පාස්කු ඉරුදින ත්රස්ත ප්රහාර මාලාවට අදාළව සිදුකෙරෙන පුළුල් විමර්ශනවල තීරණාත්මක පියවරක් ලෙස, හිටපු ජනාධිපති ගෝඨාභය රාජපක්ෂට විදෙස්ගත වීම තහනම් කරමින් කොළඹ කොටුව මහේස්ත්රාත් අධිකරණය අද (03) නියෝගයක් නිකුත් කළේය.
අපරාධ පරීක්ෂණ දෙපාර්තමේන්තුව (CID) විසින් අධිකරණය හමුවේ ගොනු කරන ලද විශේෂ මෝසමක් සලකා බැලීමෙන් අනතුරුව කොළඹ කොටුව මහේස්ත්රාත් පසන් අමරසේන විසින් මෙම නියෝගය පනවනු ලැබීය.
මෙම නියෝගයට අනුව හිටපු ජනාධිපතිවරයාට අමතරව ශ්රී ලංකා යුද හමුදාවේ ඉහළ නිලධාරීන් දෙදෙනෙකුට ද විදෙස් ගමන් තහනම් පනවා ඇත. මෙලෙස විදෙස් ගමන් තහනම් කෙරුණු අනෙක් පුද්ගලයන් වන්නේ:
-
යුද හමුදාවේ කර්නල් මොහොමඩ් අන්සාර්
-
හිටපු බුද්ධි අංශ නිලධාරියෙකු වන ප්රේමරත්න උදලාගම නොහොත් සිල්වා
මේ අතර, මෙම විමර්ශනවලටම අදාළව හිටපු ජාතික බුද්ධි ප්රධානී, විශ්රාමික මේජර් ජනරාල් සුරේෂ් සලෙයි මේ වනවිටත් ආරක්ෂක අංශ භාරයේ පසුවේ. ඔහු ආරක්ෂක අමාත්යාංශයෙන් ලබාගත් දින 90ක රැඳවුම් නියෝග මත තබාගෙන ප්රශ්න කරමින් සිටින බව ද වාර්තා වේ. පාස්කු ප්රහාරය සම්බන්ධයෙන් සිදුවන ඉදිරි විමර්ශන සඳහා මොවුන් මෙරට රැඳී සිටීම අත්යවශ්ය බැවින් අපරාධ පරීක්ෂණ දෙපාර්තමේන්තුව කළ ඉල්ලීමකට අනුව අධිකරණය මෙම පියවර ගෙන ඇත.
