රට තුළ ඉන්ධන සැපයුම සම්පූර්ණයෙන්ම සහතික කර ඇති බවත්, ඉදිරි මාස කිහිපය සඳහා අවශ්ය තොග ඇණවුම් කර ඇති බැවින් කිසිදු හිඟයකින් තොරව බෙදා හැරීම් සිදු කරන බවත් ලංකා ඛනිජ තෙල් නීතිගත සංස්ථාවේ සභාපති ඩී.ජේ.ඒ.එස් ද එස්. රාජකරුණා පවසයි.
රජයේ ප්රවෘත්ති දෙපාර්තමේන්තුවේ අද පැවැති විශේෂ මාධ්ය හමුවකදී අදහස් දක්වමින් ඔහු අවධාරණය කළේ, බලාගාර සඳහා අවශ්ය දැවි තෙල් සැපයුමද දැනටමත් ස්ථාවර කර ඇති බැවින් ඉදිරියේදී විදුලි කප්පාදුවක අවශ්යතාවක් මතු නොවන බවයි.
-
ඉන්ධන නැව් මාලාවක් දිවයිනට
ඉදිරි දිනවලදී මෙරටට ළඟා වීමට නියමිත ඉන්ධන නැව් පිළිබඳ විස්තර ඉදිරිපත් කළ සභාපතිවරයා, අප්රේල් මාසය අවසානය දක්වාම ඉන්ධන ගොඩබෑම් කාලසටහන සකස් කර ඇති බව සඳහන් කළේය. ඩීසල් සැපයුම ලබන මාසයේ මැද දක්වාත්, 92 සහ 95 පෙට්රල් සැපයුම ජුනි මස මුල දක්වාත් කිසිදු බාධාවකින් තොරව පවත්වාගෙන යා හැකි බව ඔහු තහවුරු කළේය.
සභාපතිවරයා ඉදිරිපත් කළ දත්ත අනුව ඉන්ධන ලැබීමේ කාලසටහන මෙසේය:
- මාර්තු 27: 92 පෙට්රල් මෙට්රික් ටොන් 30,000ක් සහ 95 පෙට්රල් මෙට්රික් ටොන් 5,000ක් රැගත් නැවක්.
- මාර්තු 28: IOC සමාගම හරහා ඩීසල් මෙට්රික් ටොන් 18,000ක් සහ 92 පෙට්රල් මෙට්රික් ටොන් 18,000ක්.
- අප්රේල් 02 – 04: ඩීසල් මෙට්රික් ටොන් 32,000ක් සහ ගුවන් යානා ඉන්ධන මෙට්රික් ටොන් 8,000ක්.
- අප්රේල් 06 – 08: ඩීසල් මෙට්රික් ටොන් 37,500ක්, තවත් ඩීසල් මෙට්රික් ටොන් 32,000ක් සහ සුපර් ඩීසල් මෙට්රික් ටොන් 5,000ක්.
- අප්රේල් 12 – 13: විදුලි උත්පාදනය සඳහා අවශ්ය දැවි තෙල් මෙට්රික් ටොන් 30,000ක්.
- අප්රේල් 18 – 19: සිනොපෙක් සමාගම හරහා ඩීසල් මෙට්රික් ටොන් 20,000ක් සහ 92 පෙට්රල් මෙට්රික් ටොන් 20,000ක්.
පිරිපහදුව සහ විදුලිය
මෙහිදී වැඩිදුරටත් අදහස් දැක්වූ ඩී.ජේ.ඒ.එස් ද එස්. රාජකරුණා, පිරිපහදු කටයුතු සඳහා අවශ්ය බොරතෙල් සම්බන්ධයෙන් පැවති ගැටලුවලට විසඳුම් ලබා දී ඇති බවත්, එමගින් ඩීසල් සහ දැවි තෙල් නිෂ්පාදනය අඛණ්ඩව සිදුවන බවත් පැවසීය.
විශේෂයෙන්ම මැදපෙරදිග පවතින යුදමය වාතාවරණයෙන් බැහැර කලාපවලින් මෙම ඉන්ධන තොග ඇණවුම් කර ඇති බැවින්, සැපයුම් දාමයට කිසිදු බලපෑමක් එල්ල නොවන බවද ඔහු වැඩිදුරටත් කියා සිටියේය.
