පාස්කු ප්රහාරයට සම්බන්ධව සිට අතුරුදහන් වූ බව කියන සාරා ජස්මින් නැමැති කාන්තාව සැබෑ ලෙසම මියගියේද ජීවතුන් අතර ද යන්න යළි තහවුරු කරගැනීම සඳහා යළි ඩී.එන්.ඒ පරික්ෂණයක් කිරීමේ අභිලාෂයෙන් සයින්දමර්දු මළසිරුරු මේ වනවිට ගොඩ දමමින් ඇත.
ඉතා සූක්ෂම අයුරින් ගොඩ ගන්නා සිරුරු අතරින් මුලින්ම ගොඩගෙන ඇත්තේ මිය ගිය දරුවන්ගේ සිරුරු කොටස් බව වාර්තා වේ. මෙම පරීක්ෂණ ඉතා විද්යානුකූල ලෙස සිදුකර නිර්දේශ ලබා දී නිමා කළ ඒවා බැවින් මෙම ගොඩදැමීම දැඩි අවධානයකින් සිදුකළ යුතු බව විමර්ශන අංශ පවසයි.
මීගමුව කටුවපිටිය පල්ලියට බෝම්බ ප්රහාර එල්ල කළ හස්තුන් ගේ බිරිය වන සාරා ජස්මින් ද මරාගෙන මැරෙන බෝම්බකාරියක ලෙස පුහුණු වූ කාන්තාවකි. ඇය අප්රියෙල් 21 වැනිදා සිදුවූ ප්රහාරයෙන් පසුව සයින්දමරුදු ප්රදේශයට පළා ගිය බවට තොරතුරු අනාවරණය වූ අතර එහි නිවසක රැඳී සිටින බවට ලද තොරතුරක් මත එම නිවස ආරක්ෂක අංශ විසින් වටළා තිබිණි.
එම අවස්ථාවේ දී එහි සිටි මරාගෙන මැරෙන බෝම්බකරුවකු බෝම්බයක් පුපුරුවාගෙන තිබේ. ඒ අවස්ථාවේ එම නිවසේ 19 දෙනකු සිට ඇති අතර එයින් දිවි බේරගෙන තිබුණේ සහරාන්ගේ බිරිය සාදියා සහ ඇගේ කුඩා දරුවා පමණි.
19 දෙනකු සිටියද එම ස්ථානයෙන් හමුවූ මළ සිරුරු සහ සිරුරු කොටස් සම්බන්ධයෙන් සිදුකරන ලද ඩී.එන්.ඒ පරීක්ෂණයේදි තහවුරු වී තිබුණේ එම ස්ථානයේ මළ සිරුරු 16 දෙනකුගේ පමණක් තිබුණු බවය.
මෙම නිවසේ සිටි බව කියන සාරා ජස්මින්ගේ ඩී.එන්.ඒ මෙම සිරුරු සමඟ නොසැසඳුණු අතර ඇය ඉන්දියාවට පලා ගිය බවට තොරතුරු අනාවරණය වී තිබුණි.
ඇය මෙම ප්රහාරය පිළිබඳව සැලකිය යුතු වැදගත් තොරතුරු දන්නා බව විමර්ශකයන් විශ්වාස කරන අතර ඇය පිළිබඳව කෙරුණු විමසීම්වලදී ඇය මිය ගොස් ඇති බව මහජන ආරක්ෂාව පිළිබඳව හිටපු අමාත්ය සරත් වීරසේකර ප්රකාශ කළේය.
කෙසේ වුවද පොලිසිය සතුව ඇය මිය ගිය බට ස්ථිර තොරතුරක් නැති අතර මේ බව යළිත් සනාථ කර ගැනීම සඳහා මෙලෙස සිරුරු ගෙන ඩී.එන්.ඒ පරීක්ෂණයක් යළි සිදු කිරීමට නියමිතව ඇති බව මෙම ආරංචි මාර්ග සඳහන් කළේය.
