ලලිත් චාමින්ද –
හබරාදුව, කොක්වත්ත ප්රදේශයේ නිවසකට අකුණු සැර වැදීමකින් පසු මිය ගිය තරුණ ඇඟලුම් සේවිකාවගේ මරණයට හේතුව අකුණු සැර වැදීමක් නොවන බව පශ්චාත් මරණ පරීක්ෂණයේ දී තහවුරු වී තිබේ.
එහිදී අනාවරණය වී ඇත්තේ තරුණියට සෘජුවම අකුණු සැර වැදී නොමැති බවත්, අකුණු සැර වැදීමෙන් නිවසට සිදු වූ හානියත් සමඟ කඩා වැටුණු සුන්බුන් හිසෙහි වැදීමෙන් සිදුවු බරපතල තුවාල නිසා මෙම මරණය සිදුව ඇති බවත්ය.
මියගොස් ඇත්තේ පස්ගොඩ, රොටඹු පාර, අංක 49 ලිපිනයේ පදිංචිව සිටි සේනානායක ප්රීතිගල්ලගේ ඉමාෂා මධුභාෂණී හිතවංශ නැමති 26 හැවිරිදි තරුණියකි. ඇය කොග්ගල ආයෝජන ප්රවර්ධන කලාපයේ ඇඟලුම් කම්හලක සේවය කරමින් සිටි තැනැත්තියකි.
මෙම අනතුරින් නිවසේ රැඳී සිටි තවත් තරුණියක් තුවාල ලබා කරාපිටිය ජාතික රෝහලට ඇතුළත් කර ඇති අතර, ඇය දැඩි කම්පන තත්ත්වයකින් පසුවන බව වාර්තා වේ.
මියගිය තරුණිය සහෝදරියන් තිදෙනෙකුගෙන් යුත් පවුලක දෙවැනි දරුවා වන අතර, වසර එකහමාරක පමණ කාලයක සිට කොග්ගල ප්රදේශයේ රැකියාවේ නිරතව ඇත.
ඇය අනතුර සිදු වූ දිනට පෙර දින රාත්රියේ නිවස බලා යාමට සූදානම්ව සිටියද, රාත්රී කාලය එළඹීම නිසා ගමන නතර කර නවාතැන්පළේ රැඳී සිටියදී මෙම අවාසනාවන්ත ඉරණමට මුහුණ පා ඇත.
හබරාදුව හදිසි මරණ පරීක්ෂක කමල් ගාමිණීතිලක විසින් මරණ පරීක්ෂණය පවත්වනු ලැබීය.
