-
රහස් ඡන්දයකට මුලින් එකඟ වෙලා පස්සේ බෑ කියන්නේ තමන්ගේ පක්ෂෙ සාමාජිකයින් ෂුවර් නැති නිසා… දැන් තියන තත්ත්වය හැටියට රහස් ඡන්දයක් තිබ්බොත් විපක්ෂ නායකතුමත් පරාද වෙලා විපක්ෂ නායක කමත් එතුමාට නැති වෙනවා… කෞෂල්යා කියයි..
මුජිබර් රහුමාන් මන්ත්රීවරයාගේ හිතේ ඇති බලවත් වේදනාව තේරුම් ගත හැකි නමුත් පනතක් සහ මාර්ගෝපදේශනයක් සම්බන්ධව නෛතික අවබෝධයක් නොමැතිව, කොන්ද කෙළින් තබාගෙන වැඩ කරන රාජ්ය සේවකයින්ට තර්ජනය කිරීම නොකළ යුත්තක් බව නිතිඥ, ආචාර්ය කෞෂල්යා ආරියරත්න අද පාර්ලිමේන්තුවේ දී මුජිබර් රහුමාන් මන්ත්රීවරයාට පැවසුවේය.
ඇය පෙන්වා දුන්නේ පසුගිය ජුනි 14 වැනිදා රාජ්ය පරිපාලන ලේකම්වරයා විසින් මේ සම්බන්ධව නිකුත් කර ඇති නවතම මාර්ගෝපදේශය අනුව බස්නාහිර පළාත් කොමසාරිස්වරිය කටයුතු කර ඇති බැවින් යළිත් කවදාවත් බලයට පැමිණීමේ ඉඩක් නොපෙනෙන බැවින් රාජ්ය සේවකයින්ට නැවත තර්ජනය නොකරන ලෙසත් මන්ත්රීවරිය මුජිබර් රහුමාන් මන්ත්රීවරයාගෙන් ඉල්ලා සිටියේය.
ඇය කීවේ මෙවැන්නකි.
“පනතේ තියනවා යම් ප්රතිපාදන ටිකක්. එතකොට පනතක් සහ මාර්ගෝපදේශයක් කියන්නේ නීතිමය පැත්තෙන් ගත්තාම දෙකක්. ඒක හරියට ජාත්යාන්තර නීතියෙ නම් Convention එකක් සහ Declaration එකක් වගේ දෙයක්. ඒ කියන්නේ සම්මුතියක් සහ ප්රකාශයක්. ඒ දෙකේ නීතිමය වෙනසක් තියනවා. Convention එකකට බැඳීමක් ඇති කරනවා. Declaration එකකට බැඳීමක් නෑ.”
“ඒ වගේම නීතිය අනුව පනතක් සහ මාර්ගෝපදේශනයක් අතර පැහැදිලි වෙනසක් තියනවා. පනත කියන්නේ නීතිමය බැඳීමක් ඇතිකරන දෙයක්. ඕනෑම කෙනෙක් බැඳෙන්නේ ඒ පනතෙන්. නමුත් මාර්ගෝපදේශයක් කියන්නේ යම් පැහැදිලි කිරීමේ ගයිඩ් ලයින් එකක් පමණයි. ඒ පැහැදිලිකිරීම ඇතුළේ නීතිමය බැඳීමක් නෑ.”
“දැන් මෙතුමාලා දිගින් දිගටම කියනවා මේ මාර්ගෝපදේශනයක් ගැන. දිනේකුත් නැතිව කියන්නෙ. දිනයක් නැති මාර්ගෝපදේශනයක් ගැන. නමුත් එතුමාලා නොකියන දෙයක් තියනවා. 2025 ජුනි 14 වැනිදා රාජ්ය පරිපාලන සහ පළාත් සභා අමාත්යාංශයේ ලේකම් තුමා නිකුත් කරනවා මෙන්න මේ විදිහේ ලියුමක්.”
“මම විශ්වාස කරනවා ඔය කියන දින නොමැති මාර්ගෝපදේශනයට පස්සේ ආපු එකක් කියලා. මොකද මේක එන්නේ ජූනි මාසේ 14.”
“ඔබ වෙත එවා ඇති මාර්ගෝපදේශ සංග්රහය – පලාත් පාලන කොමසාරිස් ලෙස 2010 අංක 22 දරන පළාත් පාලන ආයතන ඡන්ද විමසීම් පනතින් ඔබ වෙත පැවරී ඇති ව්යවස්ථාපිත කාර්ය භාර්ය පහසු කරවීම සඳහා සපයන උපදෙස් මාලාවක් පමණක්වන අතර ඔබ වෙත පැවරී ඇති ව්යවස්ථාපිත කාර්ය භාර්ය යථෝක්ත පනතේ විධි විධාන යටතේ ඉටු කළ යුතුව ඇත.
“ඒ පනතට අනුව කොමාසාරිස්වරයා වෙත පැවරී ඇති බලතල හා වගකීම් ප්රකාරව කටයුතු කළ යුතු අතර ඒ සම්බන්ධව තීරණ ගැනීමේ වගකීම ද එකී නීතිය ප්රකාරව පළාත් පාලන කොමසාරිස්වරයා වෙත ඉටු කළ යුතුය.”
“ඒ නිසා බොරුවට තර්ජනය කරන්න එපා. කොමසාරිස් තුමිය එතුමියට ලැබී ඇති නිසි බලතල අනුව පනත අනුව කටයුතු කරලා තියනවා. එතුමියගේ කොන්ද පණ ඇතිව ස්වාධීනව පනත අනුව කටයුතු කරනවා කියලා ප්රකාශ කරලා තියනවා.”
“ඒ වගේම ඡන්දයට කලින් රහස් ඡන්දයක් ඉල්ලපු කට්ටිය පස්සේ රහස් ඡන්දයකට විරුද්ධ වුනා. අපි දන්නවා ඒක කළේ ඇයි කියලා. හේතුව තමන්ගේ පක්ෂෙ අයවත් තමන්ට ෂුවර් නෑ. එච්චරයි ගරු නියෝජ්ය කතා නායක තුමනි.”
“අර විපක්ෂ නායකතුමා උදේ කිව්වා නේද අසේවනාච බාලානං – පණ්ඩිතානංච සේවනා කියලා. එතුමටත් මට කියන්න තියෙන්නෙ තමන්ගෙ පක්ෂයෙ ඉන්නේ දුර්වල සංවිධායකයො ටිකක්. ඒ නිසා තමන්ට බිමේ තියන බලයත් නැති වෙලා තියනවා. එතුමා රහස් ඡන්දයකට ගියොත් හෙට අපි දන්නෙ නෑ එතුමාවත් කැමැත්තෙන් භාර ගනීද කියලා එතුමාගේ පක්ෂයේ අය.”
“මම කියන්නේ තර්ජනය කළාට වැඩක් නෑ. ඔබතුමාල බලයට එන්නෙත් නෑ නැවත. තර්ජනය කරන්න එපා. කොන්ද කෙලින් තියන් නීතිය ප්රකාරව වැඩ කරන රාජ්ය සේවකයින්ට විරුද්ධව.”
