වින්දිතයන් වෙනුවෙන් සාධාරණය ඉටුවන තුරු තමන් වහන්සේ මේ දියත් කර ඇති සටන අත් නොහරින බවත්, එය සංකේවත් කරමින් ක්රිස්තියානි ආගමික නායකයින් හා බෞද්ධ භික්ෂූන් වහන්සේලා අද පස්වරුවේ මීගමුවේදී පා ගමනක් පවත්වන බවත් මැල්කම් කාදිනල් රංජිත් කොළඹ අගදරගුරුතුමෝ පැවසූහ.
පාස්කු ප්රහාරය එල්ල වී දෙවසරක් සම්පූර්ණවීම නිමිත්තෙන් කොච්චිකඩේ ශාන්ත අන්තෝනි දේවස්ථානයේදී අද පෙරවරුවේ පැවති ‘ දෙවසරක පාස්කු කඳුළ’ වැඩසටහනට එක්වෙමින් අගරදගුරු තුමානෝ මේ බව කීහ.
අප්රේල් 21 වැනිදා දිනය අමතක නොවන ඛේදනීය දිනයක් ලෙස ඉතිහාසයට එක්වන බව කී එතුමෝ කාලයේ ඇවෑමෙන් සියල්ල යටපත් කර සත්ය වලදමා වැරදිකරුවන් නිවැරදිකරුවන් බවට පත්කිරීමේ සංවිධානාත්මක ප්රයත්නයට සම්බන්ධවීමට කිසිසේත්ම සූදානම් නැතැයිද පැවසූහ.
රටේ සෙසු අපරාධ සම්බන්ධයෙන් කෙරෙන පරීක්ෂණවල කාර්යක්ෂමතාවය , කිසිකෙනෙකුට වරදක් නොකළ දරුවන් 68ක් සහ වැඩිහිටියන් 201 ක් ඇතුළු 269 දෙනෙකු අමුඅමුවේ ඝාතනය කළ මේ කුරිරු මිනීමැරුම කෙරෙහි ක්රියාත්මක නොවීට ගැටලුවක් බව කී එතුමෝ වසර දෙකක් ගතවුවත් මේ මිනිස් සංහාරය සිදුකළේ කවුද, කුමන හේතුවකටද? කාගේ උවමනාවකටද යන්න රටට හෙළිදරව් කිරීමට අපරාධ පරීක්ෂණ දෙපාර්තමේන්තුවත්, ඊට අදාළ රජයේ අනෙකුත් ආයතනත් අපොහොසත් වී තිබීම විශාල තේරුම් ගත නොහැකි විශාල ගැටලුවක් බව කීහ.
එදා පැවති රජයත්, වත්මන් රජයත් පෙන්වන උදාසීනබව, දේශපාලන සුළඟ හමන පැති අනුව තීරණ ගන්නා, ලිස්සා යන සුළු ක්රියා පිළිවෙත පිළිබඳව බලවත් ශෝකයක් පවතින බව කී එතුමෝ එම ක්රියාදාමය පිටුපස බොහෝ විට දේශපාලන අරමුණු තිබෙන බව කාටත් පැහැදිලි වෙමින් තිබෙන බව පෙන්වා දුන්හ.
