දෙවුන්දරට දකුණු දෙසින් වූ මුහුදු ප්රදේශයේදී මත්ද්රව්ය ප්රවාහනය කරමින් තිබියදී නාවික හමුදා භාරයට ගත් බහුදින ධීවර යාත්රාවේ හෙරොයින් මත්ද්රව්ය කිලෝ 123කට ආසන්න ප්රමාණයක් තිබූ බව ආරක්ෂක නියෝජ්ය අමාත්ය අරුණ ජයසේකර පවසයි.
ඊයේ (15) නාවික හමුදාව විසින් වටලනු ලැබූ මෙම යාත්රාව අද (16) උදෑසන දික්ඕවිට වරායට රැගෙන එනු ලැබීය. එහිදී සිදුකළ පරීක්ෂාවලින් අනතුරුව එම උර 6 තුළ අඩංගු ද්රව්ය හෙරොයින් බවට පොලිස් මත්ද්රව්ය නාශක කාර්යාංශය විසින් තහවුරු කර ඇත. නියෝජ්ය අමාත්යවරයා සඳහන් කළේ අත්අඩංගුවට ගත් මෙම මත්ද්රව්ය තොගයේ වෙළෙඳපොළ වටිනාකම රුපියල් බිලියන 3කට ආසන්න බවයි.
යාත්රාව සමඟ එහි සිටි සැකකරුවන් පස්දෙනෙකු නාවික හමුදාව විසින් භාරයට ගෙන තිබූ අතර, යාත්රාව ගොඩබිමට රැගෙන ඒමෙන් පසු ඔවුන් මත්ද්රව්ය නාශක කාර්යාංශය මගින් අත්අඩංගුවට ගෙන තිබේ.
මේ අතර, බේරුවල මුහුදු සීමාවේදී මත්ද්රව්ය ප්රවාහනය කරන බවට සැකකෙරෙන තවත් බහුදින ධීවර යාත්රාවක් නාවික හමුදාව විසින් මීට සුළු මොහොතකට පෙර සිය භාරයට ගෙන ඇති බවද නියෝජ්ය අමාත්ය අරුණ ජයසේකර අනාවරණය කළේය.
එම යාත්රාවද මේ වන විට ගොඩබිමට රැගෙන එමින් පවතින අතර එහි අඩංගු මත්ද්රව්ය ප්රමාණය පරීක්ෂාවෙන් පසු දැනුම් දෙන බව හෙතෙම පැවසීය.
මෙම වැටලීමත් සමඟ 2026 වසරේ මේ දක්වා කාලය තුළ පමණක් මෙරටට මත්ද්රව්ය ප්රවාහනය කිරීමට උත්සාහ කළ බහුදින ධීවර යාත්රා 15කට අධික සංඛ්යාවක් නාවික හමුදාව විසින් අත්අඩංගුවට ගෙන ඇත.
විශේෂයෙන් පසුගිය මාර්තු 12 වැනිදා සහ පෙබරවාරි මස අග සතියේ සිදුකළ මෙහෙයුම් ද ඇතුළුව, මෙම වසරේ ගතවූ මාස දෙකහමාරක කාලය තුළ නාවික හමුදාව විසින් රජයේ භාරයට ගෙන ඇති මත්ද්රව්ය තොගවල මුළු වෙළෙඳපොළ වටිනාකම රුපියල් බිලියන 25 ඉක්මවා යන බව නාවික හමුදා දත්ත වාර්තා පෙන්වා දෙයි.
මේ ලිපියත් කියවන්න…
දෙවුන්දර මුහුදේදී මත්ද්රව්ය සමඟ අත්අඩංගුවට ගත් යාත්රාව හෙට ගොඩබිමට!
