බොරැල්ල සහස්පුර සිරිසර උයන මහල් නිවාස සංකීර්ණය අසලදී ඝාතකයෙකුගේ වෙඩි ප්රහාරයකට ලක්ව රෝහල් ගත කළ තරුණයින් 05 දෙනාගෙන් එක් අයකු මියගිය බවත් තවත් තිදෙනෙකුගේ තත්ත්වය බරපතල බවත් රෝහල් ආරංචි මාර්ග අනාවරණය කරයි.
වෙඩි ප්රහාරයෙන් මරා දමා ඇත්තේ කැලණිය අකුරුපිටිය පාර පදිංචිව සිටි එස් මදුෂාන් නැමැති 23 හැවිරිදි තරුණයෙකි. වෙඩි වැදී දැනට කොළඹ ජාතික රෝහලේ ප්රතිකාර ගනිමින් සිටින අනෙක් තරුණයින් සිවු දෙනා කොළඹ 09 ප්රදේශයේ පදිංචි 21, 22 සහ 23 හැවිරිදි පුද්ගලයින්ය.
කොළඹ ජාතික රෝහලේ, නියෝජ්ය අධ්යක්ෂ, වෛද්ය රුක්ෂාන් බෙල්ලනට අනුව බරපතළ තුවාල ලැබු තිදෙනාම මේ වනවිට කොළඹ ජාතික රෝහලේ දැඩි සත්කාර ඒකකයේ ප්රතිකාර ලබන බවත් මෙයින් එක් තරුණයෙකුට ගැඹුරු තුවාල සිදුව ඇති බැවින් මේ වනවිට ඔහුව සැත්කමකට භාජනය කර ඇති බවත්ය.
අද දින පැවතීමට නියමිත ක්රීඩා තරඟයට සැරසිලි කටයුතු කරමින් සිටි තරුණයින් පස් දෙනකු වාඩි වී සිටියදී යතුරු පැදියකින් පැමිණ ටි 56 ගිනි අවියකින් මෙම වෙඩි තැබීම සිදු කර තිබූ බව පොලිසිය කියයි.
අපරාධය සිදුවූ ස්ථානයේ තිබී උණ්ඩ කොපු 25 ක් පොලිසිය මගින් සොයාගෙන ඇත.
