් සභාව පියවර ගෙන තිබේ.
පවතින පිරිවැය සහ විදුලි බල ක්ෂේත්රයේ අවශ්යතාවයන් සැලකිල්ලට ගනිමින් 2026 වසරේ දෙවන කාර්තුව සඳහා මෙම ගාස්තු සංශෝධනය හඳුන්වා දුන් බව එම කොමිෂන් සභාව වැඩිදුරටත් සඳහන් කරයි.
