වාහන ලියාපදිංචි කිරීමේදී සිදුවූ බව කියන මහා පරිමාණ මූල්ය අක්රමිකතා සහ වංචා කිහිපයකට සම්බන්ධ බවට එල්ල වූ චෝදනා මත මෝටර් රථ ප්රවාහන කොමසාරිස් ජනරාල්වරයා අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන තිබේ.
අපරාධ පරීක්ෂණ දෙපාර්තමේන්තුවේ මූල්ය විමර්ශන කොට්ඨාසය මගින් ඊයේ (මාර්තු 27) රාත්රියේ මෙම අත්අඩංගුවට ගැනීම සිදු කර ඇත. පොලිස් ආරංචි මාර්ග සඳහන් කරන්නේ කැබ් රථයක චැසි අංකය වෙනස් කරමින් එය ව්යාජ ලෙස ලියාපදිංචි කිරීමට ආධාර සහ අනුබල දීමේ චෝදනාව ඔහුට එල්ල වී ඇති බවයි. 2025 අප්රේල් මාසයේදී මෙම තනතුරට පත් වූ කොමසාරිස් ජනරාල්වරයා අද (මාර්තු 28) අධිකරණයට ඉදිරිපත් කිරීමට නියමිතය.
වසර කිහිපයක සිට ක්රියාත්මක වූ විමර්ශනය
මෙම අත්අඩංගුවට ගැනීම මෝටර් රථ ප්රවාහන දෙපාර්තමේන්තුවේ (DMT) පරිගණක දත්ත පද්ධතියට (e-MOT) ව්යාජ ලෙස ඇතුළු වී සිදුකරන මහා පරිමාණ ජාවාරමක් සම්බන්ධයෙන් වසර කිහිපයක සිට ක්රියාත්මක වූ පුළුල් විමර්ශනයක තීරණාත්මක හැරවුම් ලක්ෂයකි. පසුගිය කාලය පුරා නීති විරෝධී ලෙස මෙරටට ගෙන්වන ලද සහ එකලස් කරන ලද වාහන 400කට අධික ප්රමාණයක්, රජයට ගෙවිය යුතු බදු පැහැර හරිමින් ව්යාජ ලෙස ලියාපදිංචි කර ඇති බවට විගණන වාර්තා මගින් මීට පෙර කරුණු අනාවරණය කර තිබුණි.
මීට පෙර සිදුකළ විමර්ශනවලදී හෙළි වූයේ, දෙපාර්තමේන්තුවේ නිලධාරීන් කිහිපදෙනෙකුගේ සහ බාහිර තැරැව්කරුවන්ගේ සහාය ඇතිව, පවතින දත්ත පද්ධතියේ ‘පසුපස දොරටුවකින්’ (Backdoor access) ඇතුළු වී මෙම වංචනික ලියාපදිංචි කිරීම් සිදුකර ඇති බවයි. විශේෂයෙන්ම භාවිතයෙන් ඉවත් කළ වාහනවල අංක තහඩු සහ චැසි අංක භාවිතා කරමින් සුඛෝපභෝගී වාහන ලියාපදිංචි කිරීමේ ජාවාරමක් පිළිබඳව අපරාධ පරීක්ෂණ දෙපාර්තමේන්තුව දීර්ඝ කාලයක සිට සාක්ෂි රැස් කරමින් සිටියේය.
ඉහළ පෙළේ නිලධාරීන්ගේ සම්බන්ධතාව
මෙම විමර්ශන මාලාව යටතේ මීට පෙරද දෙපාර්තමේන්තුවේ ඉහළ නිලධාරීන් කිහිපදෙනෙකු සහ දත්ත පද්ධතිය හැසිරවූ තොරතුරු තාක්ෂණ අංශයේ සේවකයින් කිහිපදෙනෙකු අත්අඩංගුවට පත් විය. මේ අතර කමල් අමරසිංහට එල්ල වූ වෙනම චෝදනා මාලාවක් ද වේ.මාවතගම ප්රදේශයේ පදිංචිකරුවෙකු වන කමල් අමරසිංහ, මෝටර් රථ ප්රවාහන කොමසාරිස් ජනරාල් ධුරයට පත්වීමට පෙර සිටම සිය සොහොයුරා සමඟ එක්ව මෙම කූට ලේඛන සකස් කිරීමේ සහ නීති විරෝධී වාහන එකලස් කිරීමේ ජාවාරම මෙහෙයවා ඇති බවට චෝදනා තිබිණි. ඔහු සම්බන්ධ ජාවාරම පිළිබඳ තොරතුරු මුලින්ම අනාවරණය වී ඇත්තේ වලාන දූෂණ මර්දන මධ්යම ඒකකයට ලැබුණු තොරතුරකට අනුව මාවතගම ප්රදේශයේ ගරාජයක් වැටලීමෙන් පසුව බව කියැවේ. එහිදී ව්යාජ ලෙස එකලස් කිරීමට සැලසුම් කළ වාහනයක් අත් අඩංගුවට ගෙන ඇති අතර එම එකලස් කිරීම පසුපස මෙම නිලධාරියා සිටින බව අනාවරණය වී ඇත.
අදාළ රථය අත්අඩංගුවට ගැනීමෙන් පසු විමර්ශන නිලධාරීන් එම වාහනයේ නිෂ්පාදිත රටේ ලියකියවිලි අඩංගු ලිපිගොනුව පරීක්ෂා කිරීමට මෝටර් රථ ප්රවාහන දෙපාර්තමේන්තුවට ගිය අවස්ථාවේදී එම ගොනුව අතුරුදහන් වී ඇති බව අනාවරණය වී තිබේ.
මෙම අක්රමිකතා සම්බන්ධයෙන් පොලිස්පතිවරයා වෙත දිගින් දිගටම ලැබුණු පැමිණිලි සැලකිල්ලට ගනිමින්, ඒ පිළිබඳව ඉතාමත් තියුණු තාක්ෂණික විමර්ශනයක් පවත්වන ලෙස අපරාධ පරීක්ෂණ දෙපාර්තමේන්තුවට නියෝග කර තිබුණි. ඒ අනුව ක්රියාත්මක වූ CID මූල්ය විමර්ශන ඒකකය විසින් මෙම අත්අඩංගුවට ගැනීම සිදු කර ඇති බව වාර්තා වේ.
සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව වැඩිදුර විමර්ශන සිදු කරයි.
