ලලිත් චාමින්ද –
මෝටර්රථ ප්රවාහන දෙපාර්තමේන්තුව විසින් රියදුරු බලපත්ර මුද්රණය කිරීම සදහා භාවිතාකරණ පරිඝණක මෘදුකාංග පද්ධතියේ නඩත්තු හා සේවා ලබා ගැනිමට ඉකුත් වසර දෙක (2023/2024) තුළදි රුපියල් මිලියන 335.1ක මුදලක් ( කෝටි තිස් තුන හමාරක් ) අසාමාන්ය ලෙස වැයකොට ඇති බැව් පාර්ලිමේන්තුවට ඉදිරිපත්කොට ඇති රජයේ ගිණුම් පිළිබඳ කාරක සභාවේ දෙවැනි වාර්තාවේ සඳහන් වේ.
මෙම පද්ධතියේ නඩත්තු හා සේවා කටයුතු නිසි ටෙන්ඩර් පටිපාටියකින් තොරව පුද්ගලික සමාගමකින් ලබාගෙන ඇති බවද මෙම වාර්තාවේ සඳහන් වේ.
2023 වර්ෂයේ දි රුපියල් මිලියන 154.1ක මුදලක් සහ 2024 වර්ෂයේ දි රුපියල් මිලියන 181ක මුදලක් මෙම පරිඝණක මෘදුකාංග පද්ධතියේ නඩත්තු කටයුතු සදහා ඉතා අසාමාන්ය ලෙස දරා තිබුණු බවද මෙම පිරිවැය අතාර්කික බව ද වාර්තාවේ දැක්වේ.
මෙම දත්ත පද්ධතිය ඉතා සරල දත්ත පද්ධතියක් වන අතර මෙහි නඩත්තු හා සේවා කටයුතු ටෙන්ඩර් ක්රියාවලියකින් තොරව මෘදුකාංගයේ නිර්මාණකරුවන් සමග කිසිදු සම්බන්දතාවයක් නොමැති ආයතනයක් වෙත ඉතා ඉහළ පිරිවැයකට මෘදුකාංගයේ නඩත්තු හා සේවා ලබාදිමට හේතු වු කරුණු කිසිවත් ලේඛනගත වි නොතිබු බවද මෙම වාර්තාවේ සදහන් වේ.
